თბილისში, საქართველოში მცხოვრებ სომხებთან რეპატრიაციაზე საუბარი ჩემთვის ცოტა უცნაურად ჟღერს, – ასე უპასუხა საქართველოში ვიზიტის დროს, სომხურ დიასპორასთან შეხვედრისას დასმულ ერთ-ერთ კითხვას სომხეთის პრემიერ-მინისტრმა, ნიკოლ ფაშინიანმა.

ფაშინიანს ერთ-ერთმა სტუდენტმა, რევიკ კარაპეტიანმა შემდეგი კითხვით მიმართა:

„მე დავიბადე ჯავახეთში, ვარ სტუდენტი. ვამთავრებ მაგისტრატურას და მაინტერესებს ძალიან მნიშვნელოვანი საკითხი რეპატრიაციასთან დაკავშირებით. ელოდებით თუ არა სომხების ე.წ. თვითნებურად დაბრუნებას სამშობლოში, როგორც იყო 1940-იან წლებში. რა პროფესიის ადამიანებისთვის არის პროგრამები, თუ თქვენ იმედს ამყარებთ საზღვარგარეთ მცხოვრებ სომხებზე, რომლებსაც უყვართ სამშობლო”.

როგორც ფაშინიანმა კითხვის პასუხად აღნიშნა, საქართველოში მცხოვრებ სომხებთან მიმართებაში რეპატრიაციაზე საუბარი „ცოტა უცნაურად ჟღერს”.

„ვეცდები, ჩემი პასუხი იყოს პოლიტკორექტული. როცა ვხვდები, მაგალითად, გერმანიის სათვისტომოს და იქ საუბარია რეპატრიაციაზე, ეს ჩემთვის გასაგებია. სიმართლე გითხრათ, თბილისში, საქართველოში მცხოვრებ სომხებთან რეპატრიაციაზე საუბარი ჩემთვის ცოტა უცნაურად ჟღერს.

მე მივიჩნევ, რომ თბილისელი სომხები ცხოვრობენ სამშობლოში. საერთოდ, საქართველოში მცხოვრებმა სომხებმა უნდა იამაყონ, რომ საქართველოს მოქალაქეები არიან. ეს ძალიან მნიშვნელოვანი სტატუსია და საჭიროა, ჩვენ დაინტერესებული ვიყოთ, რომ საქართველო იყოს ძლიერი, მდგრადი, განვითარებული სახელმწიფო. საქართველოც უნდა იყოს დაინტერესებული, რომ სომხეთიც იყოს ძლიერი, მდგრადი, განვითარებული სახელმწიფო”, – აღნიშნა ნიკოლ ფაშინიანმა.

გაზეთი „ბანკები და ფინანსები“