საქართველოში ლურჯი მოცვის მოსავლის აღება რამდენიმე დღეში დასრულდება. ადგილობრივი მწარმოებლების აზრით, 2021 წლის სეზონი ივნისის ბოლოს რუსეთში ექსპორტთან დაკავშირებული პანიკის და ფასების ვარდნის მიუხედავად, მთლიანობაში, წარმატებული იყო.

პირველი პოზიტიური ფაქტორი სეზონის დასაწყისში მაღალი ფასები იყო. საქართველოში ლურჯი მოცვის ღირებულება დიდწილად რუსულ ბაზარზეა დამოკიდებული. 2021 წლის დასაწყისში რუსეთში ლურჯი მოცვის ღირებულება  6-8 დოლარამდე გაიზარდა.

ზოგადად, სეზონის დასაწყისი მაღალი ფასებით ხასიათდება, თუმცა, ამ წელს ზრდა მოსალოდნელზე მაღალი იყო, რისი მიზეზიც მაღალი მოთხოვნა გახდა.

შემდეგ, ივნისის ბოლოს ერთი კვირის მანძილზე ფასები 2-3 დოლარამდე დაეცა. თავისთავად, არც ეს იყო მოულოდნელი, რადგანაც ამ დროს ლურჯი მოცვის მოსავლის აღება სერბეთში და ბელარუსში იწყება, თუმცა ამ შემთხვევაში ვარდნა უფრო ღრმა აღმოჩნდა - პირველ რიგში რუსეთის ხილ-ბოსტნეულის იმპორტის წესების მნიშვნელოვანი გართულების გამო.

ლურჯი მოცვის პლანტაციის მფლობელი და ტრეიდერი გია ჯღარკავა მიიჩნევს, რომ ამ წელს ბევრ მწარმოებელს, განსაკუთრებით მცირეს, არარეალისტური მოლოდინები ჰქონდა.

„ფერმერები არ უნდა ელოდონ იმას, რომ ფასები მთელი წლის მანძილზე მაღალი იქნება. ჩვენი ფერმერები და გლეხები მაღალ ფასებს თავიანთი პროდუქციის შესყიდვაში მაშინაც კი მოითხოვდნენ, როდესაც მსოფლიო ბაზარზე ფასები უკვე შემცირებული იყო. ამიტომაც მე შევწყვიტე მათგან პროდუქტის შესყიდვა და ძირითადად მსხვილ მწარმოებლებთან ვმუშაობ - მათ საერთაშორისო ბაზარზე შექმნილი მდგომარეობა კარგად იციან, ამიტომაც რეალისტური მოლოდინები აქვთ“, - განაცხადა მან.

სადღეისოდ, რუსეთში მოცვის საბითუმო ფასი 3-4 დოლარია, სავარაუდოდ, მომავალ წელს ეს მაჩვენებელი კიდევ უფრო დაბალი იქნება - რუსული ბაზრის მოთხოვნილება დაკმაყოფილებულია, საქართველოში კი ლურჯი მოცვის პლანტაციები ფართოვდება.

ამ მდგომარეობიდან გამოსავალი ერთია – ექსპორტის დივერსიფიცირება. ამ კუთხით კომპანია  „Georgian Blue“-სთვის 2021 წელი წარმატებული აღმოჩნდა, რომელმაც ამ წელს ლურჯი მოცვი გერმანიაში და ჰოლანდიაში გაყიდა.

„ჩვენს ბაღებში სეზონი ჯერ ბოლომდე ჯერ არ დასრულებულა, მაგრამ შემიძლია გითხრათ, რომ ჩვენთვის ეს წელი წარმატებული იყო, რადგანაც ჩვენ სხვადასხვა ბაზრებზე გავედით, და სამომავლოდ ამ მიმართულებებზე ექსპორტის ზრდას ვგეგმავთ“, - განაცხადა კომპანიის დირექტორმა რატი მორჩილაძემ.

კიდევ ერთმა მსხვილმა კომპანიამ „მწვანე ველმა“ ლურჯი მოცვის ექსპორტი ბულგარეთში დაიწყო.

east-fruit.com