ასოციაცია „მომავლის ფერმერის“ თავმჯდომარე რუსუდან გიგაშვილმა, რადიო „კომერსანტის“ გადაცემა „კომერსანტის დილაში“, ქართულ ბაზარზე ფალსიფიცირებულ რძის პროდუქტების  გაზრდილ რაოდენობაზე ისაუბრა.

მისი თქმით,  ბოლო პერიოდში გააქტიურდნენ ჯგუფები, რომლებიც გარკვეული საფასურის სანაცვლოდ მსურველებს არანატურალური რძისგან რძის პროდუქტების დამზადების ტექნოლოგიის შესწავლას და მის შემდგომ რეალიზაციაში დახმარებას სთავაზობენ და ამ ყველაფერს ღიად, ე.წ. ონლაინ საგანმანათლებლო პლატფორმების საშუალებით აკეთებენ, რაც ბაზარზე ფალსიფიცირებული რძის პროდუქტების წარმოებას უწყობს ხელს.

„არსებობს ძალიან ბევრი საწარმო, რომელიც არალეგალურად მუშაობს, არც სახელმწიფოს უხდის რამეს, არც სურსათის სააგენტოში არიან დარეგისტრირებული და სადღაც გარკვეულ კუთხე-კუნჭულებში აქვთ საწარმოები და თავიანთ პროდუქციას ბაზრებში, რესტორნებში, სახაჭაპურეებსა და სწრაფი კვების ობიექტებში ყიდიან. ეს არ არის პირობითად 1 000 კილო, ეს არის ძალიან დიდი რაოდენობით ყველი, რომელსაც ჩვენ და ჩვენი შვილები მივირთმევთ.

კონკრეტულ ჯგუფებს 7.5 ლარი უჯდებათ ამ ტიპის პროდუქტის წარმოება და მინიმუმ 15 ლარად გარკვეული „ხვრელებით“ მოტყუებით აბარებენ და 100%-იან მოგებაზე მუშაობენ. რატომ აიტკივებენ სხვები თავს, როცა ასეთი ბიზნესის კეთების შანსი არსებობს. ამიტომ, სახელმწიფომ ძალიან მყისიერად უნდა გადადგას ხისტი ნაბიჯები და შეასრულოს ის რეგულაციები, რა ვალდებულებაც გვაქვს ნაკისრი ევროკავშირთან მიმართებაში“,  — აცხადებს რუსუდან გიგაშვილი.

რუსუდან გიგაშვილის თქმით აქამდე სახელმწიფომ ეს პრობლემა ვერ მოაგვარა.

„სურსათის სააგენტო თავის საქმეს აკეთებს და დადის კონტროლზე, მაგრამ იმდენი ინსპექტორი არ ჰყავთ, რომ მთელი ბაზარი გააკონტროლონ. თავის მხრივ, შემოსავლების სამსახური ცალკე დადის კონტროლზე, მაგრამ ისინი ერთად, კოორდინირებულად არ მუშაობენ,“ —  აცხადებს რუსუდან გიგაშვილი.

რუსუდან გიგაშვილი მომხმარებელს ურჩევს მოერიდოს იაფ, ქუჩაში, გარემოვაჭრეებისგან ან ბაზარში ნაყიდ რძის ნაწარმს და მყარად ეტიკეტირებული და ბრენდირებული პროდუქტი შეიძინოს, რადგან საქმე სიცოცხლეს და ჯანმრთელობას ეხება.

მოამზადა მაკა ბიბილაშვილმა