მსოფლიო ბაზარზე ნავთობის ფასი ზრდას განაგრძობს. Brent-ის მარკის ნავთობის დეკემბრის ფიუჩერსულმა ფასმა ბარელზე $81-ს, ხოლო ამერიკული მსუბუქი ნავთობის ნოემბრის ფიუჩერსულმა ფასმა $77-ს გადააჭარბა. საქართველოში საწვავის საცალო ქსელში ფასები ჯერჯერობით ძველ ნიშნულზე ნარჩუნდება, მაგრამ გაძვირება უკვე თითქმის გარდაუვალია.

„კომერსანტი“ დამატებითი ინფორმაციის მისაღებად ნავთოპროდუქტების იმპორტიორთა კავშირის თავმჯდომარეს ვანო მთვრალაშვის დაუკავშირდა. მისი თქმით ნავთობზე ფასის ზრდას მიწოდებასა და მოთხოვნას შორის არსებული დისბალანსი იწვევს. გლობალურად ეკონომიკა მოსალოდნელზე სწრაფად აღდგა, მიწოდების ზრდის დინამიკა კი არ შეცვლილა, გარდა ამისა ევროპაში ბუნებრივი გაზის ფასმა 1000 კუბურ მეტრზე $1200-ს გადააჭარბა, რაც ისტორიული მაქსიმუმია, გაზის ფასის ასეთი უჩვეულო ზრდა კი მის ნაწილობრივ ჩამანაცვლებელ ნავთობზე დამატებით მოთხოვნას აჩენს.

ვანო მთვრალაშვილის განმარტებით, ბოლო პერიოდში პლატსზე დიზელი უფრო მეტად გაძვირდა, ვიდრე ბენზინი. 1-ლი სექტემბრისთვის 1 ტონა დიზელი $592 ღირდა, დღეს ფასი $693-ს შეადგენს, რაც 17%-იან მატებას ნიშნავს. ბეზნინის ფასმა კი სექტემბერში სტაბილურობა მეტ-ნაკლებად შეინარჩუნა და ზრდის ტენდენცია მხოლოდ ოქტომბერში გამოიკვეთა და ტონაზე $747-დან $768-მდე გაიზარდა.

საქართველოში დიზელის ფასთან დაკავშირებით ნავთოპროდუქტების იმპორტიორთა კავშირის თავმჯდომარის მოლოდინი ცალსახად ნეგატიურია, თუმცა პოზიტიურ პროგნოზს ვერც ბენზინის შემთხვევაში აკეთებს, მისი თქმით მაქსიმუმ გარკვეული პერიოდი შეიძლება ფასები არსებულ დონეზე შენარჩუნდეს. მსხვილი იმპორტიორების მარაგები კი 2-3 კვირის სამყოფია.

საცალო ქსელში ფასების ზრდაზე დამატებითი გავლენა შესაძლოა ვალუტის კურსმაც მოახდინოს. ლარის მკვეთრი გაუფასურება ჯერ არ დაწყებულა, მაგრამ ბოლო პერიოდში ოქტომბერ-ნოემბერში ის თითქმის ყოველ წელს უფასურდებოდა.

მაშინაც კი თუ ფასები აღარ გაიზარდა, რისი ალბათობაც მცირეა, დღეის მდგომარეობით ის რეკორდულ მაჩვენებლად მიიჩნევა, არათუ რეგულარის ტიპის ბენზინი, პრემიუმიც კი აქამდე 3 ლარი არასდროს ღირებულა.

გიორგი ელიზბარაშვილი