„დღესდღეობით მთელი მსოფლიო დაპაუზებულია და არც ჩვენთანაა დიდად განსხვავებული სიტუაცია. ფაქტობრივად, საქართველო 2020 წლის 1 იანვრის მდგომარეობას რომ დაუბრუნდეს, სრულიად ბიზნესს მინიმუმ 2 წელი მაინც დასჭირდება.“ - ასე აფასებს „ტოიოტა ცენტრი თბილისის“ ხელმღვანელი ირაკლი გურჩიანი ქვეყანაში 10 მაისამდე საგანგებო მდგომარეობის გახანგრძლივებასა და საყოველთაო კარანტინის გავლენას ქართულ ბიზნესზე.

შეგახსენებთ, რომ საქართველოში საგანგებო მდგომარეობა 10 მაისამდე გახანგრძლივდება.  ამის შესახებ პრემიერ-მინისტრმა 14 აპრილს, ბრიფინგზე განაცხადა. შესაბამისი თხოვნით, მთავრობა პრეზიდენტს მიმართავს, რომელიც პროცედურულად პარლამენტს წარუდგენს დეკრეტს.

პრემიერმა გუშინ ასევე ისაუბრა ბიზნესის ვალდებულებაზე, რომელიც მას უმუშევრად დარჩენილ მოქალაქეების მიმართ ეკისრება.  „იმ კომპანიებმა, რომლებმაც თანამშრომლები გაუშვეს და გარდა იმისა, რომ შეენარჩუნებინათ, 1-2 თვის ანაზღაურება რაც უნდა გადაეხადათ და არ გადაუხადეს, ამათ ყველას მივაკითხავთ.“- განაცხადა გიორგი გახარიამ.

რამდენად შესაძლებელია თვეობით გაჩერებული ბიზნესისთვის თანამშრომლებზე პასუხისმგებლობის აღება, მათი ანაზღაურება და ვალდებულებებისა და გადასახადების გადახდა და რამდენად ამძიმებს მათ მდგომარეობას საგანგებო სიტუაციის კიდევ ერთი თვით გახანგრძლივება? ირაკლი გურჩიანი მიჩნევს, რომ საქართველოს ეკონომიკასა და მცირე და საშუალო ბიზნესებს, აღდგენისა და გაჯანსაღების ხანგრძლივი პერიოდი ელოდებათ.

„ჩვენი სერვისი მუშაობს ძალიან დაბალი ტემპით, თანამშრომლების მეხუთედი გვყავს. „ტოიოტა ცენტრი“  ისევ და ისევ სახელმწიფოსთვისაა აუცილებელი. თუ მანქანა გაუმართავია  ვერც სპეცსამსახური, ვერც სასწრაფო ვერ ივლის და ვერ იმუშავებს. ამიტომ, ჩვენ  ვმუშაობთ ყველა იმ ნორმის დაცვით, რაც საჭიროა.  მანქანებს ვერ ვყიდით,  რომც  შეიძლებოდეს გაყიდვა, ვინ არის მანქანის მყიდველი საქართველოში.  ნაკლებად წრმომიდგენია, რომ დღეს ვინმეს მოუვიდეს იდეა, რომ ახალი მანქანა შეიძინოს.

თუმცა, ამ ბრუნვით ჩვენ ვერაფერს ვერ გავაკეთებთ და იმათ რიგებში ვდგავართ, ვინც წლის ბოლოს ბანკების ხელში აღმოჩნდება. საქართველოში ბიზნესების, უძრავ-მოძრავი ქონებების 80 პროცენტი წლის ბოლოს ბანკების ხელში გადავა. წარმოიდგინეთ  სარესტორნო ბიზნესი, რომელსაც აქვს სესხი, ყოველდღე მუშაობით რაღაც ფული აკუმულირდებოდა და ხდებოდა ყველა ვალდებულების გადახდა. წლის ბოლოს საქართველოს ეკონომიკის ძირითადი აქტივები ბანკების საკუთრება იქნება იმიტომ,  რომ სახელმწიფომ არ მგონია ამდენი გაიღოს.“- განმარტავს გურჩიანი.

მარიამ მორგოშია