მსოფლიო ბანკმა ადამიანური კაპიტალის ინდექსის განახლებული ანგარიში გამოაქვეყნა. კვლევის თანახმად, საქართველოს ადამიანური კაპიტალის ინდექსის საერთო მაჩვენებელი 0.58-ია, რაც ნიშნავს, რომ ქვეყანაში დღეს დაბადებული ბავშვი სრული განათლებისა და სრულყოფილი ჯანმრთელობის შემთხვევაში, ზრდასრულ ასაკში თავისი შესაძლო პროდუქტიულობის 58%-ს მიაღწევს.
„საქართველომ ადამიანური კაპიტალის პროექტი ადრეულ ეტაპზევე დანერგა და თანმიმდევრულად ცდილობს თავისი მომავალი თაობების კეთილდღეობის ამაღლებას. ადამიანური კაპიტალის განვითარება კომპლექსური საკითხია და როგორც ვხედავთ, წინ მიმავალი გზა აღსავსეა გამოწვევებით, მაგრამ ჩვენი ნაყოფიერი პარტნიორობის სამი ათეული წელი გვიჩვენებს, რომ ერთად ნებისმიერი გამოწვევის დაძლევას შევძლებთ. ამიტომაც, კიდევ ერთხელ მსურს, გამოვხატო მსოფლიო ბანკის მხარდაჭერა საქართველოს ადამიანური კაპიტალის განვითარების რეფორმის მიმართ,“- აღნიშნა სამხრეთ კავკასიაში მსოფლიო ბანკის რეგიონულმა დირექტორმა სებასტიან მოლინეუსმა.
მიუხედავად იმისა, რომ საქართველოს 2020 წლის ადამიანური კაპიტალის მაჩვენებელი მეტია საშუალოზე მაღალი შემოსავლის მქონე ქვეყნების მონაცემზე და ქვეყნის 2010 წლის მაჩვენებელზე (რომელიც 0.54-ს შეადგენდა), ის აღმოსავლეთ ევროპისა და ცენტრალური აზიის რეგიონის საშუალო მაჩვენებელზე შედარებით დაბალია. საქართველოს მაჩვენებელი ყველაზე დაბალია რეგიონში.
მეზობელ ქვეყნებს შორის ვითარება ასეთია - სომხეთი - 0.59, აზერბაინაჯი 0,59, ყაზახეთი - 0,63, რუსეთი - 0,69, თურქეთი 0,66, უკრაინა 0, 64. ყველაზე მაღალი მაჩვენებელი პოსტსაბჭოთა სივრცეზე, ბალტიის ქვეყნების გარდა, ბელორუსიას აქვს - 0, 71. ეს თითქმის უტოლდება მაღალგანვითარებული ქვეყნების მაჩვენებელს - 0, 74-0,80.
საქართველოსთან მიახლოვებული ინდექსი აქვს ისეთ ქვეყნებს, როგორც ბრაზილია (0,56), ბოსნია (0,59), დომინიკას რესპუბლიკა (0,56), სალვადორი (56), გრენადა (0,58), ინდონეზია (0,55), ირანი (0,60), იამაიკა (0,55), იორდანია (0,56), და ა.შ.
წლევანდელ ანგარიშში შესულია 103 ქვეყნისთვის ადამიანური კაპიტალის განვითარების მაჩვენებლების ანალიზი 2010- დან 2020 წლამდე. ალბანეთი, აზერბაიჯანი და რუსეთი გლობალურად 10 წამყვან ქვეყანას შორის არიან, რომელთაც პროგრესს მიაღწიეს ჯანდაცვის და განათლების მიმართულებით. მსოფლიოში საუკეთესო მაჩვენებლები აქვთ სინგაპურს (89), იაპონიას (0,81), კანადას (0,81), ჰონკონგს (0,82), სამხრეთ კორეას(0,81), ჰოლანდიას (80), და ა.შ. ბოლო ადგილებზეა ცენტრალური აფრიკის რესპუბლიკა (0,32), ჩადი (0,32), ლიბერია (0,33), და ა.შ.