აშშ-ის მიერ საქართველოს მთავრობისთვის სანქციების დაწესებაც კონგრესმენი დენ ქრენშოუც მიემხრო.დენ ქრენშოუ წარმომადგენელთა პალატის წევრია ტეხასის შტატის მეორე ოლქიდან, წარმოადგენს რესპუბლიკურ პარტიას.
Netgazeti-ს ინფორმაციით, ქრენშოუმ განათლება ტაფტსისა და ჰარვარდის უნივერსიტეტებში მიიღო. მსახურობდა აშშ-ის შეიარაღებულ ძალებში. 2012 წელს, ავღანეთში ყოფნისას, დაკარგა მარჯვენა თვალი. მიღებული აქვს „ალისფერი გულის“ (Purple Heart) და სხვა ჯილდოები. იყო კონგრესმენ პიტ სეშინსის საკანონმდებლო ასისტენტი სამხედრო საკითხებში.ქრენშოუ პალატაში 2018 წელს აირჩიეს. იგი ამჟამად პალატის სამშობლოს დაცვისა და ბიუჯეტის კომიტეტების წევრია.
საქართველოს მთავრობისთვის სანქციების დაწესებას ამჟამად 7 მომხრე ჰყავს.
შეგახსენეთ,ნავთობისა და გაზის ამერიკული კომპანია საქართველოში Frontera Resources-ის ხელმძღვანელმა ზაზა მამულაიშვილმა ამერიკელი კონგრესმენების მხრიდან ამერიკული ინვესტიციების მიმართ დამოკიდებულებაზე მორიგი წერილის შესაძლო მიღებაზე „კომერსანტთან“ რამდენიმე დღის წინ ექსკლუზიურად ისაუბრა. ვრცლად Frontera Resources-ის ხელმძღვანელ ზაზა მამულაიშვილთან ინტერვიუს „კომერსანტი“ უახლოეს საათებში შემოგთავაზებთ.
ბოლო ორ თვეში საქართველოს მთავრობისთვის აშშ-ს კონგრესმენების მიერ გამოგზავნილ წერილებში გამოთქმული იყო შეშფოთება მიმდინარე მოვლენების, აქციების დაშლის, პროპორციული სისტემის ჩაგდების და ოპოზიციონერი პოლიტიკოსების დევნის გამო და აღნიშნული იყო, რომ საქართველოსა და ამერიკის პარტნიორობა შესაძლოა კითხვის ნიშნის ქვეშ დადგეს.
აშშ-ის კონგრესის რესპუბლიკელმა წევრმა მარკუეინ მალინმა საქართველოს პრემიერ-მინისტრს გიორგი გახარიას ღია წერილით 13 იანვარს მიმართა. „ამერიკული და ევროპული ბიზნესინტერესები საქართველოში შევიწროებასა და ექსპროპრიაციის მიზნით, თავდასხმებს დაექვემდებარნენ. ამის შესანიშნავი მაგალითია ნავთობისა და გაზის კომპანია Frontera Resources ტეხასიდან.“ - წერდა კონგრესმენი.