„საქართველოს და რუსეთს შორის ფრენების უპირობოდ და მოლაპარაკებების გარეშე აღდგენა არ უნდა მოხდეს“, - ამის შესახებ სამოქალაქო პლატფორმა 20/20–ის თავმჯდომარემ ვასო ურუშაძემ განაცხადა. იგი საქართველოს მთავრობას მიმართავს, რომ არ წამოეგოს „რუსეთის მხრიდან გადმოგდებულ ანკესს“, რომელიც მიზნად საქართველოს ეკონომიკურ ანექსიას ისახავს. როგორც ურუშაძე ამბობს, ხელისუფლებამ კატეგორიულად უნდა მოითხოვოს, რომ ორ ქვეყანას შორის ,,საჰაერო მიმოსვლის შესახებ“ შეთანხმება საერთაშორისო სამართლებრივ ჩარჩოში მოექცეს.
„დღეს, ორ ქვეყანას შორის საავიაციო ხელისუფლებების ურთიერთობებს 1993 წელს გაფორმებული „საქართველოს რესპუბლიკის მთავრობასა და რუსეთის ფედერაციის მთავრობას შორის საჰაერო მომოსვლის შესახებ შეთანხმება“ არეგულირებს, რომელიც ცალმხრივად, რუსეთის მხრიდან ჯერ 2006 წელს დაირღვა, შემდეგ 2008 წელს საომარი მოქმედებებისას და უკვე მესამედ, 2019 წელს 20 ივნისის მოვლენების შემდეგ. რუსეთთან ურთიერთობის მწარე გამოცდილებამ კიდევ ერთხელ გვაჩვენა, რომ ამ ქვეყანასთან, ორმხრივ ფორმატში მოლაპარაკებებს და დადებულ შეთანხმებებს არანაირი სამართლებლივი ძალა არ გააჩნია. რუსეთის მხრიდან შეთანხმების ცალმხრივად და არაერთხელ დარღვევის მიუხედავად, საქართველოს არ გააჩნია ბერკეტი, დაიცვას საკუთარი სახელმწიფოებრივი ინტერესები და ეროვნული ავიაკომპანიები. ამის გამო, მილიონობით ლარის ზარალი ადგება საქართველოს ეკონომიკას და კერძო სექტორს.
აქედან გამომდინარე, მივმართავ საქართველოს მთავრობას, არ წამოეგოს რუსეთის მხრიდან გადმოგდებულ ანკესს, რომელიც მიზნად ისახავს საქართველოს ეკონომიკურ ანექსიას და კატეგორიულად მოითხოვოს, რომ ორ ქვეყანას შორის ,,საჰაერო მიმოსვლის შესახებ” შეთანხმება მოექცეს საერთაშორისო სამართლებრივ ჩარჩოში. კერძოდ, გამოვდივარ ინიციატივით, ჩვენი სტრატეგიული პარტნიორის და მოკავშირის-ევროკავშირის, კერძოდ “EASA”-ს (ევროპის სამოქალაქო ავიაციის სააგენტო) ჩართულობით გაფორმდეს ახალი სამმხრივი შეთანხმება, რომელიც დაარეგულირებს რუსეთ-საქართველოს საავიაციო ხელისუფლებებს შორის ურთიერთობას, რითიც ეს ურთიერთობა საერთაშორისო სამართლებრივ ფორმატში მოექცევა.
საქართველოს და რუსეთს შორის ფრენების უპირობოდ და მოლაპარაკებების გარეშე აღდგენა არ უნდა მოხდეს და აუცილებელია შეიქმნას მოლაპარაკებების სამმხრივი ფორმატი. მიგვაჩნია, რომ პროცესი საკუთარ თავზე უნდა აიღოს ჩვენმა სტრატეგიულმა პარტნიორმა ევროკავშირმა, კერძოდ ევროპის სამოქალაქო ავიაციის სააგენტომ. აღნიშნულ ფორმატში გამართულ მოლაპარაკებებში უნდა მონაწილებდნენ- სამოქალაქო ავიაციის სააგენტო, ეროვნული ავიაკომპანიები და საქართველოსა და რუსეთის მთავრობების წარმომადგენლები“, - განაცხადა ვასო ურუშაძემ.
პლატფორმა 20/20–ის თავმჯდომარემ განაცხადა, რომ მოლაპარაკების პროცესი უპირობოდ ბრიუსელში უნდა წარიმართოს და ახალი სამმხრივი ხელშეკრულება ევროპის სამოქალაქო ავიაციის სააგენტოს იურისტების ჩართულებით გაფორმდეს. მომავალში, აღნიშნული ხელშეკრულების ცალმხრივად შეწყვეტის შესაძლებლობების თავიდან ასაცილებლად კი, მისი თქმით, დამრღვევ მხარეს სანქციები დაეკისროს და კერძო სექტორზე მიყენებული ფინანსური ზიანის ანაზღაურების ვალდებულება. რისი გარანტორიც უშურაძის განცხადებით ევროპის სამოქალაქო ავიაციის სააგენტო იქნება.
შეგახსენებთ, რუსეთის ფედერაციის საბჭოს საერთაშორისო საკითხთა კომიტეტის თავმჯდომარემ გრიგორი კარასინმა გუშინ, 29 ივლისს განაცხადა, რომ რუსეთი მზად არის საქართველოსთან ავიამიმოსვლის განახლების საკითხის განსახილველად. ამასთან, კარასინს გაუჭირდა ავიამიმოსვლის განახლების კონკრეტული ვადების დასახელება.
საქართველოს პრემიერ–მინისტრის სპეციალურმა წარმომადგენელმა რუსეთთან ურთიერთობის საკითხებში ზურაბ აბაშიძემ „კომერსანტთან“ საუბარში გუშინ აღნიშნა, რომ ამ პრობლემის მოგვარებასთან დაკავშირებით ჯერ სამუშაო ჭრილში საუბარი არ გამართულა, თუმცა რუსული მხრიდან არც რაიმე ახალი წინაპირობა წამოსულა.
„ჯერ სამუშაო ჭრილში ასეთი კომუნიკაციები არ ჩატარებულა. დაველოდოთ. სექტემბერ–ოქტომბერში გაიმართება ჩვენი შეხვედრა (აბაშიძე–კარასინის ფორმატი. რედ.), ონლაინ იქნება ეს თუ ფიზიკურად, დამოკიდებულია ეპიდემიოლოგიურ ვითარებაზე იმ პერიოდისთვის. თუ რუსეთის მხარე მზად იქნება ამ საკითხის გადასაჭრელად, ჩვენ ვიმსჯელებთ“, – უთხრა „კომერსანტს“ ზურაბ აბაშიძემ.
რუსეთის პრეზიდენტის ვლადიმირ პუტინის 2019 წლის 21 ივნისის განკარგულების საფუძველზე, რუსულ ავიაკომპანიებს საქართველოს მიმართულებით ფრენები იმავე წლის 8 ივლისიდან აეკრძალათ. პუტინის აღნიშნული გადაწყვეტილება თბილისში რუსი დეპუტატის სერგეი გავრილოვის ვიზიტის და საქართველოს პარლამენტის სპიკერის სავარძელში ჩაჯდომის გამო აგორებულ საპროტესტო ტალღას უკავშირდება, რომელიც დღეს „გავრილოვის ღამის“ სახელითაა ცნობილი.