„გარდა იმისა, რამდენად აქვს ამა თუ იმ სამშენებლო კომპანიას მუშაობის მომართვა, მეორე მნიშვნელოვანი ფაქტორი არის რამდენად აქვს ფინანსური შესაძლებლობა, რომ სახელმწიფოს მიერ დავალებული სამუშაოები შეასრულოს. ჩვენ არ ვსაუბრობთ მარჟაზე ან მოგების გაზრდაზე, ვსაუბრობთ ელემენტარულ შესაძლებლობაზე - რა ვალდებულებაც აქვს კომპანიას აღებული ის შეასრულოს. სხვა შემთხვევაში ფიზიკურად ვერ მოხდებოდა ამ შესაძლებლობის განხორციელება, ამიტომ საქართველოს მთავრობის გადაწყვეტილება მნიშვნელოვანი იყო“, - ასე აფასებს ინფრასტრუქტურის მშენებელთა ასოციაციის დირექტორი ანა საბახტარიშვილი საქართველოს მთავრობის მიერ ინფრასტრუქტურული პროექტებისთვის კურსის დაზღვევის შეთავაზებას. იგი მიღებულ გადაწყვეტილებას პოზიტიურს უწოდებს და ამბობს, რომ დადგენილებას ინფრასტრუქტურული სექტორისთვის კრიტიკული მნიშვნელობა ჰქონდა .
ინფრასტრუქტურის მშენებელთა ასოციაციის დირექტორს საქართველოს მთავრობის მიერ მიღებულ დადგენილებასთან დაკავშირებით, გარკვეული ტექნიკური შენიშვნები და კითხვები აქვს. დოკუმენტი ინფრასტრუქტურის სამინისტროს ასოციაციამ უკვე გადაუგზავნა. ანა საბახტარიშვილს იმეიდი აქვს, რომ გაგზავნილ კითხვებზე საქართველოს მთავრობისგან პასუხს მიიღებს, რადგან იმისთვის, რომ მიღებული გადაწყვეტილება ტექნიკურად აღსრულებადი იყოს, მისი თქმით, კონკრეტული საკითხები დაზუსტებაა საჭირო.
„ასოციაცია პროცესებში პირველივე დღიდან იყო ჩართული, კრიზისის დაწყების მომენტიდან გვაქვს კომუნიკაცია ბიზნესომბუდსმენთან, ასევე საქართველოს რეგიონული განვითარებისა და ინფრასტრუქტურის სამინისტროსთან. ჩვენ ობიექტურად ვითხოვდით იმას, რაც ამ დადგენილებაში არის ასახული. მიღებული დადგენილება დეტალურად არ გაგვივლია, თუმცა, დღეს გაქვს ტექსტზე წვდომა და კონკრეტული თხოვნები და რეკომენდაციები. რეალურად ყველაფერი არის ტექნიკური საკითხი, რომელიც განსამარტია. ჩვენ ჩამოვაყალიბეთ და მივმართეთ საქართველოს რეგიონული განვითარებისა და ინფრასტრუქტურის მინისტრს და ბიზნესომბუდსმენს. იმედი გვაქვს ეს საკითხები მალევე გაირკვევა. სხვა შემთხვევაში დადგენილების მიღების ფაქტი და პრემიერის მიღებული გადაწყვეტილება ნამდვილად დადებითია. უბრალოდ ამ გადაწყვეტილებას ჩვენ უნდა შევუქმნათ გარანტია ეფექტური შესრულების. ეფექტური შესრულების გარანტიებს კი დადგენილების კორექტირებით მივიღებთ“,- ამბობს ანა საბახტარიშვილი.
ანა საბახტარიშვილის თქმით, მიღებული დადგენილების გამოცემით პრემიერმა და მთავრობამ გამოხატა ნება გამოუვალ მდგომარეობაში მყოფ ინფრასტრუქტურულ სექტორს დახმარებოდა. ინფრასტრუქტურის მშენებელთა ასოციაციის დირექტორი „კომერსანტთან“ დეტალურად საუბრობს იმ პრობლემებზე რომელსაც მშენებელთა ასოციაცია მიღებულ დადგენილებაში ხედავს.
