რადიო „კომერსანტის“ გადაცემაში „კომერსანტის დილა“ პოლიტოლოგმა გია ხუხაშვილმა განაცხადა, რომ ცივილიზებული სამყაროდან საქართველოში განვითარებული მოვლენები უნდა ჩანდეს, როგორც ბრბოს ძალაუფლების დომინაცია. მისივე თქმით, ის, რაც 5-6 ივლისს ხდებოდა, იყო წმინდა წყლის გამოვლინება იმისა, რომ გონება არის გათიშული და ადამიანები ალოგიკური საფრთხის წინაშე ხდებიან ძალიან აგრესიულები.
ხუხაშვილის თქმით, მმართველობის ეს ფორმა პრობლემის შემცველია, რადგან ეს არ არის მომავლის და განვითარების არჩევანი და ყველაფერი დამყარებულია აგრესიაზე შუღლზე, განსხვავებულის უარყოფაზე, რომელიც შეფუთულია ულტრაკონსერვატორული ფასეულობებით.
„ეს, ბუნებრივია, მხოლოდ დეგრადაციაზეა ორიენტირებული. მომავლის ხედვა არ არსებობს და ეს საზოგადოებისთვის საფრთხეა, იმიტომ რომ თანამედროვე სამყაროში ჩვენ ვდგებით საკუთარი შვილების დაცვის აუცილებლობის წინაშე, რადგან ჩვენ ვიცით, რომ ჩვენი შვილების თაობა სხვანაირად აზროვნებს და მათი მთავარი ფასეულობა და პრიორიტეტი არის თავისუფლება, მათ შორის ჩაცმის თავისუფლება, ვარცხნილობის თავისუფლება, მაკიაჟის თავისუფლება და ასე შემდეგ. ბუნებრივია, ის რაც ხდებოდა, საფრთხის ქვეშ აყენებს ჩვენ შვილებს“, - აღნიშნა გია ხუხაშვილმა.
ხუხაშვილი ამერიკის სახელმწიფო დეპარტამენტის მიერ გავრცელებულ განცხადებასაც გამოეხმაურა და აღნიშნა, რომ ისტორიაში ჯერ არ ყოფილა, ვინმეს საქართველოსთვის სანქციები დაეწესებინოს. თუმცა, როგორც ხუხაშვილი ამბობს, აშშ-ის დეპარტამენტის მიერ გავრცელებული განცხადება მისთვის მოულოდნელი არ ყოფილა.
„სანქციები, თუნდაც ასეთ დიპლომატიურ კონტექსტში, მე არ მახსოვს მაშინაც კი, როდესაც იგივე ზვიად გამსახურდიაზე ამერიკული პოლიტიკა საუბრობდა, რომ ის დინების საწინააღმდეგოდ მიცურავს. სანქიცები მაშნაც კი არ ყოფილა ნახსენები“, - აღნიშნა გია ხუხაშვილმა.
რადიო "კომერსანტის" კითხვაზე, თუ რა უნდა გააკეთონ ამ ქვეყნის მომავლით დაინტერესებულმა მოქალაქეებმა, რომ ეს სიტუაცია ჩადგეს კალაპოტში და ქვეყანა დემოკრატიისკენ მიმავალ გზას დაუბრუნდეს, ხუხაშვილი პასუხობს, რომ სზოგადოების იმ ნაწილმა, რომელიც კითხვებს სვამს და ბოროტებას ხედავს, მეორე ნაწილი რაღაცნაირად უნდა შემოიერთოს.
„ჩვენთან დამკვიდრდა აგრესიული კომფორმიზმის ფორმა, რომლითაც საზოგადოების ძალიან დიდი ნაწილი არის დაავადებული და რომელიც თვლის – იმიტომ უდნა შეეგუოს ბოროტებას, რომ არსებობს უფრო დიდი ბოროტების საფრთხე და თან ამას აგრესიულად აკეთებს.
ხელისუფლება დღეს ამბობს, რომ ლაშქარავა მოსაკლავი იყო, ის არ იყო სიცოცხლის ღირსი. ეს არ არის პირველი შემთხვევა. სისტემა თავის ზნეს არ იცვლის – გირგვლიანის დროს ჩვენ ვიყავით სულ რამდენიმე ათეული ადამიანი, ვინც ამას ვაპროტესტებდით და მაშინაც ეს პროპაგანდისტული მანქანა გვეუბნებოდა, რომ იგი იყო ყაჩაღი, სვანი მაფიოზი და ასე შემდეგ. სისტემა მაშინაც ამბობდა, რომ გირგვლიანი საცემი იყო და შემოაკვდათ.
აგრესიული კომფორმიზმი ნიშნავს, რომ ამ დროს იმდენად არ გინდა მოქმედება, რომ ეჩვევი ანტისანიტარიას, სუნებს და არ გინდა გამოღვიძება, აქედან გამოსვლა. ახლა, როცა გეუნებიან, რომ ლაშქარავა ზედოზირებით დაიღუპა, აღარ სვამ კითხვებს. მე ვფიქრობ, რომ საზოგადოების ის ნაწილი ხედავს ამ განუკითახობას, ხედავს თუნდაც იმას, თუ როგორ ცდილობს ღარიბაშვილი პატრიარქს ამოეფაროს. ღარიბაშვილი ფაქტობრივად პატრიარქს აშანტაჯებს და ეუბნება, რომ თუ მე რამე დანაშაული ჩავიდინე, შენ ამის თანამონაწილე ხარ“, - განაცხადა გია ხუხაშვილმა
თაკო კვაჭანტირაძე