სამედიცინო სფეროში მუდმივი პრობლემების გამო, 2019 წლის მაისში ქვეყანაში საქართველოს სამედიცინო ტურიზმის საბჭო შეიქმნა.პროექტი მიზნად საქართველოში სამედიცინო ტურიზმის ინდუსტრიის განვითარებისა და პოპულარიზაციის ხელშეწყობას ისახავს.აქვს თუ არა სამედიცინო ტურიზმს სამომავლო პერსპექტივა საქართველოში და რა გამოწვევები არსებობს ამ მიმართულებით ბაზარზე, აღნიშნულ თემაზე ,,კომერსანტის დილაში“ საქართველოს სამედიცინო ტურიზმის საბჭოს პრეზიდენტმა, პაატა რატიანმა ისაუბრა.
მისი ინფორმაციით, იდეა გაჩნდა მას შემდეგ რაც ძირითადმა მოთამაშეებმა, ინდუსტრიაში გამოცდილების მიღების შემდეგ, საზღვრებს გარეთ მარკეტინგული კამპანია საქართველოში უცხოელი სამედიცინო ტურისტების მოზიდვის მიზნით დაიწყეს.
„ქართველი პაციენტები ძირითადად საერთაშორისო სამედიცინო მომსახურებას იყენებდნენ. ახლა ჩვენი ქვეყანა იქნება ამ ტიპის ტურისტული ცენტრი. ბოლო 2 ათწლეულია უცხოეთში სამედიცინო ტურიზმის ინდუსტრია ვითარდება. რეგიონში თურქეთი გამოირჩევა. ქართველი პაციენტების უმრავლესობა მიემგზავრება თურქეთში ან ევროპის ქევყნებში. ჩვენ დავინახეთ ამ სფეროში ჩვენი შესაძლებლობა, რომ მოვიზიდოთ კავკასიიდან და ევროპიდან პაციენტები საქართველოში.“-ამბობს რატიანი.
საქართველოს სამედიცინო ტურისზმის საბჭოს პრეზიდენტის თქმით,სამედიცინო ტურიზმის იდეა კარგია, მაგრამ პროცესი არის საკმაოდ რთული და კომპლექსური. პირველ ეტაპზე, 2-3 წლის განმავლობაში, მთავარი ამოცანა იქნება სხვა ქვეყნებისთვის ცნობადობის გაჩენა.
რატიანის თქმით, პირველად ქართული ტურიზმის ისტორიაში გაჩნდება სამედიცინო კომპონენტი, ყველა იმ პავილიონზე, ძირითად სამიზნე ბაზრებზე, სადაც საქართველოა წარმოდგენილი ტურიზმის ეროვნული ადმინისტრაციისა და სხვადასხვა მოთამაშეების სახით, სამედიცინო საბჭოც წარსდგება, სამედიცინო ბაზრით, ეს ეხება როგორც კლინიკებს ასევე გამაჯანსაღებელ ცენტრებს.
პაატა რატიანი იმ კონკრეტული ხაზებზეც საუბრობს, სადაც საბჭო, სამედიცინო ტურიზმის მიმართულებით აქცენტის გაკეთებასაც აპირებს და კონკურენტუნარიანია.
„აქცენტი კეთდება ველნეს გამაჯანსაღებელ მიმართულებაზე, სადაც გარკვეული იმიჯი უკვე აქვს ქვეყანას შექმნილი. ჩვენს კურორტეზე ცნობადობა მაღალია. ასევე ის ვიწრო მიმართულებები,რომელიც საკმაოდ ცნობილია, დენტალური, თმის გადანერგვა, ესთეტიური მედიცინის სერვისები და რეპროდუქტოლოგიური მკურნალობა.
სტრატეგია უნდა იყოს მუდმივ რეჟიმში განახლებადი. მსოფლიო ამ კუთხით ძალიან დინამიურია. სწორი სტრატეგიის პირობებში ცნობადობის ამაღლებას მოჰყვება კონკრეტული სფეროების სანდოობა გარე ბაზარზე.“-ამბობს რატიანი და საქართველოსა და უცხო ქვეყნის სამედიცინო ბაზრებს შორის არსებულ კონკურენტუნარიანობასაც უსვამს ხაზს.
„ინდოეთს აქვს სტრატეგია, რომ შემოვიდეს პოსტსაბჭოთა სივრცეში, ასევე საქართველოშიც. ისინი ხსნიან, თუ რატომ უნდა იმკურნალოს პაციენტმა ინდოეთში. მათი ძირითადი არგუმენტია, რომ ინდოეთში ძვირადღირებულ პროცედურებს შეღავათიან ფასში ჩაიტარებენ.“-აღნიშნავს რატიანი.
მისი განცხადებით, რეგიონში საქართველოს ძირითადი კონკურენტი თურქეთია.
„ თურქეთთან უპირატესობაშიც ვართ, მეორე კატეგორის კლინიკებით. მაგალითად, ის სეგმენტი, რომელიც ვერ ახერხებს მომსახურების მიღებას თურქეთის პირველი კატეგორიის კლინიკებში და იძულებულია არჩევანი გააკეთოს მეორე კატეგორიის კლინიკაზე, სადაც მომსახურებას უწევენ ლოკალური განათლების მქონე თურქი ექიმები, ამ სეგმენტზე საქართველო შეიძლება იყოს კონკურენტუნარიანი, ჩვენ რიგ მიმართულებაში გვყავს საკამაოდ ხარისხიანი ევროპული და ამერიკული განათლების მქონე ექიმები.“-„ამბობს რატიანი.
მისი თქმით სამედიცინო ტურიზმი, ადგილობრივ ბაზარსაც გააძლიერებს. კლინიკა რომელსაც აქვს საერთაშორისო აღიარება. ქართველი პაციენტშიც ნდობას აღძრავს.
„სწორი სტრატეგიის პირობებში, ცნობადობის გაჩენას მოჰყვება საიმედოობის გაჩენა გარე ბაზრებზე. ჩვენი მთავარი მიზანი არის შევქმნათ მოთხოვნა საქართველოზე კონკრეტულ ბაზრებზე. სამედიცინო ტურიზმის გაძლიერებას თან ახლავს, დამატებითი შემოსავლები ამ პაციენტებიდან. ამ სექტორის განვითარებასთან ერთად ვიღებთ, უამრავ მყისიერ ბენეფიტებს, ეს გაგვაძლიერებს ასევე შიდა ბაზარზეც, რაც ქართველი პაციენტისთვის ნდობის გაძლიერებაში გამოიხატება. კლინიკას,რომელსაც გააჩნია საერთაშორისო გამოცდილება და მუშაობს ამ კუთხით, ჰყავს უცხოელი პაციენტები, ბევრად უფრო სანდოა ადგილობრივი პაციენტისთვის და ის გადინება, რომელიც, ბოლო წლებში იყო ამ მიმართულებით, დარჩება და მოხმარდება ჩვენს ქვეყანას.“-ამბობს რატიანი.
მოამზადა ნათია ლომიძემ