„მიღებული დადგენილება გამორიცხავს პირდაპირ შესყიდვებს, მაშინ როდესაც ერთ პირთან მოლაპარაკების დროს ხშირ შემთხვევაში შემსრულებლები ხშირად გაცილებით მეტ რისკს იღებენ სახელმწიფოს წინაშე, შესაბამისად, ეს დადგენილება თუ ამოვიღებთ პირდაპირ შესყიდვებს დისკრიმინაციულიც შეიძლება იყოს.
კიდევ ერთი საკითხი რასთან დაკავშირებითაც კითხვა გაუჩნდება არა მარტო ნებისმიერ შემფასებელს, თუნდაც აუდიტორულ კომპანიას ან ლევან სამხარაულის სახელობის სასამართლო ექსპერტიზის ეროვნული ბიუროს არის თუ რა მეთოდოლოგიით ხდება გაზრდილი ღირებულების დაანგარიშება. ანუ მუხლის ის ნაწილი, სადაც სხვაობაზეა საუბარი არის ბუნდოვანი და გაუგებარია მასალების გაზრდილი ღირებულების დადასტურება როგორ უნდა მოხდეს, ექსპერტმა რა მონაცემებს უნდა შეადაროს შესაბამისი პერიოდის სამუშაოების შესრულების დოკუმენტი. საკითხი აქტუალურია როგორც მიმდინარე, ასევე სამომავლო პროექტებზეც, რომლებიც გამოცხადდება. ამიტომ აუცილებელია მალევე გაეცეს ამ საკითხებს პასუხის. იმედი მაქვს, რომ პროექტის განხორციელება მალევე აღდგება, თუმცა, თუ ვადამოსული მიღება-ჩაბარების აქტის გაფორმებისას არ გვექნა ზუსტი მითითება, როგორ ვითვლით ამ სხვაობას შეიძლება კომპანიამ დადგენილებით ვერ ისარგებლოს“, - განმარტავს ანა საბახტარიშვილი.
ანა საბახტარიშვილი ამბობს, რომ ასოციაციის რეკომენდაციების შესრულებით საქართველოს მთავრობა თავისივე გადაწყვეტილების აღსრულების გარანტიას მიიღებს. ინფრასტრუქტურის მშენებელთა ასოციაციის დირექტორი აცხადებს, რომ ქვეყანაში ინფრასტრუქტურული პროექტები არ უნდა გაჩერდეს, რადგან სექტორში ჩართულია ძალიან ბევრი ადამიანი რომელთაც შეუძლიათ, რომ დღეს შექმნან დოვლათი როგორც საკუთარი ოჯახებისთვის ასევე ქვეყნისთვის.
„ინფრასტრუქტურული პროექტები დღეს საქარველოში მთლიანი შიდა პროდუქტის საკმაოდ დიდ წილს წარმოადგენს. მაშინ, როდესაც ტურისტული სექტორი და სხვა მიმართულებები სტაგნაციის ფაზაშია დღეს ამ სექტორზე მაქსიმალური კონცენტრაცია უნდა მოხდეს. მსოფლიო მასშტაბით, ბევრ ევროპულ ქვეყნებში მშენებლობები შეუფერხებლად მიმდინარეობს. ზოგადად, მშენებლობა წარმოადგენს შედარებით ნაკლები რისკის მქონე მიმართულებას, რადგან მუშაობა ღია სივრცეში მიდის მიმდინარეობს, თუმცა, რა თქმა უნდა აქაც მნიშვნელოვნია უსაფრთხოების ნორმების დაცვა. ჩვენ როგორც ასოციაცია მაქსიმალურად ვცდილობთ თითოეული ნორმის შესახებ მოვახდინოთ იმ ადამინების ინფორმირება რომლებიც სექტროში არიან ჩართულნი და ყველაფერი გავაკეთოთ იმისთვის, რომ საფრთხის წინაშე არ დადგეს არც ერთი სამშენებლო პროექტის განხორციელება“, - აცხადებს ანა საბახტარიშვილი.
ბაჩო ადამია