ქართული კომპანია Agrocom-ის დამფუძნებელი ირაკლი მერკვილიშვილი მის მიერ კორის მახლობლად გაშენებული მსხლის ინტენსიური ბაღის კარგ მოსავლიანობაზე და ამ მიმართულებით საკუთარ გამოცდილებაზე east-fruit.com–თან საუბრობს.
„მსხლის საზაფხულო ჯიშმა Carmen ადგილობრივ პირობებში კარგი შედეგი აჩვენა და მიმდინარე წელს უკვე 15–17 ტონა მოსავალს ველოდებით. მომდევნო წლიდან მოსავლიანობა მნიშვნელოვნად გაიზრდება და 50–60 ტონამდე ავალთ. მსხლის ეს ჯიში ივლისის ბოლოდან აგვისტოს მეორე ნახევრამდე პერიოდში მწიფდება. ამის შემდეგ მსხლის შენახვაც შეიძლება სამაცივრე მეურნეობაში ორ თვემდე ვადით. ბაღი 2016 წელს ინტენსიური ტექნოლოგიით გაშენდა. ჰექტარზე 4 500–დან 6 000–მდე ნერგი დავრგეთ და წვეთოვანი სარწყავი სისტემით აღვჭურვეთ“, – აღნიშნა მებაღემ.
ირაკლი მერკველიშვილის თქმით, მსხლის ბაღის გაშენების გადაწყვეტილება ადგილობრივ ბაზარზე თანამედროვე ჯიშის, ხარისხიანი მსხლის დეფიციტმა მიაღებინა. მისივე თქმით, ამ კულტურის გაშენებას ბევრი ერიდება, ვინაიდან მსხალი რთულ მცენარედ მიიჩნევა. მსხალს ისეთი დაავადებები ახასიათებს, როგორიცაა ბაქტერიციდული დამწვრობა, ხალიანობა, ასევე პრობლემებს ქმნიან მავნებლებიც. თუმცა, მცენარის დაცვის ინტეგრირებული სისტემის მეშვეობით ამ პრობლემებთან გამკლავება შესაძლებელია.
მებაღე ფასებითაც კმაყოფილია: „მსხლის ფასი სტაბილურია – ადგილზე 3–4 ლარი კილოგრამზე. ეს კი საკმაოდ მომგებიანია ადგილობრივი მწარმოებლისთვის. საბითუმო ბაზარზე ასეთი მსხალი 4,5 ლარი ღირს“.
მერკვილიშვილი ამბობს, რომ კომპანია ამით არ კმაყოფილდება და მიმდინარე წელს 1 ჰა ფართობზე გააშენეს საშემოდგომო მსხლის ჯიში აბატი.
east-fruit.com