საქართველოში ნატოს წევრი და პარტნიორი 15 ქვეყნის შეიარაღებული ძალების 2500-ზე მეტი სამხედროს მონაწილეობით სამხედრო სწავლება „მტკიცე სული 2021" დაიწყო, წვრთნებს საქართველოს თავდაცვის ძალების დასავლეთისა და აშშ-ის ევროპის და აფრიკის სარდლობა ატარებს, რომლის გზავნილი არის - „ძალა პარტნიორობაშია".

სწავლება საიუბილეოა და საქართველო მას უკვე მეათედ მასპინძლობს. თავდაცვის სამინისტროს ინფორმაციით, საერთაშორისო წვრთნების გახსნის ცერემონიალი სენაკში, მე-2 ქვეითი ბრიგადის ბაზაზე გაიმართა.

თავდაცვის მინისტრმა ჯუანშერ ბურჭულაძემ სამწყობრო მოედანზე მონაწილე ნატოს წევრი 12 და სამი პარტნიორი ქვეყნის სამხედრო მოსამსახურეებს სიტყვით მიმართა, როგორც მან აღნიშნა, ერთობლივი წვრთნებით მონაწილე ქვეყნების სამხედრო ქვედანაყოფებს შორის ურთიერთთავსებადობა და საბრძოლო შესაძლებლობები მეტად გაღრმავდება.

„მინისტრმა მრავალეროვნული სწავლებების საქართველოში ჩატარების მნიშვნელობაზეც გაამახვილა ყურადღება და განაცხადა, რომ ეს ზრდის ნატო-ს არსებობას საქართველოში და ხელს უწყობს რეგიონში მშვიდობისა და სტაბილურობის უზრუნველყოფას.

„საერთაშორისო წვრთნები საქართველოში 6 აგვისტოს ჩათვლით გაგრძელდება და ხუთ ლოკაციაზე იქნება გაშლილი. წვრთნები ნატო-ს წევრი და პარტნიორი ქვეყნების ქვედანაყოფებს შორის ურთიერთთავსებადობის ამაღლებას, მრავალეროვნულ გარემოში ოპერაციების დაგეგმვის, აღსრულების დროს ოპერატიული შესაძლებლობების დახვეწასა და გაძლიერებას, ასევე მრავალეროვნული მზადყოფნისა და უსაფრთხოების სფეროში თანამშრომლობის განვითარებას ისახავს მიზნად", - აცხადებენ თავდაცვის სამინისტროში.

როგორც სამხერო ექსპერტი ვახტანგ მაისაია „რეზონანსთან" საუბარში აღნიშნავს, ნებისმიერი ასეთი სახის წვრთნა წინგადადგმული ნაბიჯია, რომლის მიზანია საქართველოს თავდაცვის ელემენტები ნატოს სტანდარტებთან შესაბამისობაში მოვიდეს.

„ესაა ნატოს სულისკვეთებით ჩატარებული წვრთნები, რომელიც ალიანსისა და მისი პარტნიორ წევრ სახელმწიოფებს შორის სამხედრო თავსებადობისა და სამხედრო-ტექნიკური კოორნდინაციის მიღწევას მოიცავს, ეს გეგმიურია და ამ მიზნებისთვის ტარდება, რომლებიც კრიზისების და საერთაშორისო სამშვიდობო ოპერაციების ჩართვაში უფრო ეფექტური მართვა მოხდეს.

„აქ საუბარია საბრძოლო ოპერაციების თანხვედრასა და მათ შორის კიბერუსაფრთხოების თავდაცვის ელემენტების გამოყენებასთან, რაც მნიშვნელოვანი მომენტია საქართველოს შესაბამის სტრუქტურებისთვის კიბერსაფრთხეების შეტევების მოგერიების კუთხით. ასევე, სამეთაურო პრაქტიკის გაჟღერება და გამოცდილების გაზიარება ჩვენი სამხედრო მეთაურთა მიერ ოპერაციების ეფექტურად დაგეგმვისთვის.

„ასევე, საქართველოს მიერ ნატოს სტანდარტების შეიარაღების ათვისება და წვრთნებისას მისი ტესტირება, ასე, რომ ეს საკმაოდ სერიოზულია, ჩვენი თავდაცვისუნარიანობას კიდევ უფრო ზრდის. ნებისმიერი წვრთნა რაც არ უნდა იყოს, საერთაშორისო, ლოკალური თუ ეროვნული, ესაა წინ გადადგმული ნაბიჯი, არმია სწავლებებით იწვრთნება,"- განაცხადეა მან.

როგორც აშშ-ის მხრიდან სწავლების „მტკიცე სული 2021"-ის ხელმძღვანელმა, პოლკოვნიკმა კრის მარშალმა განაცხადა, წვრთნების საბოლოო შედეგი უკეთესად მომზადებული სამხედროა, რომელიც სათანადო პასუხს გასცემს ნებისმიერ კრიზისს.

„მტკიცე სული 2021" უკვე მეათედ ტარდება. სწავლება, რომელიც რეგიონში ორ ქვეყანას - ამერიკის შეერთებულ შტატებსა და საქართველოს შორის დაიწყო, დღეს უკვე მრავალეროვნული ერთობლივი სწავლება გახდა. ახლა მასში 15 ქვეყნის სამხედრო მოსამსახურეები მონაწილეობენ, რომელთა ერთობლივი ჩართვით, იზრდება მათი მზადყოფნა და ურთიერთთავსებადობა.

„სწავლების საშტაბო კომპონენტი II ბრიგადაში იმართება, ხოლო ბატალიონის დონის სწავლებები საბრძოლო სროლებით - საქართველოს მასშტაბით სხვადასხვა ლოკაციაზე. სწავლება ჩვენს პარტნიორებთან ერთად ფოკუსირებულია წვრთნების განვითარებაზე, რომლის დროსაც ერთმანეთს საუკეთესო პრაქტიკას ვუზიარებთ, იზრდება ურთიერთთავსებადობა ჩვენი შეიარაღების, ქვედანაყოფებისა და სხვადასხვა პროცესის თვალსაზრისით. ამ ყველაფრის საბოლოო შედეგი კი, უკეთესად მომზადებული სამხედროა, რომელიც სათანადო პასუხს გასცემს ნებისმიერ კრიზისს",- განაცხადა კრის მარშალმა.

"რეზონანსი"