სვანური ჭაჭა, იგივე ღეჰის არაყი, უძველესი სვანური სასმელია, რომელიც „ლირდეს“ სახელით ქართულ ბაზარზე რამდენიმე კვირის წინ გამოჩნდა. „ლირდეს“ დამფუძნებელმა იასონ ონიანმა „კომერსანტთან“ ახალი ალკოჰოლური სასმელის სპეციფიკაზე და გეგმებზე ისაუბრა და აღნიშნა, რომ ალპური მცენარე დუცი, სვანურად ღეჰი არის სწორედ ის განსაკუთრებული ინგრედიენტი, რომელიც სასმელს გამორჩეულ ფერსა და არომატს სძენს.
„სვანური ჭაჭა, იგივე ღეჰის არაყი, უძველესი სვანური სასმელია, რომლის გამოშვების იდეა ჯერ კიდევ 2 წლის წინ გაჩნდა. ინვესტიცია „აგროჰაბის“ დამფუძნებლისგან მოვიზიდეთ, რომელიც ჩემთან უნივერსიტეტში ლექციის წასაკითხად იყო მოსული და განაცხადა, რომ საინტერესო იდეების მოსასმენად მზად იყო. სწორედ მას გავაცანით ჩვენი წამოწყება და მისი წყალობით პროექტი ახალ საფეხურზე გადავიდა. მისგან არამხოლოდ ფულადი სახის ინვესტიცია განხორციელდა, არამედ ყოველმხრივ გვეხმარებოდა, როგორც რჩევების და მენეჯმენტის კუთხით ასავე ტექნოლოგიების ნაწილში.
პირველი პარტია „აგროჰაბის“ სამივე ფილიალში განთავსდა, თუმცა სხვადასხვა ორგანიზაციებთანაც გვაქვს მოლაპარაკებები, მაგრამ ჯერ კონკრეტული ობიექტების დასახელება არ გვსურს. რაც შეეხება მოთხოვნას, იმაზე დიდი აღმოჩნდა ვიდრე ველოდებოდით, მოსწონთ ვიზუალი და პირველ ეტაპზე გაყიდვებზე გავლენა ამ ფაქტმა მოახდინა, თუმცა, ვგეგმავთ აგრესიული მარკეტინგის ამუშავებას“, - განაცხადა იასონ ონიანი.
„ლირდეს“ დამფუძნებელმა კომპანიის სამომავლო გეგმებზე საუბრისას აღნიშნა, რომ საქართველოში არ არის ისეთი ბაზარი, სადაც მომხმარებელი ჩამოსხმულ პრემიუმ ხარისხის ჭაჭაზე მაღაზიაში აქტიურად ყიდულობს, უმრავლესობა სასმელს სახლში, თვითონ აკეთებს, ამიტომ ალკოჰოლური სასმელების ინდუსტრიაში ექსპორტია მნიშვნელოვანი.
„შევისწავლეთ სხვადასხვა სეგმენტი და საბოლოოდ ჩამოვყალიბდით რომ ჩვენი პროდუქცია საშუალოზე ოდნავ მაღალი შემოსავლის მქონე, უფრო ტრადიციების მოყვარულ სეგმენტზეა გათვლილი. გარდა ამისა აღსანიშნავია, ჩვენ სასმელების კატეგორიაში ჭაჭა იმისთვის ავირჩიეთ, რომ ტურისტებისთვის ცნობილია. საქართველოს ბაზარზე ტურისტებზე და გრძელვადიან პერსპექტივაში ექსპორტზე ვართ ორიენტირებული, რადგან ქვეყანაში არ არის ისეთი ბაზარი, რომ მომხმარებელი მაღაზიაში შევიდეს და ჩამოსხმულ პრემიუმ ხარისხის ჭაჭაზე გააკეთოს არჩევანი, უმრავლესობა სასმელს სახლში, თვითონ აკეთებს. ამას გარდა არსებული ბაზარი ძალიან მცირეა. აქედან გამომდინარე, თუ კი ალკოჰოლური სასმელების ინდუსტრიაში შედიხარ, გრძელვადიან პერსპექტივაში მაინც ექსპორტზე უნდა ორიენტირდე და უცხოეთის ბაზარი აითვისო. ამ ეტაპზე კონკრეტულად არ ვიცით სად განვახორციელებთ ექსპორტს, თუმცა ჩვენი აზრით, ამ პროდუქტზე უფრო მეტად მოთხოვნა იქნება პოლონეთში, უკრაინაში, ბელორუსიაში, სადაც ქართულ ნაწარმს დადებითად აფასებენ. უფრო გრძელვადიან პერსპექტივაში კი ჩინეთის ბაზარზე გასვლის დიდი სურვილიც გვაქვს“, - განმარტა იასონ ონიანმა.
ნინო თამაზაშვილი