საქართველოს გერმანიიდან მოგზაური შეგირდი დურგლები სტუმრობენ. როგორც საქართველოში გერმანიის საელჩოს მიერ გავრცელებულ ინფორმაციაშია აღნიშნული, ხელოსნების ტრადიციული მოგზაურობა, ეგრეთ წოდებულ Walz-ი, ადრე სავალდებულო იყო, დღეს კი ის უნიკალური გამოცდილების მისაღებად ხორციელდება.
შეგირდი დურგლები იესპერ ჰოლტმანი და ელისტერ კარმაიკლი ტრადიციული მოგზაურობის ფარგლებში საქართველოში იმყოფებიან. გერმანიის საერთაშორისო თანამშრომლობის საზოგადოების (GIZ) თბილისის ოფისში თბილი დახვედრის შემდეგ ისინი ფოთში გაემგზავრენ, სადაც პროფესიულ სასწავლებლებში „ფაზისი“ და „ახალი ტალღა“ მასწავლებლებს დაეხმარებიან და სასწავლებლების მოსწავლეებთან ერთად პატარა პროექტებს განახორციელებენ.
გერმანელი შეგირდები ერთის მხრივ თავად გაეცნობიან ხის დამუშავების რეგიონულ მეთოდებს, მეორეს მხრივ კი ქართველ ახალგაზრდებს მოუყვებიან ლაიფციგში მდებარე სადურგლოში თავიანთი სწავლის, მუშაობისა და ამ პროფესიაში არსებული კარიერული შესაძლებლობების შესახებ.
Weltwalz-ი წარმოადგენს GIZ-ის Business Scouts for Development-ის საპილოტე პროექტს, რომლის მიზანსაც წარმოადგენს საერთაშორისო თანამშრომლობის პირველი გამოცდილებების მიღებისას ახალგაზრდა ხელოსნების ფინანსური და ორგანიზაციული მხარდაჭერა. ახალგაზრდა გერმანელი ხელოსნები საქართველოში ჩამოვიდნენ Business Scouts for Development-ის, ებერჰარდ შიოკის ფონდისა და GIZ-ის პროგრამის „კერძო სექტორის განვითარება და პროფესიული განათლება სამხრეთ კავკასიაში“ თანამშრომლობის ფარგლებში.