საქართველოს ბანკი განათლების ხელშეწყობას განაგრძობს. მომხმარებლის პროფესიული განვითარების ხელშეწყობისა და განათლების ხელმისაწვდომობის გაზრდის მიზნით, ბანკმა ახალი შემეცნებით-საგანმანათლებლო პლატფორმა „ბიზნესკურსი“ შექმნა. ბიზნესკურსის გავლა ბიზნესით დაინტერესებულ ნებისმიერ ადამიანს მისცემს შესაძლებლობას, კურსი სრულიად უფასოდ გაიაროს. პროექტის მთავარი მიზანია პლატფორმაზე განთავსებული მრავალფეროვანი ტრენინგების, ცოდნის თუ გამოცდილების გაზიარებით, ბიზნეს განათლება კიდევ უფრო მოსახერხებელი და ხელმისაწვდომი გახადოს. პროექტი EFSE განვითარების ცენტრის მხარდაჭერით ხორციელდება.
ბიზნესკურსის შექმნაში მაღალკვალიფიციური ლექტორები, კონსულტანტები და სხვადასხვა სფეროს პროფესიონალები მონაწილეობდნენ. შესაბამისად, პლატფორმა გამოირჩევა მრავალფეროვნებით და მომხმარებელს ბიზნესის შესახებ უამრავ საინტერესო კურსს, ვიდეოგაკვეთილს, პრეზენტაციას თუ დამატებით ლიტერატურას სთავაზობს. ამასთან, მიღებული ცოდნის შესამოწმებლად, ხელმისაწვდომი იქნება ტესტები.
ბიზნესკურსი ისეთ თემებს აერთიანებს, როგორიცაა:
- კომპანიის ფინანსური მაჩვენებლები - კურსის გავლის შემდეგ გაიგებთ, თუ როგორ გამოიყენოთ ფინანსური ინფორმაცია ეფექტური ბიზნესგადაწყეტილებების მისაღებად. ასევე დამოუკიდებლად შეძლებთ თქვენი კომპანიის ფინანსური მდგომარეობის შეფასებას და გაიღრმავებთ ცოდნას ამ მიმართულებით. კურსი შედგენილია ბიზნესსაკონსულტაციო კომპანია Ebit Group-ის დამფუძნებელი პარტნიორების − ვლად ბეჟაშვილისა და თამარ ჩხატარაშვილის − მიერ.
- მარაგების მართვა - კურსი დაგეხმარებათ უკეთ მართოთ მარაგები, შეამციროთ ამ პროცესთან დაკავშირებული ხარჯები და დაფიქრდეთ, თუ რატომ შეიძლება იყოს მარაგების მართვის გაციფრულება მნიშვნელოვანი. ასევე მიიღებთ ინფორმაციას საწყობის დაგეგმვის ძირითად ინსტრუმენტებზე, მარაგების მართვის სტრატეგიებსა და პოლიტიკის მიმართულებებზე, ავტომატიზაციის სისტემებზე და სხვ. მეტიც, აქვე გაიგებთ, თუ რა არის ABC / XYZ ანალიზი. კურსი შედგენილია საქართველოს ლოგისტიკის ასოციაციის თავჯდომარის, პროფესორ გიორგი დობორჯგინიძისა და კავკასიის უნივერსიტეტის ტრენინგცენტრის მიერ.
- ბიზნესგეგმის წერა - კურსის გავლის შემდეგ გეცოდინებათ, თუ რა მნიშვნელოვან საკითხებზე უნდა გაამახვილოთ ყურადღება როგორც ბიზნესგეგმის დაწერისას, ისე ბიზნესსაქმიანობის დაწყებისას. ასევე შეძლებთ ბიზნესგეგმის თქვენით, დამოუკიდებლად მომზადებას.
გარკვეულ პროგრამების სასწავლო პროცესის წარმატებით დასრულების შემდეგ გაიცემა შესაბამისი სერტიფიკატი.
„მოხარული ვართ, წარმოგიდგინოთ ახალი შემეცნებით-საგანმანათლებლო პლატფორმა „ბიზნესკურსი“, რომელიც ყველა იმ ადამიანისთვის შეიქმნა, ვინც ბიზნესით არის დაინტერესებული. პლათფორმა სრულიად უფასოა, მის შექმნაში კი სხვადასხვა სფეროს პროფესიონალებმა მიიღეს მონაწილეობა. სასიხარულოა, რომ კიდევ ერთხელ მოგვეცა შესაძლებლობა ჩვენი წვლილი შევიტანოთ ადამიანების განათლებასა და სამომავლო განვითარებაში. ჩვენ ვაგრძელებთ ახალი გზების პოვნას, რომ მეტმა ადამიანმა ირწმუნოს საკუთარი თავის და მიაღწიოს წარმატებას“, - განაცხადა საქართველოს ბანკის მცირე და საშუალო ბიზნესის მიმართულების ხელმძღვანელმა, ზურაბ მასურაშვილმა.
პლატფორმის შესახებ მეტი ინფორმაციისთვის ეწვიეთ ბმულს: https://www.businesscourse.ge/
EFSE განვითარების ცენტრის შესახებ: სამხრეთ-აღმოსავლეთ ევროპის „ევროპული ფონდის (EFSE DF) განვითარების ფონდი“ 2006 წელს ფონდის მანდატის განსახორციელებლად და მისი დაფინანსების განვითარების მიზნით შეიქმნა. ის სამიზნე ქვეყნებში ფინანსურ, ეფექტურ, მიზნობრივ და ინოვაციურ ტექნიკურ დახმარებას ახორციელებს. EFSE მეწარმეობის აკადემია არის EFSE DF განყოფილება, რომლის მიზანია მეწარმეების რესურსების მიწოდება, ტრენინგების ორგანიზება, ფინანსური მხარდაჭერის შესაძლებლობებისა და სხვა ინსტრუმენტების გაჩენა, რაც მათ კარგი იდეების წარმატებულ ბიზნესად გადაქცევაში შეუწყობს ხელს. მეტი ინფორმაციისთვის ეწვიეთ ბმულს: https://www.finance-in-motion.com/
(R)