გაყინულ პროდუქტზე მოთხოვნა, როგორც ადგილობრივ, ასევე საერთაშორისო ბაზარზე, ყოველდრიურად იზრდება.მიუხედავად იმისა, რომ გაყინული პროდუქტისა და კენკროვანი ხილის შენახვის პრობლემა ქვეყანას არ აქვს, ადგილობრივი ბაზარი მაინც იმპორტირებული პროდუქტით მარაგდება.იმპორტი ხორციელდება კენკროვან ხილზე,  პარალელურად კი, აღნიშნული პროდუქტი, რომელიც საქართველოში იწარმოება, ამერიკასა და სხვა ქვეყნებში დიდი რაოდენობით გადის.

 შპს „გლენბერის“ მფლობელის რაფაელ მაღალაშვილი საქართველოში სამაცივრე მეურნეობის პრობლემებზე საუბრობს და აცხადებს, რომ ქვეყანაში მისი რეალიზაცია ვერ ხერხდება, მიზეზი იმპორტირებული საქონელია.  მისი თქმით. ქვეყანაში მხარდაჭერა ადგილობრივ პროდუქტზე მეტად იმპორტირებულს აქვს.  

„სახელმწიფომ უნდა მომისმინოს და ბევრი რამ უნდა გავაკეთოთ ერთად. იმიტომ, რომ  გაყინული პროდუქცია მსოფლიოშ დღეს მოთხოვნადია. საუბაია, როგორც ბოსტნეულზე, ხილზე, ისე ცომეულზე და სხვა პროდუქციაზე. აქ ვამარაგებ მხოლოდ „აგროჰაბს“ და „ევროპროდუქტს“,  დანარჩენი ქსელები არ მოდიან თანამშრომლობაზე. ძალიან რთულია მათთან პროდუქტის შეტანა. სირცხვილია, როდესაც ამერიკაში იყიდება ჩემი პროდუქტი და აქ იმპორტირებულია. „კარფურსა“ და „გუდვილში“ უარი მივიღე, მათ  თურქეთიდან  შემოაქვთ პროდუქცია და ქართული არ უნდათ, გვეუბნებიან, რომ  კონკურენციას ვერ გაუწევს. მილიონობით ლარი ჩავდე ამ საქმეში. ადგილობრივ ბაზართან მიმართებაში დიდი გეგმები მაქვს და მინდა ეს ხელისუფლებმაც დაუნახოს. განცხადებები იმასთან დაკავშირბეით, რომ ბიზნესს დაეხმარებიან, ზოგადია და არაფრისმომცემი, რადგან ისეთი კომპანიების ხელშეწყობა  უნდა ხდებოდეს, რომელთაც ფინანსურად უჭირთ. მნიშვნელოვანია სოფლის  განვითარება მოხდეს როგორც  მეურნეობით, ასევე მრეწველობით“-აცხადებს მაღალაშვილი. 

მისივე  განმარტებით, სოფლის მეურნეობის განვითარებას  და პროდუქციის ადგილზე შექმნას, ქვეყნის მაღალ დონეზე აყვანა შეუძლია.

„4 მლნ. ადამიანის დაპურებას რა უნდა, რატომ უნდა ვმარაგდებოდეთ სხვა ქვეყნებიდან. პარალელურად, ხალხი დასაქმდება და ქვეყანას სახელი ექნება, ისევე როგორც ახლა აქვს კორონავირუსთან გამორჩეული ბრძოლით. მე მათ ამ საქმეს არ ვუკარგავ, ნამდვილად კარგი ნაბიჯებით მიდიან წინ.“-აღნიშნა მან.

 შპს „გლენბერის“ დამფუძნებლის ინფორმაციით, ქართული გაყინული ხილის მიმართ მოთხოვნა საერთაშორისო ბაზარზე იმდენად დიდია, რომ არსებული რესურსი ნაწილობრივაც ვერ აკმაყოფილებს ამ მოთხოვნებს. ბიზნესმენის აზრით, მეურნეობების განვითარება ქართული კენკრის ბიზნესის სასარგებლოდ ჩვენი  ეკონომიკისთვის მნიშვნელოვანი ინვესციტიციის შემოდინების წყაროა და ამაზე მთავრობამ უნდა იზრუნოს.

„მე ასეთ რთულ მდგომარეობაშიც ვმუშაობ და ამერიკაში მომავალ კვირასაც ვაგზავნი პროდუქციას. დიდი მოთხოვნიდან გამომდინარე მეურნეობა გავაფართოვე.  ჩემი რესურსებით დამატებითი სამრეცხაო ხაზები, დამატებითი სათბურები ავაგე, ცოტა ამინდი მიშლის ხელს და იმედია მომავალი კვირიდან განვაახლებ დატვირთულ სამუშაო განრიგს. მომავალი კვირიდან ჩამომდის ჩითილები. მილიონი ცალი  უნდა დავრგო და ეს ყველა პროდუქცია ამერიკის ბაზრისთვისაა. მე რომ ჩამოვედი, აქ მინდოდა ადგილობრივი ბაზარი განმევითარებინა და ხალხს  ჰქონოდა ადგილობრივი პროდუქტი, თუმცა, მიწევს მისი ექსპორტზე გატანა, როგორც ამერიკაში, ასევე შვეიცარია, ისრაელი და იაპონიაში. რატომ არ უნდა ვამარაგებდე აქ, მთლიან ადგილობრივ ბაზარს. „-ამბობს  რაფაელ მაღალაშვილი.

ნათია ლომიძე