საქართველოს მთავრობამ აუქციონის პირდაპირი წესით „სილქ როუდ გრუპ ჰოლდინგს“ აბასთუმანში უძრავი ქონება სიმბოლურ ფასად, ერთ ლარად გადასცა. საქმე ეხება 2022 წლის 14 მარტს გაფორმებულ ხელშეკრულებას, რომლის საფუძველზეც 2 122 კვ.მ. მიწის ნაკვეთი და მასზე არსებულ 355 კვ.მ შენობა-ნაგებობა „სილქ როუდ გრუპ ჰოლდინგის“ შვილობილ შპს „ეფ ტელეკომის“ საკუთრებში გადავიდა.
საპრივატიზებო ვალდებულებით ერთ ლარად ქონების გადაცემაში არაფერი იქნებოდა გასაკვირი, რომ არა ერთ ფაქტი - ამონაწერით სამეწარმეო და არასამეწარმეო იურიდიულ პირთა რეესტრიდან ირკვევა, რომ შპს „ეფ ტელეკომი“ 2017 წელს დაარსდა, მისი დირექტორი გიორგი ხარაბაძე, ხოლო 100% წილის მმართველია შპს „ესარჯი რიალ ისთეითი“. თავის მხრივ ამ კომპანიის 95% საქართველოს ერთ-ერთ უმსხვილეს კომპანიას „სილქ როუდ გრუპ ჰოლდინგ“ ეკუთვნის. მათ მფლობელობაშია Radisson Blu და Radisson Collection-ის სასტუმროები. კომპანია ასევე მუშაობს ერთ-ერთ ცნობილ პროექტ „ბათუმი რივიერაზე“. სილქ როუდ ჯგუფის საკუთრებაშია „სილქ როუდ ბანკი“. მათვე ეკუთვნით საქართველოს კომუნიკაციების ბაზრის ერთ-ერთი უმსხვილესი მოთამაშე „სილქნეტი“. კომპანიამ 2018 წელს ქვეყნის უდიდესი მობილური ქსელი ჯეოსელი შეისყიდა. ასევე „სილქ როუდი“ აწარმოებს გადაზიდვის სერვისს ცენტრალურ აზიასა და კავკასიაში.
საქართველოს მთავრობამ ქვეყნის უმსხვილეს და კარგად დამკვიდრებულ კომპანიას ვალდებულებად განუსაზღვრა საპრივატიზებო თანხის, ერთი ლარის 1 თვის ვადაში გადახდა და 2024 წლის 31 დეკემბრამდე, უძრავი ქონების განვითარების მიზნით ამავე ტერიტორიაზე არანაკლებ 3 090 000 ლარის ოდენობის ინვესტიციის განხორციელება.
აბასთუმანზე საუბრისას ყურადღება კურორტის ისტორიულ მნიშვნელობაზე უნდა გავამახვილოთ. აღსანიშნავია ქვეყნის ყოფილი პრემიერის, ბიძინა ივანიშვილის როლიც. სწორედ მისი სტუმრობის შემდეგ ყველასგან მიტოვებული სამთო კლიმატური და ბალნეოლოგიური კურორტი ყურადღების ცენტრში მოექცა. მაშინ ყოფილი პრემიერ-მინისტრი გაკვირვებული ყოფილა აბასთუმნი ასეთი გაპარტახებული რომ დახვდა და მოსახლეობას ინფრასტრუქტურული პროექტების დროულად განხორციელებას დაჰპირდა. მართლაც, კურორტის აღდგენა-რეაბილიტაცია ხელისუფლებამ 2018 წელს გადაწყვიტა, რა დროსაც დაიწყო ისტორიული სახლების რეაბილიტაციის პროექტი. ამ პერიოდში დაიწყო ევგენი ხარაძის სახელობის ნაციონალური ასტროფიზიკური ობსერვატორიის რეაბილიტაციაც. ივანიშვილის გადაწყვეტილები 2019 წელს დასრულდა ფილტვის დაავადებათა სარეაბილიტაციო ცენტრის მშენებლობა. ფონდი „ქართუ“ აბასთუმანში აფინანსებდა კულტურული-ისტორიული ძეგლების აღდგენასაც. ქვეყნის ყველაზე მდიდარი ადამიანის ინიციატივა იყო აბასთუმნის ელექტრომობილების რეგიონად გადაქცევაც. მისი ამ განცხადების შემდეგ მუნიციპალური განვითარების ფონდის დაფინანსებით, იქ 1000 ავტომობილზე გათვლილი პარკინგის მშენებლობა დაიწყო. აღსანიშნავია, რომ საქართველოს მუნიციპალური განვითარების ფონდმა გასულ წელს აბასთუმანში მწვანე და ლურჯი კორიდორის რეაბილიტაციაზე 51 მლნ ლარის ღირებულების ტენდერი გამოაცხადა. გასულ წელსვე აბასთუმანში იმყოფებოდა პრემიერ-მინისტრი ირაკლი ღარიბაშვილი, რომლის თქმითაც, აბასთუმანში სხვადასხვა ბიზნეს ჯგუფები 442 მილიონი ლარის სასტუმროებს აშენებენ. ასეთია ბიძინა ივანიშვილის „ქართუ“ ფონდის „პარაგრაფ აბასთუმანი“, რომლის მშენებლობაც 2023 წელს დასრულება.
ბაჩო ადამია