15 ივნისიდან, საქართველოს ყველა დაცული ტერიტორიაზე ვიზიტორების შესვლა ნებადართულია ახალი კორონავირუსის გავრცელების პრევენციისთვის შემუშავებული რეკომენდაციების დაცვით.ყველა ვიზიტორს, ტერიტორიაზე შესვლამდე, ჩაუტარდება უკონტაქტო თერმოსქრინინგი, დახურულ შენობებსა და ვიზიტორთა ცენტრებში, მათ შორის მღვიმეებში, სავალდებულოა პირბადის ტარება და დისტანციის დაცვა.
თუმცა, დაცულ ტერიტორიებზე დასაქმებული პირები აცხადებენ , რომ წინა წლებთან შედარებით, წელს დაცულ ტერიტორიებს გაცილებით ნაკლები ვიზიტორი სტუმრობს.
როგორც „კომერსანტთან“ პრომეთეს მღვიმეს დირექტორმა ჯუბა ლელაძემ აღნიშნა, წინა წლებთან შედარებით წელს პრომეთეს მღვიმეს ნაკლები ვიზიტორი სტუმრობს, რადგან ძირითადად მათი სტუმრები უცხოელები იყვნენ.
„საქართველოში ჩარჩენილი უცხოელები მოდიან, მაგრამ უმრავლესობა ვიზიტორების 90-95% ქართველები არიან, თუმცა ისეთი მუშაობა არ გვაქვს, როგორც გასული წლების ანალოგიურ პერიოდში იყო. ჩვენი სივრცე ქართველებს ნანახი აქვთ , ტურისტული ჯგუფებიც ნაკლებად მოდიან, მსხვილი 30-35 კაციანი ჯგუფები იშვიათობა იყო ისედაც, ძირითადად, ოჯახები მოდიან , სამეგობრო წრეები და ა.შ. მაგრამ რაოდენობა მნიშვნელოვნად შემცირებულია, მაგალითისთვის, შარშან პრომეთეზე ანალოგიურ პერიოდში თუ იქნებოდა 1000-1500 კაცი, დღეს შეიძლება გვყავდეს 100 სტუმარი“
მარტვილის კანოინზეც ანალოგიური სიტუაციაა, როგორც მარტვილის კანიონის დირექტორი ზაზა გაგუა „კომერსანტთან“ საუბარში აღნიშნავს, მუშაობა განაახლეს, თუმცა წინა წლებთან შედარებით კანიონს გაცილებით ნაკლები ხალხი სტუმრობს “ტურისტული ნაკადები რა თქმა უნდა მცირეა, ქვეყანაში, მარტო ჩვენ არ ვართ გამონაკლისები, პატარა ჯგუფები მოდიან და ოჯახები“
თაკო კვაჭანტირაძე