ქართულ ბაზრებში უკვე გამოჩნდა ფეიხოას ნაყოფი, რომელიც კლიმატური პირობების გათვალისწინებით, მხოლოდ დასავლეთ საქართველოში მოდის. როგორც ფერმერები East fruit-თან საუბრისას აღნიშნავენ, წელს მოსავლის რაოდენობა შემცირდა, ამის მიზეზი კი სექტემბერ-ოქტომბერში ნალექის ნაკლებობა იყო. მათი თქმით, მიმდინარე სეზონზე ფეიხოას მოსავალი 3-ჯერ ნაკლები იქნება, ვიდრე გასულ წელს.
როგორც წესი, აღნიშული ხილი ბუნებრივ პირობებში იზრდება, ამიტომ, ფერმერების აზრით, მოსავლის დიდი რაოდენობის მისაღებად აუცილებელია სარწყავი სისტემა.
ფერმერმა გიორგი რაფავამ ფეიხოა 12 ჰექტარზე დასავლეთ საქრართველოში გააშენა. მისი ბაღი ჯერ მხოლოდ 3 წლისაა, სრული მოსავლის მისაღებად კი 8 წელია საჭირო. როგორც ფერმერი განმარტავს, მისი მეურნეობა წვეთოვანი სარწყავი სისტემით არის აღჭურვილი, თუმცა წელს ჭა, საიდანაც წყალი მოედინებოდა, დაშრა. შედეგად, თუ 2020 წლის სეზონზე ფერმერს 5-6 ტონა მოსავალი უნდა აეღო, უნალექო ამინდის გამო, თითქმის, 2 ტონამდე შემცირდა.
ამას ემატება ისიც, რომ წელს ფეიხოაზე მოთხოვნა გაიზარდა. როგორც გიორგი რაფავა ამბობს, მას რამდენჯერმე დაუკავშირდნენ ფეიხოას შეძენის მსურველები, თუმცა ის წელს ნაყოფის გაყიდვას არ აპირებს. გეგმავს, რომ მოსავალი ალკოჰოლის წარმოებისთვის გადაამუშაოს. როგორც გიორგი რაფავა განმარტავს, ის და მისი პარტნიორები ბაზრის შესწავლის შემდეგ მივიდნენ დასკვნამდე, რომ ფეიხოას არაყზე მოთხოვნა დიდია. ნახევარი ლიტრი ფეიხოას არყის ღირებულება 15 -დან 20 ლარამდე მერყეობს. გიორგი რაფავას თქმით, თუ მომხმარებელს მხრიდან პროდუქტის მიმართ ინტერესი კიდევ უფრო გაიზარდა, წარმოებას სწორედ ამ მიმართულებით განავითარებს.
ჭაბუკი ხუფენიას ფეიხოას ბაღი სოფელ დარჩელში 1 ჰექტარზე აქვს გაშენებული. გარდა საკუთარი წარმოებისა, ფერმერი ადგილობრივი მოსახლეობისგანაც ყიდულობს ფეიხოას, შემდეგ კი იმ მოვაჭრეებზე ყიდის, რომლებსაც ხილი ექსპორტზე გააქვთ. ჭაბუკი ხუფენიაც ყურადღებას წლევანდელ მცირე მოსავლიანობაზე ამახვილებს და ამბობს, რომ პროდუქტზე მოთხოვნა დიდია. ამ სეზონზე იგი ადგილობრივი მოსახლეობისგან 50-დან 100 ტონამდე ფეიხოას ყიდვას გეგმავს.
მისი თქმით, ერთი კილოგრამი ფეიხოას შესაძენად ექსპორტიორებს 2-დან 5 ლარამდე მოუწევთ გადახდა. ეს მაშინ, როდესაც გასულ წელს ფეიხოას საექსპორტო ფასი 1-დან 3 ლარამდე მერყეობდა.
ფერმერები აღნიშნავენ, რომ საქართველოში ფეიხოას წარმოება შესაძლოა, საკმაოდ მომგებიანი ბიზნესი გახდეს, თუმცა ამისთვის მთავარი პირობა მაღალი ხარისხის ხილის წარმოებაა. ეს კი, დიდწილად დამოკიდებულია ბაღში შესრულებულ სამუშაოზე. კარგი მოსავლის მისაღებად საჭიროა: ბაღის წყლით მომარაგება, მწერებისა და მავნებლებისგან დაცვა, ასევე, მცენარის პერიოდული განაყოფიერება. ფერმერები საკმაოდ მნიშვნელოვან ეტაპად მოსავლის აღების პირობებს თვლიან. ფეიხოას ნაყოფი 2-3 კვირის განმავლობაში სამაცივრე პირობებში უნდა განთავსდეს, რადგან ვარგისიანობის ვადის გაზრდა, მოსავლის უფრო ხელსაყრელ ფასად გაყიდვის შესაძლებლობას იძლევა.
ოფიციალური მონაცემებით, 2019 წელს საქართველოში ფეიხოას მოსავალმა 1,5 ათასი ტონა შეადგინა, აქედან 362 ტონა ექსპორტირებულია, რაც მთლიანი წარმოების დაახლოებით, 24% -ია. 2019 წელს ქართული ფეიხოა ძირითადად უკრაინასა და სომხეთში გავიდა.
BPN.GE
ფეიხოა
