საქართველოს ბანკი პანდემიით შექმნილი გამოწვევების პარალელურად ახალი შესაძლებლობების შექმნას განაგრძობს. ამ ეტაპზე ბანკმა წამყვან საკონსულტაციო და რეკრუტინგულ კომპანია „ინსორსის“ მხარდაჭერით ახალი პროექტის განხორციელება დაიწყო. 

პროექტის მიზანია პანდემიით გამოწვეული შრომის ბაზრის ცვლილებებზე ცნობადობის ზრდა. პროექტი ორიენტირებულია ადამიანებს ახალი გამოწვევები დაანახოს, მისცეს მიზეზი, ხელახლა დაიჯერონ საკუთარი თავის შესაძლებლობების, განავითარონ არსებული უნარები და რიგ შემთხვევაში,  ახალი, მომავლის პროფესიები შემოსავლის წყაროდ აქციონ. პროექტის  ფარგლებში დაგეგმილია ბაზარზე არსებული ტენდენციების შესახებ თოქებისა და ბლოგების მომზადება, რათა დაინტერესებულ პირებს ჰქონდეთ წვდომა ისეთ ინფორმაციაზე, როგორიცაა შრომის ბაზარზე  დღეს  არსებული ვითარება და  ასევე,  მომავლის პროფესიები.

„ახალი რეალობიდან გამომდინარე შეიცვალა მომხმარებლის ქცევა, დასაქმებისა და შრომითი ურთიერთობების პრაქტიკა, შესაბამისად შრომის ბაზარიც. კონკრეტულ პროფესიებზე შემცირებული მოთხოვნის კვალდაკვალ გაჩნდა ახალი პროფესიების საჭიროება, ისეთის როგორიცაა IT და ციფრული ტექნოლოგიები, საცალო და მომსახურების სერვისები.  გამოწვევაზე ლოგიკური  პასუხი არის ახალი უნარ-ჩვევების შეძენა. გვინდა ყველა იმ ადამიანს ვუთხრათ, რომლის საქმიანობამაც დაკარგა აქტუალობა, რომ მათ აქვთ შესაძლებლობა განვითარდნენ ახალი მიმართულებით. რომ ასეთ დროს მნიშვნელოვანია არ გაჩერდნენ და გააგრძელონ წინსვლა. სწორედ ამ მიზანს ემსახურება ახალი პროექტიც, რომელიც  ადამიანებს ეხმარება ახალი პროფესიების მოძიება / ათვისებაში, როგორიცაა გრაფიკული დიზაინი, ფოტოგრაფია, კონტენტ მენეჯმენტი ან თუნდაც ვებ დეველოპმენტი. ამიტომ ჩემი რჩევაა, არავითარ შემთხვევაში არ გაჩერდეთ და განავითარეთ საკუთარი თავი“,- განაცხადა საქართველოს ბანკის CSR მიმართულების ხელმძღვანელმა, თამარ გოჩაშვილმა.

საკონსულტაციო და რეკრუტინგული კომპანია „ინსორსის“ მენეჯერი მედეა ტაბატაძე ამბობს, რომ პანდემიის გამოცხადებიდან შრომის ბაზარზე შეინიშნებოდა პასიურობა, მაგრამ არ შეჩერებულა და კვლავ მზარდია მოთხოვნა ისეთ პროფესიებზე როგორიცაა გაყიდვების მენეჯერი, დისტრიბუტორი, შესყიდვების მენეჯერი და მოთხოვნა-მიწოდების სპეციალისტები.

„საქართველოს შრომის ბაზარი ტრანსფორმაციას განიცდის და საკმაოდ საინტერესო ტენდენციები შეინიშნება. მომავლის  პროფესია ყველა ის  საქმიანობაა, რომელიც ციფრულ ეკონომიკას და მომხმარებლის შეცვლილ ქცევას სჭირდება. ბიზნესის განვითარება გულისხმობს ტექნოლოგიურ განვითარებას და ვამბობთ, რომ დეველოპერები, მონაცემების ანალიტიკოსები, ციფრული კომუნიკაციების სპეციალისტები, ხელოვნურ ინტელექტზე მომუშავე პროფესიონალები და ზოგადად ყველა ის  საქმიანობა, რომელიც  ქმნის ან ცვლის ინფორმაციულ და კომუნიკაციების ტექნოლოგიებს მომავლის პროფესიებია. 

შესაძლებელია, რომ გარემოებები იმ ადამიანების სასარგებლოდ მოქმედებს, ვინც საკუთარ პროფესიებს გადახედეს, რადგან მათ  აქვთ შესაძლებლობა საკუთარი საქმიანობა სრულიად შეცვალონ, გახდნენ მაგალითად ვებ-დეველოპერები, ინფლუენსერები, ქოფირაითერები, ინდივიდუალური მეწარმეებიც კი. ამიტომაც შესაძლებელია, ბევრმა აიხდინოს ოცნება- აკეთოს საქმე, რომელიც გიყვარს და სარგებელიც მოაქვს“, - განაცხადა მედეა ტაბატაძემ.

(R)