საქართველოში ოჯახების ინტერნეტთან წვდომა ბოლო ერთ წელიწადში 2.4%-ით – 86.1%-მდე გაიზარდა. ქალაქებში ზრდის ტემპმა 0.7%-ს, ხოლო სოფლებში 4.4%-ს მიაღწია, მაგრამ სხვაობა კვლავ 10 პროცენტზე მეტია. საქალაქო დასახლებებში ინტერნეტთან წვდომა შინამეურნეობების 91.4%-ს გააჩნია, სასოფლო დასახლებებში - 78.9%-ს. სტატისტიკა მოიცავს როგორც საკაბელო, ასევე მობილურ ინტერნეტს. გამოკვლევის დროს, კომპიუტერით უზრუნველყოფილი ოჯახების წილი 63.8%-ს შეადგენდა. ამის შესახებ ინფორმაციას საქსტატი ავრცელებს.
რეგიონების მიხედვით ინტერნეტთან წვდომა ყველაზე მაღალი თბილისსა და აჭრაშია. ის 94%-ს აღემატება, რაჭაში კი მხოლოდ 60%-ს შეადგენს.
გამოკვლევის შედეგების მიხედვით, ბოლო 3 თვის განმავლობაში ინტერნეტით ისარგებლა 6 წლის და უფროსი ასაკის მოსახლეობის 77.4 პროცენტმა, რაც 3.4 პროცენტული პუნქტით აღემატება წინა წლის ანალოგიურ მაჩვენებელს. საქალაქო დასახლებებში აღნიშნული მაჩვენებელი 83.8 პროცენტით, ხოლო სასოფლო დასახლებებში 67.6 პროცენტით განისაზღვრა.
15-29 წლის ასაკობრივ ჯგუფში ინტერნეტის მოხმარების მაჩვენებელი 97.8%-ს აღწევს, 60 წელს გადაცილებულ პირთა ჯგუფში კი მხოლოდ 40%-ს.
15 წლის და უფროსი ასაკის მოსახლეობიდან, რომლებიც ბოლო 3 თვის განმავლობაში სარგებლობდნენ ინტერნეტით, 91.7 პროცენტი ინტერნეტს ყოველდღე ან თითქმის ყოველდღე მოიხმარდა, 7.2 პროცენტი - კვირაში ერთხელ მაინც (თუმცა არა ყოველდღე), 1.1 პროცენტი კი - უფრო იშვიათად.
გამოკვლევის შედეგების მიხედვით, 15 წლის და უფროსი ასაკის, ბოლო სამ თვეში ინტერნეტის მომხმარებელ მოსახლეობაში, ინტერნეტის გამოყენების ძირითად მიზნებს წარმოადგენს სოციალური ქსელების გამოყენება (95.3%), ინტერნეტ (აუდიო/ვიდეო) კავშირი (94.7%), ონლაინ ახალი ამბების/გაზეთების/ჟურნალების წაკითხვა (54.3%), ჯანმრთელობის საკითხებზე ინფორმაციის მოძიება (50.7%), ელ. ფოსტის მიღება/გაგზავნა (46.6%), საქონლისა და მომსახურების შესახებ ინფორმაციის მოძიება (38.5%), ინტერნეტ ბანკინგით სარგებლობა (36.4%), პროგრამული უზრუნველყოფის პროდუქტის (გარდა თამაშებისა) ჩამოტვირთვა (17.0%) და სამუშაოს ძიება ან სამუშაოსთვის აპლიკაციების გაგზავნა (12.3%).