საქართველოს ბანკი აგრძელებს განათლების ხელშეწყობას და კომპანია „წიგნების თაროსთან“ პარტნიორობას იწყებს. ახლა კიდევ უფრო მნიშვნელოვანია მომავალი თაობის განათლებაზე ზრუნვა, ამიტომ პარტნიორობის ფარგლებში, შეიქმნა არაფორმალური განათლების ონლაინ სკოლა, რომელიც იზოლაციის პერიოდში დაწყებითი კლასების მოსწავლეებს უფასო, დამატებით, კლასგარეშე გაკვეთილებს შესთავაზებს.
„საქართველოს ბანკისთვის განათლების ხელშეწყობა ერთ-ერთი მთავარი პრიორიტეტია. ჩვენ ვაგრძელებთ განათლების მხარდაჭერას. იმისათვის რომ COVID 19-თან ბრძოლის პირობებში კიდევ უფრო მეტად ვიზრუნოთ ჩვენი მომავალი თაობის განვითარებაზე, გადავწყვიტეთ წიგნების თაროსთან ერთად სკოლის მოსწავლეებისთვის შეგვეთავაზებინა ახალი, უფასო და ყველასათვის ხელმისაწვდომი ონლაინ სკოლა, რომელიც სკოლის მოსწავლეებს დაეხმარება კომპლექსური განათლების მიღებაში. ბავშვები თამაშების და სხვადასხვა მულტიმედიური საშუალების დახმარებით ისწავლიან როგორც სასკოლო, ისე არასასკოლო საგნებს, რომლებიც მნიშვნელოვანია ბავშვის კომპლექსური განათლებისთვის“, - აცხადებენ „საქართველოს ბანკში“.
ახალგაზრდები ბავშვების მომავლისთვის - ასეთია „წიგნების თაროს“ ონლაინ სკოლის სლოგანი, რომლის მასწავლებლებიც მაყურებლისთვის საყვარელ სახეებად ქცეული თაროელები, ქვეყნის გამორჩეული ახალგაზრდები არიან.
სკოლაში სასწავლო პროცესი მაქსიმალურად ინტერაქციული და გასართობი იქნება. ბავშვები თამაშების და სხვადასხვა მულტიმედიური საშუალების დახმარებით ისწავლიან როგორც სასკოლო, ისე არასასკოლო საგნებს, რომლებიც მნიშვნელოვანია ბავშვის კომპლექსური განათლებისთვის: ქართული ენა, ინგლისური და გერმანული ენები, განმავითარებელი მათემატიკა, ადამიანი და ჯანმრთელობა, ბუნება, მითოლოგია, საქართველოს ისტორია, მე და საზოგადოება, ხატვა, მუსიკა, ხელოვნების ისტორია და მსოფლიო ლიტერატურა.
„პანდემიის პირობებში შექმნილი კრიზისიდან გამომდინარე დავიწყეთ ფიქრი, თუ როგორ გამოგვეყენებინა ჩვენი რესურსი ქვეყნის სასარგებლოდ. მალე გადავწყვიტეთ, რომ ჩვენს თაროელ ახალგაზრდებთან ერთად აგვეღო პასუხისმგებლობა და გვეზრუნა პატარებზე. სწორედ ასე წარმოიშვა იდეა შეგვექმნა „წიგნების თაროს“ ონლაინ სკოლა, რომელიც მიზნად ისახავს კრიზისის პერიოდში ბავშვებს სასარგებლოდ და სახალისოდ გაატარებინოს დრო და შემეცნების სიყვარული გაუღვივოს. „წიგნების თაროს“ სკოლაში კლასგარეშე გაკვეთილები ონლაინ-რეჟიმში წარიმართება, პროცესი იქნება მაქსიმალურად ინტერაქციული და თამაშებზე ორიენტირებული, რათა ბავშვებმა თან სახალისოდ გაატარონ დრო და თან ცოდნა მიიღონ. ჩვენი სკოლის მასწავლებლები იქნებიან „თაროელები“, ახალგაზრდები, რომლებიც უკვე შეიყვარა „წიგნების თაროს“ მაყურებელმა“, - განმარტავს „წიგნების თაროს“ წამყვანი ალექსანდრე ლორთქიფანიძე.
სკოლა ფუნქციონირებას 21 აპრილიდან დაიწყებს. გაკვეთილები 15:00-დან 18:00 საათამდე ჩატარდება. ერთი გაკვეთილის ხანგძლივობა იქნება 30 წუთი. ჯგუფებში მოსწავლეების რაოდენობა საგნების სპეციფიკის გათვალისწინებით განისაზღვრება. რეგისტრაცია შესაძლებელია როგორც ერთ, ისე ყველა საგანზე, 10 აპრილიდან 16 აპრილის ჩათვლით. რეგისტრაციის შევსება შესაძლებელია ბმულზე: https://docs.google.com/forms/d/e/1FAIpQLSeejK6wtIPC4UwuuH5AWM3is31xBZXErMz6CM194wm6BSZ9Sg/viewform
„ჩვენ გვჯერა, რომ ერთმანეთის გაფრთხილებით და ერთმანეთზე ზრუნვით ამ ურთულეს გამოწვევასაც ღირსეულად დავძლევთ და ერთად შევქმნით მომავალს. ახლა, ამ პირობებში მნიშვნელოვანია რომ არ გავჩერდეთ და გვახსოვდეს, რომ ერთად ყველაფერი შესაძლებელია“, - აცხადებენ საქართველოს ბანკში.
(R)