„საქართველოს მთავრობის მიერ გადადგმული ნაბიჯები არ არის ეფექტური, მხოლოდ დაინფიცირებულების რაოდენობას რომ გვანახებენ, რაც ნამდვილად არ არის სწორი (ვნახოთ ტესტების რაოდენობა 1 მილიონ მოსახლეზე) იმას რატომ არ გვანახებენ, რამდენმა დაკარგა სამსახური და შემოსავალი?“, - ამის შესახებ „კომერსანტს“ ბიზნესმენმა და ეკონომისტმა კონსტანტინე მოსიძემ განუცხადა. მისი თქმით, ხელისუფლების ქმედებები ქვეყანას ყველა შემთხვევაში მეტ სიღარიბეს მოუტანს.

„ჩემი აზრით, ანტიკრიზისული გეგმის დიდი ნაწილი უნდა დათმობოდა გადასახადების დაწევას და რეგულაციების გაუქმებას, რომ ადამიანებმა შევძლოთ ჭაობიდან მალე ამოსვლა. ასევე, არ შეიძლება იმ ადამიანს უთხრა დარჩი სახლში, ვინც დღიდან-დღემდე პურის ფულს ძლივს შოულობდა. ჩვენ ექიმებს დიდ პატივს ვცემ, მათი ძალისხმევა დასაფასებელია ნამდვილად, თუმცა, ხშირად ზედმეტად გვძაფრავენ. პანდემიას კი უნდა ებრძოლოს თავისუფალმა სამედიცინო სფერომ და არა მთავრობის ბიუროკრატებმა. ახლა არის კარგი დრო, რომ მოეხდინათ ქვეყნის აქტივების სრული უფასო პრივატიზაცია საქართველოს მოქალაქეებზე, თითო მოქალაქეს 10 000 $ -ის ან მეტის ღირებულების აქტივი სასიცოცხლოდ გამოადგებოდა. ვიცით, რომ ზოგიერთი გათვლებით, 4 ტრილიონამდე ქონების გადაცემა შეიძლება ჩვენი გაჭირვებული მოსახლეობისთვის და ამას არ აკეთებენ“,- განაცხადა კონსტანტინე მოსიძემ.

ბიზნესმენი აცხადებს, რომ ხელისუფლების მიერ დაწესებული რეგულაციები და შეზღუდვები კონკრეტულ პირებზე და მთავრობის გარემოცვაზეა მორგებული.

„გამოყოფილი 3.5 მლრდ ლარი საკმარისი არ არის ნამდვილად, საჭიროა ბიზნესების გახსნა მაქსიმალურად. რა დააშავეს ფეხსაცმლისა და ტანსაცმლის მაღაზიებმა ან ფიტნეს ცენტრებმა, გაუგებარია. ეს მიგვანიშნებს იმაზე, რომ მთავრობის წევრების ბიზნეს მეგობრებს არ აქვთ ეს ბიზნესები. თუ ბევრი მეგობარი ბიზნესი არის მაგალითად წარმოების ბიზნესში, ამ ბიზნესებს დაუწესებენ მინიმალურ შეზღუდვებს. გამოყოფილ თანხას მთავრობა ყველა შემთხვევაში მაქსიმალურად თავის გარემოცვაზე დახარჯავს და არ მგონია ეფექტურად დაიხარჯოს“, განმარტავს კონსტანტინე მოსიძე.

კონსტანტინე მოსიძე „კომერსანტთან“ საუბარში ყურადღებას ეროვნული ბანკის საქმიანობაზეც ამახვილებს. მისი თქმით, ინფლაციის მიმართულებით ფასები ყველა პროდუქტზე კატასტროფულად მომატებულია, თუმცა როგორც ეკონომისტი აცხადებს ინფლაციის ზრდა  დიდწილად მთავრობის ქმედებების ბრალია და არა ეროვნული ბანკის.

„ეროვნული ბანკის პანდემიის პერიოდში მუშაობის პერიოდში ლარის კურსი ავიდა 3.4მდე და ახლა დასტაბილურდა 3.22-ზე. რა თქმა უნდა ეს გამოწვეულია უცხოეთიდან შემოსული დოლარის კლებასთანაც, ამიტომ მხოლოდ ეროვნულ ბანკს ვერ დავაბრალებთ კურსის ამ ცვლილებას. ზოგადად, ისეთი მავნებელი ორგანო, როგორიცაა ეროვნული ბანკი, გასაუქმებელია, რადგან, ის გვაიძულებს ვივაჭროთ 1 ვალუტით, რომელიც არის ლარი. ფულებს შორის კონკურენციაა საჭირო რომ მოსახლეობამ თავად აირჩიოს რომელ ვალუტას ენდობა თვითონ. ყველაზე მთავარი რაც უნდა გააკეთონ, უნდა დაუშვან თავისუფალი სავალუტო რეჟიმი, არ დაგვავალდებულონ ლარის გამოყენება და დანარჩენს ბაზარი მიხედავს. გასაგებია, რომ პანდემიის პირობები უფრო რთული შემთხვევაა თუმცა, პანდემიის ჟამს ორჯერ ორი არის 4, ისევე როგორც არა პანდემიის ჟამს“, - აცხადებს კონსტანტინე მოსიძე.

ბაჩო ადამია