პანდემიის გავრცელების თავიდან აცილების  მიზნით საქართველოს ბანკის თანამშრომელთა ნაწილი დისტანციურად, სახლიდან მუშაობს. საქართველოს ბანკმა გადაწყვიტა თანამშრომლებს, რომლებსაც სახლში ბავშვები ჰყავთ, კომფორტული გარემო შეუქმნას და ხელი შეუწყოთ მათ მუშაობის პროცესში, რისთვისაც ბანკმა შიდა საკომუნიკაციო პლატფორმა Workplace-ზე თანამშრომელთა შვილებისთვის ონლაინ ბაღი შექმნა.  (Workplace-ი Facebook–ის მიერ შექნილი ბიზნეს საკომუნიკაციო პლატფორმაა, რომელიც საქართველოს ბანკმა თანამშრომლებისთვის  2019 წელს შეიძინა. Workplace-ის დანერგვის მიზანი საქართველოს ბანკის თანამშრომლებისთვის თანამედროვე საკომუნიკაციო არხის შეთავაზება და  მათთვის ისეთი გარემოს შექმნაა სადაც ოპერატიულად, თანამედროვე ინსტრუმენტებით ხდება ორგანიზაციის შიგნით ინფორმაციის გაცვლა, უკუკავშირის მიღება და ჩართულობა. საქართველოს ბანკი ერთ-ერთი პირველი ქართული კომპანიაა, რომელმაც პლატფორმა - გამჭვირვალობის, ღიაობის, ნაკლები ბიუროკრატისა და მეტი ეფექტურობის მიზნით  დანერგა).

აღნიშნულ პროექტზე  საქართველოს ბანკი საკმაოდ გამოცდილ და კვალიფიციურ, ისეთ გუნდთან ერთად მუშაობს, როგორც ბაღი „ფელიქსია“. ბაღი ბავშვებს შესთავაზებს საგანმანათლებლო, გასართობ და გამაჯანსაღებელ აქტივობებს ონლაინ რეჟიმში, ყოველ სამუშაო დღეს. ბაღი 1 ივლისს დაიწყება. 

„ეს არის „ფელიქსის“ და „საქართველოს ბანკის“ ერთობლივი და ძალიან საინტერესო პროექტი, რომელიც ბანკის თანამშრომლების სკოლამდელი აღზრდის ბავშვებისთვის არის გათვლილი. ეს იქნება შიდა საგანმანათლებლო პორტალი, სადაც „ფელიქსის“ პედაგოგების ჩართულობით ბავშვებს სხვადასხვა ონლაინ პროგრამებში მონაწილეობის საშუალება ექნებათ. ონლაინ ჩართვები მოიცავს როგორც ფიზიკურ, ასევე სახალისო-საგანმანათლებლო აქტივობებს. 3-დან 6 წლამდე ბავშვები ყოველ დღე, დღეში 1.5  საათით ზუმში ჩაერთვებიან. ცხრილს და ზუმის  ბმულებს მშობლები წინასწარ მიიღებენ, სპეციალურად ამ ონლაინ ჩართვებისთვის შექმნილ ჯგუფში. ეს პროექტი ბავშვებს საშუალებას მისცემს საინტერესოდ გაატარონ დრო, ხოლო მშობლებს მუშაობისთვის მეტი დრო გამოუთავისუფლდეთ“, - აცხადებენ  „ფელიქსში“.

„ძალიან სასიამოვნოა, როცა დამსაქმებელი ზრუნავს დასაქმებულისთვის კომფორტული პირობების შექმნაზე. პანდემიის თავიდან აცილების პრევენციის მიზნით  უკვე რამდენიმე თვეა დისტანციურად, სახლიდან ვმუშაობ. რაც ერთის მხრივ მაძლევს შესაძლებლობას, ოჯახის წევრებთან მეტი დრო გავატარო, თუმცა მეორეს მხრივ, სახლის პირობებში, მცირეწლოვან შვილთან ერთად, რომელიც კიდევ უფრო დიდ ყურადღებას მოითხოვს, რთულია სამსახურზე სრულად კონცენტრირება.  მოხარული ვარ, რომ ბანკმა ეს საკითხი წინ წამოწია.  შექმნილ მდგომარეობაში, როცა მშობლებისთვის არ არის მარტივი პარალელურ რეჟიმში გავართოთ ბავშვები და დავაკავოთ საინტერესო საქმიანობით, ყოველ სამუშაო დღეს ონლაინ ბაღი მნიშვნელოვნად დაგვეხმარება. ჩემთვის, როგორც მშობლისთვის, განსაკუთრებით საინტერესოა ის პროგრამა, რასაც „ფელიქსი“ საქართველოს ბანკის თანამშრომლებს გვთავაზობს, რადგან  დატვირთულია ისეთი აქტივობებით, რომლებიც ბავშვის გართობას და განვითარებას ერთდროულად უწყობს ხელს“, -  განაცხადა ნინო ქუტიძემ, საქართველოს ბანკის თანამშრომელმა.

(R)