საქართველოს ხელოვნების სასახლეს ქანდაკების შეძენა სურს, რომლის ღირებულებაც 1800 დოლარია. ნამუშევრის მესაკუთრე პრესტიჟული ბრიტანული არტ სალონია, რომელიც მხოლოდ ზუსტი ისტორიის მქონე ნამუშევრების მფლობელია და საიტებზე განთავსებული დეტალური ინფორმაციაც ადასტურებს ექსპონატების ექსკლუზიურობას.

სსიპ ,,ხელოვნების სასახლე - კულტურის ისტორიის მუზეუმი“ წარმოადგენს საქართველოს ერთ-ერთ უდიდეს სიძველეთსაცავს და მის უმთავრეს მოვალეობას წარმოადგენს როგორც მის ფონდებში დაცული მასალის დაცვა/მოვლა, ასევე ახლადშეძენილი უნიკალური მასალით მათი შევსება. სწორედ აღნიშნული ფუნქციის განსახორციელებლად მუზეუმი დადგენილი წესით მუდმივად ახორციელებს სამუზეუმო ექსპონატების შეძენას.

მუზეუმმა ამჯერად უნდა მოახდინოს ბრიტანული ონლაინ გალერეის https://www.artemission.com მიერ გასაყიდად გამოტანილი, ტერაკოტას მასალისგან შექმნილი ახალგაზრდა მამაკაცის ბიუსტის შესყიდვა.

ექსპონატი მსოფლიო ხელოვნების გამორჩეულ ნიმუშს წარმოადგენს. ის უნიკალური და იშვიათია როგორც მხატვრული, ასევე ისტორიული ღირებულებით.

„ბიუსტი მიეკუთვნება ჩვ. წ. აღ-მდე VI -II საუკუნის საბერძნეთს. ეს ის პერიოდია, როდესაც უდიდესი კავშირი და მსგავსება არსებობდა ბერძნულ და კოლხურ კულტურებს შორის.

ისინი ერთმანეთთან მჭიდრო კავშირში არიან, რის გამოც აღნიშნული უიშვიათესი ხელოვნების ნიმუშის მეცნიერული შესწავლა აუცილებლად მიგვიყვანს კოლხეთის ისტორიის უფრო ღრმა კვლევასთან. ყოველივეს გათვალისწინებით მისი შეძენით მოხდება, როგორც ფონდების საგაძურის მრავალფეროვნების შევსება, ასევე მკვლევარებისა და დამთვალიერებლების ინტერესის ზრდა.

გამომდინარე ზემოაღნიშნულიდან, გთხოვთ, „გამარტივებული შესყიდვის კრიტერიუმების განსაზღვრისა და გამარტივებული შესყიდვის ჩატარების წესის დამტკიცების თაობაზე“ სახელმწიფო შესყიდვების სააგენტოს თავმჯდომარის 2015 წლის 17 აგვისტოს #13 ბრძანებით დამტკიცებული წესის მე-3 მუხლის პირველი პუნქტის „ა“ ქვეპუნქტისა და მე-5 მუხლის პირველი პუნქტის საფუძველზე, მოგვცეთ თანხმობა, სახელმწიფო შესყიდვების გამარტივებული შესყიდვის საშუალებით განვახორციელოთ ზემოაღნიშნული ბიუსტის შეძენა“,  — აღნიშნულია მუზეუმის დირექტორის გიორგი კალანდიას მიერ სსიპ ,,სახელმწიფო შესყიდვების სააგენტოს“ თავმჯდომარის ლევან რაზმაძისთვის მიწერილ წერილში.