გასულ კვირაში საქართველოში ღია გრუნტზე მოყვანილი წითელი პომიდვრის ფასი გაორმაგდა. 5 აგვისტოსთვის საშუალო აბითუმო ფასი 1,6 ლარს შეადგენდა, ნაცვლად ერთი კვირით ადრე დაფიქსირებული 0,8 ლარისა. რამ იქონია ბაზარზე გავლენა?
შიდა ქართლის პომიდვრის მწარმოებლები EastFruit–თან საუბარში ამბობდნენ, რომ მაღალ ფასებს ჯერ კიდევ ივლისის დასაწყისში ელოდნენ.
EastFruit–ის მონიტორინგის შედეგების თანახმად, ღია გრუნტზე მოყვანილი წითელი ტომატის ფასი ბოლო სამი წლის განმავლობაში აგვისტოს დასაწყისში უფრო მაღალი იყო, ვიდრე თვის ბოლოს. ეს იმიტომ ხდება, რომ ამ პროდუქტზე მოთხოვნა ამ პერიოდში დაბალია. ქვემო ქართლში და კახეთში პომიდვრის მოსავლის აღება აგვისტოში მთავრდება და ამის შემდეგ ძირითადი მიმწოდებელი ხდება შიდა ქართლი. ამ რეგიონში სეზონი ახლა დაიწყო და ჯერ მიწოდება დაბალია.
ფერმერების მოლოდინით, მას შემდეგ, რაც ტომატის სეზონი პიკს მიაღწევს, აგვისტოს ბოლოს, ფასები დავარდება, თუმცა გასული წლის ანალოგიური პერიოდის მაჩვენებელზე მაღალი მაინც იქნება, რადგან წელს ნაკლები პომიდორი დაირგო.
იოსებ ფარეხელაშვილი შიდა ქართლში პომიდვრის ერთ–ერთი მწარმოებელია. მიმდინარე სეზონზე მან მხოლოლდ 2,2 ჰა ფართობზე გააშენა ვარდისფერი პომიდორი. 2020–ში მას 10 ჰა ფართობზე ჰქონდა წითელი პომიდორი გაშენებული, მაგრამ მაშინ ძალიან დაბალი ფასი იყო და სეზონი ზარალით დაასრულა. შარშანდელი წარუმატებლობის გამო მან გადაწყვიტა, საერთოდ არ დაერგო წითელი პომიდორი.
კიდევ ერთმა შიდა ქართლელმა მეწარმემ ლევან გურასპაშვილმა წელს ასევე ნაკლები პომიდორი დარგო. მან პომიდვრის რეალიზაცია რამდენიმე დღის წინ დაიწყო და მინდორზე 1 კგ პომიდორში 1,3 ლარს უხდიან. ისიც ელოდება, რომ თვის ბოლოს ფასი დავარდება, თუმცა არც ისე მკვეთრად, როგორც ეს გასულ წელს მოხდა.
EastFruit