„მომხმარებელთა კლება მარტიდან შეინიშნებოდა, განსაკუთრებით სერვისის მიმართულებით. მომხმარებელთა რაოდენობის შემცირებას დაემატა საგანგებო მდგომარეობის გამოცხადება. თუ ავიღებთ წინა წლის ივნისს, ამ შემთხვევაში მაჩვენებელი გაზრდილია, თუმცა, განვლილი ექვსი თვის მიხედვით, საერთო ჯამში, გაყიდვების მაჩვენებელი დაახლოებით 30%-ით არის შემცირებული“, - ამის შესახებ „კომერსანტს“ „ლექსუსში“ განუცხადეს.

კომპანიაში აღნიშნავენ, რომ ავტომობილების ფასი ლარის გაუფასურების ფონზე გაზრდილია, რადგან შესყიდვისა და გაყიდვის ფასები იანგარიშება დოლარში, მიმდინარე კურსის ექვივალენტით.

„ამ ეტაპისთვის ბოლო ავტომობილი გუშინ გაიყიდა. ნელ-ნელა ვუბრუნდებით ჩვეულ რითმს და ვიმედოვნებთ, ეს პროცესი კიდევ უფრო დაჩქარდება. საქართველოში ყველაზე მოთხოვნადი Lexus-ის LX, RX და NX მოდელებია. ჩვენს შემთხვევაში დაფიქსირდა რამდენიმე ფაქტი, როცა ყიდვის გადაწყვეტილებიდან ავტომობილის გაყვანამდე პერიოდი ჩვეულებრივზე დიდხანს გაგრძელდა. საბედნიეროდ, ჯერ არ გვქონია შემთხვევა, რომ მომხმარებელს შეკვეთილი ავტომობილი ვერ შეეძინოს (პანდემიის, ან სხვა მიზეზის გამო). რაც შეეხება ფასებს, ავტომობილების შესყიდვისა და გაყიდვის ფასები იანგარიშება დოლარში, მიმდინარე კურსის ექვივალენტით. რა თქმა უნდა, ლარის გაუფასურებამ გამოიწვია პროდუქტის თვითღირებულების ზრდა, რამაც მის საბოლოო ფასზეც იქონია გავლენა. პანდემიის შემდეგ, დაფიქსირდა რამდენიმე შესყიდვა განვადებით. ჩვენი დაკვირვებით, ბანკებისგან სესხის გაცემის პროცედურა გამკაცრებულია და სტანდარტულთან შედარებით, სესხის დამტკიცებას მეტი დრო სჭირდება“, - აცხადებენ „ლექსუსში“.

„ლექსუსში“ მომხმარებლებისა და თანამშრომლების უსაფრთხოებისთვის, საკარანტინო პერიოდამდე ერთი კვირით ადრე კომპანია დისტანციურ მუშაობაზე გადავიდა, რაც ორგანიზაციაზე საკმაოდ რთულად აისახა.

„ჩვენ თავიდანვე გავიაზრეთ საფრთხეები და სოციალური პასუხისმგებლობა, ამიტომ რამდენჯერმე ჩავატარეთ სადეზინფექციო სამუშაოები, როგორც შოურუმსა და სერვის ცენტრში, ისე ოფისებში. ლექსუსის ფილოსოფია სწორედ მომხამრებელზე ზრუნვაა, ამიტომ ყველა მომხმარებელი ჩვენთან ვიზიტისას უსაფრთხოდ უნდა გრძნობდეს თავს. სრულად ვითვალისწინებთ, როგორც ჩვენი მთავრობის, ისე ჯანდაცვის მსოფლიო ორგანიზაციის რეკომენდაციებს. ამასთან, ავტოსერვისით სარგებლობისას, შემოსულ ავტომობილს უტარდება სრული დეზინფექცია, რაც გულისხმობს შეხების ძირითადი წერტილების სპეციალური ანტიბაქტერიული ხსნარით დამუშავებას.

ჩვენი მომხმარებლებისა და თანამშრომლების უსაფრთხოებისთვის, საკარანტინო პერიოდამდე ერთი კვირით ადრე გადავედით დისტანციურ მუშაობაზე, რაც საკმაოდ რთულად აისახა ჩვენზე რამდენიმე მიზეზის გამო:

• საქართველოში ონლაინ გაყიდვები ნაკლებად გავრცელებულია. ამ ფაქტს კიდევ უფრო ართულებს ავტომობილის ყიდვის შემთხვევა, რადგან გადაწყვეტილების მიღებამდე მომხმრებელი გადის სასიამოვნო პროცესს. ეს პროცესი დისტანციურ რეჟიმში იმ ემოციურ ეფექტს არ ახდენს, რასაც, მაგალითად, შოურუმში ვიზიტი და ავტომობილის საცდელი მართვისას განცდილი შეგრძნებები.
• ჩვენ არ ვიყავით სრულად მზად ონლაინ გაყიდვებისთვის, თუმცა, მოვახერხეთ სწრაფად ადაპტირება მოცემულ გარემოებებთან. მომხმარებლებს ვთავაზობთ ვირტუალურ ტურს, რომლის მეშვეობითაც შეუძლია სახლიდან გაუსვლელად დაათვალიერონ ჩვენი შოურუმი. სოციალური მედიის საშუალებით კი შეუძლიათ მიიღონ ინფორმაცია ფასებისა და სიახლეების შესახებ“, - განმარტეს კომპანიაში.

ნინო თამაზაშვილი