საქართველოს აეროპორტების გაერთიანება ქუთაისის საერთაშორისო აეროპორტში და მის ტერიტორიაზე სარეკლამო მომსახურების მიზნით ექსკლუზიური უფლების გადაცემით აუქციონს აცხადებს. აუქციონში მონაწილეობის მიღების უფლება აქვს ყველა სუბიექტს, რომელსაც გააჩნია საქართველოში სამეწარმეო საქმიანობის განხორციელების უფლება და აკმაყოფილებს აუქციონით დადგენილ კრიტერიუმებს. მანამდე, 2014 წლიდან, ამ უფლებით კომპანია „ალმა“ სარგებლობდა, რომლის კონტრაქტსაც ვადა 2020-ში ამოეწურა.
აუქციონში გამარჯვებულმა კომპანიამ უნდა უზრუნველყოს აეროპორტის ტერმინალში ციფრული გამომსახველი მოწყობილობებისა და ე.წ. ლაითბოქსების განთავსება. აუქციონის ფარგლებში, ქუთაისის აეროპორტის გაფრენის დარბაზში უნდა განთავსდეს 220 კვადრატული მეტრის ლედ ეკრანი. აეროპორტის შესაბამისი აღჭურვის მიზნით, სარეკლამო მომსახურების უფლების მიმღებმა პირმა უნდა გასწიოს არანაკლებ 2 მლნ ლარის ინვესტიცია.
გამარჯვებულ კომპანიას დავით აღმაშენებლის სახელობის აეროპორტში სარეკლამო უფლებით სარგებლობა 10 წლის ვადით შეეძლება.
2014 წლის 22 აპრილს შპს „ალმა“ გახდა საქართველოს ყველა საერთაშორისო აეროპორტში რეკლამის განთავსების ექსკლუზიური უფლების მქონე კომპანია და ქუთაისის დავით აღმაშენებლის საერთაშორისო აეროპორტში სარეკლამო მომსახურებას 2020 წლის აპრილამდე ახორციელებდა.
როგორც საქართველოს აეროპორტების გაერთიანებაში გვითხრეს, მას შემდეგ რაც კორონავირუსის გავრცელების პრევენციის მიზნით დაწესებული შეზღუდვები მოიხსნა, საქართველოს აეროპორტების გაერთიანებამ ქუთაისის აეროპორტში ტენდერი გამოაცხადა.
“ შპს “ალმას“ ხელშეკრულების ვადა 2020 წლის აპრილში გაუვიდა, ტენდერი ახალი ვადით გამოცხადდა. ქუთაისის საერთაშორისო აეროპორტი განახლდა, 6-ჯერ გაიზარდა. ტენდერი მოიცავს შიდა და გარე ლანდშაფტსაც, შპს ალმას 6 წელი ჰქონდა ვადა, შემდეგ პანდემიის გამო აეროპორტი არ მუშაობდა, 2021 წლის 18 აპრილს ვიზეარმა დაიწყო ფრენების განხორციელება და ეტაპობრივად სხვა მიმართულებები და რეისები დაემატა“, - აცხადებენ საქართველოს აეროპორტების გაერთიანებაში.
აპირებს თუ არა შპს “ალმა“ აუქციონში მეორედ მონაწილეობას, ამ კითხვით „კომერსანტი“ კომპანიის დირექტორს გიორგი ტრაპაიძეს დაუკავშირდა. როგორც მან ჩვენთან საუბარში აღნიშნა, ამ ეტაპზე გადაწყვეტილი არ აქვს, მიიღებს თუ არა ტენდერში მონაწილეობას და დამატებითი კომენტარისგან თავი შეიკავა.
„კომერსანტი“ იგივე კითხვით სარეკლამო კომპანია „აუთმედიასაც“ დაუკავშირდა. როგორც კომპანიაში გვითხრეს, აუქციონში მონაწილეობას არ მიიღებენ, რადგან საინვესტიციო თანხა საკმაოდ მაღალა.
“არა ჩვენ არ ვაპირებთ მონაწილეობას, ძალიან ძვირია, რომც აიღო და ამხელა თანხა ჩადო, ვერ გააქირავებ, სხვაგანაც უნდა გქონდეს ქსელი, სარეკლამო ადგილი მხოლოდ ქუთაისზე ძალიან რთულია, ვერ გააქირავებ, როცა , სავარაუდოდ მაგას ისევ „ალმა“ აიღებს“, - აცხადებენ აუთმედიაში.
შპს “ალმა“ სარეკლამო მომსახურების განხორციელების ექსკლუზიურ უფლებას თბილისის და ბათუმის საერთაშორისო აეროპორტებშიც ფლობს.
აუქციონის საწყისი ფასი 7550 ლარია, ვაჭრობის ბიჯი შეადგენს 2000 ლარს, საგარანტიო თანხა კი 100 000 ლარია, ამ ეტპაზე არც ერთი ბიჯი არ გაკეთებულა.
გამარჯვებულ კომპანიას დავით აღმაშენებლის სახელობის აეროპორტში სარეკლამო უფლებით სარგებლობა 10 წლის ვადით შეეძლება. აუქციონი 19 ნოემბერს, 17:00 საათზე დასრულდება.
თაკო კვაჭანტირაძე