„ევროკავშირს გაცხადებული აქვს, რომ წლების შემდეგ უარს იტყვის არამწვანე ენერგიის მიღებაზე ანუ არც აწარმოებს და არც იყიდის, საქართველოს სწორედ ბუნებრივი უპირატესობა აქვს ამ მხრივ, სადაც მოთხოვნაც გაჩნდა და არ გამოვიყენოთ ეს შესაძლებლობა - არასწორი იქნება. საქართველოს ექნებოდა ევროკავშირთან სათქმელი, რომ ელექტროენერგიის დივერსიფიცირებას თვითონ ახდენს“, — ამის შესახებ ეკონომიკის დოქტორმა, პროფესორმა, თსუ–ს ანალიზისა და პროგნოზირების ცენტრის დირექტორმა ვახტანგ ჭარაიამ, გიორგი აბაშიშვილის საავტორო გადაცემაში „ბიზნეს ინსაიდერი“ განაცხადა.
მისი თქმით, ჰესების საკითხი, მარტო „ფულის შოვნა“ არ არის, მაგალითად ექსპორტზე გაიტანო და ამით შემოსავალი მიიღო, უსაფრთხოების თვალსაზრისითაც ძალიან მნიშვნელოვანია.
„ულევი რესურსი გვაქვს, თან მწვანე ენერგიაა. თავის დროზე გაკეთებული არასწორი მესიჯების გამოა რა ვითარებაც ჩვენ დღეს მივიღეთ. ტაქტიკაა შესაცვლელი, ჩემი იდეაა, რომ შევქმნათ ეს ჰესები, ადგილობრივი ბიზნესის და სახელმწიფოს დახმარებით. არ იქნება მოსაძიებელი უცხოელი ინვესტორი და ყველას ექნება განცდა, რომ თვითონ არის პროცესში ჩართული. ხშირად წარმოუდგენიათ, რომ მთავრობა თუ ჰესს ააშენებს ის იქნება მმართველი, მაგრამ ასე არ არის - უნდა შემოიყვანო პროფესიონალი მენეჯმენტი და მთავრობას არ უნდა ჰქონდეს კადრების დანიშვნის უფლება და ა.შ. გვაქვს ამის უზარმაზარი შესაძლებლობა, თურქეთიდან და რუსეთიდან იმპორტი ჩავანაცვლოთ. ჰესებს აშენებენ ბევრ განვითარებულ ქვეყნაში და ეს რომ ეკოლოგიური თვალსაზრისით მათ ანგრევდეს, არ გააკეთებდნენ.
ნამახვანის პროექტის ჩაგდებამ, ბევრი რამ პერსპექტივაში შეგვიზღუდა. ზოგადად, როცა ინვესტორი ხედავს, რომ ქვეყანა ენერგოდეფიციტურია და ეს უფრო მეტად იზრდება, არ შემოვა. გარდა ამისა გამტარუნარიანობაც კი არ გვაქვს იმდენი, რომ ჩვენი მოთხოვნილება დავაკმაყოფილოთ. წარმოიდგინეთ როცა აქ ქარხანს ააწყობს ინვესტორი და ელექრტროენერგიის კუთხით დამოკიდებული ხარ რუსეთზე და თურქეთზე, შესაბამისად არ იცი როდის რა მოხდება და რატომ გამოიქცევა რომელიმე ინვესტორი ჩვენთან?!“, — აღნიშნავს ვახტანგ ჭარაია.