„ჯანდაცვაზე დახარჯული მილიონების მიუხედავად  საქართველოს 64 მუნიციპალიტეტიდან 39-ს რეანომობილი არ ჰყავს, რის გამოც ქვეყანაში პაციენტის გადაყვანის რამდენიმე შემთხვევა ფატალურად დასრულდა“- ამის შესახებ ინფორმაციას არასამთავრობო ორგანიზაცია ფლანგვის დეტექტორი ავრცელებს. მესამე სექტორის წარმომადგენლები ამბობენ, რომ სამედიცინო სისტემაში რეანომობილების დეფიციტია. მათი ინფორმაციით 64 მუნიციპალიტეტიდან რეანომობილი მხოლოდ 25-ს ჰყავს, ფლანგვის დეტექტორში აცხადებენ, რომ დეფიციტი განსაკუთრებით, მაღალმთიან რეგიონებშია. 

 ფლანგვის დეტექტორის მიერ მომზადებულ კვლევაში ვკითხულობთ, რომ მოსახლეობა არაერთ შემთხვევაზე მიუთითებს, როდესაც რეანომობილის არ არსებობის გამო მათ სიცოცხლესა და ჯანმრთლობას საფრთხე შეექმნა. ერთ-ერთი ესეთი ფაქტი 2017 წელს კურორტ გოდერძიზე მოხდარი ტრაგედიაა. სრიალის დროს მიღებული ტრამვის შედეგად 32 წლის მამაკაცი გარდაიცვალა. როგორც შემდგომში სამედიცინო რეგულირების სააგენტომ დაადგინა პაციენტის ტრანპორტირება არასათანადოდ აღჭურვილი ავტომობილით მოხდა, სადაც არ იყო ჟანგბადის ბალონები და დაზიანებული იყო საკაცე.

კიდევ ერთი ტრაგედია, რომლის შესახებაც ფლანგვის დეტექტორი საკუთარ კვლევაში წერს ამბლორალურის მუნიპალიტეტს ეხება. 2019 წლის ივნისში 16 წლის მოზარდის გადასაყვანად რეანომობილი ლენტეხიდან (ონსა და ამბროლაურში რეანომობილი არ ჰყავდათ) 2 საათის დაგვიანებით მივიდა ადგილობრივ საავადმყოფოში, ხოლო გზაში კიდევ რამდენიმე საათს შეყოვნდა ტექნიკური გაუმართაობის გამო. საბოლოოდ მოზარდის მდგომარეობა უკიდურესად დამძიმდა და ის გარდაიცვალა. ამბროალურის მოსახლეობამ პეტიციით მიმართა სამინისტროს და მხოლოდ ამის შემდეგ გადაეცა მუნიციპალიტეტს რეანომობილი.

არასამთავრობო ორგანიზაციის მიერ მომზადებულ კვლევაში ვკითხულობთ, რომ ჯანდაცვის სამინისტრომ, რომლის ბიუჯეტიც 2019 წელს 3,978,400,000 ლარი იყო, ხოლო 2020 წელს 4,363,000,000-ია,  2016 წლიდან დღემდე ორჯერ შეისყიდა ჯამში 17 ერთეული რეანომობილი. ბოლო შესყიდვა უწყებამ  2019 წლის ივნისში განახორციელა, როდესაც 10 ერთეული ავტომობილი შპს “იბერია ავტოსგან” 1,237,000 ლარად შეიძინა.

ფლანგვის დეტქორი დოკუმენტში სავარუდო კორუფციულ გარიგებაზე ამახვილებს ყურადღებას და წერს, რომ შპს „იბერია ავტო“ თავის მხრივ სპორტის ყოფილ მინისტრთან ტარიელ ხეჩიკაშვილთან ასოცირდება, 2017 წელს ის შპს „იბერია ავტოს“ პარტნიორი იყო.  2019 წელს კი შპს „იბერია ავტოს“ ერთ-ერთი პარტნიორი შპს ”იბერია ბიზნეს ჯგუფი” გახდა, რომელიც აგრეთვე ტარიელ ხეჩიკაშვილის დაარსებული შპს-ა. აღსანიშნავია ისიც, რომ ”იბერია ბიზნეს ჯგუფის”  დირექტორი დავით გოგორიშვილი ქართული ოცნების შემომწირველიცაა. (2016 და 2017 წლებში მან მმართველ პარტიას 1,000 და 2,000 ლარი შესწირა).

მესამე სექტორში განმარტავენ, რომ ჯანდაცვის სამინისტროს რეანომობილების უკანასკნელი შესყიდვისას ერთი ერთეული ავტომობილის შეძენა 176,700 ლარი დაუჯდა. იმისთვის, რომ მუნიციპალიტეტების უმრავლესობა იყოს აღჭურვილი ერთი რეანომობილით მაინც, საკმარისია კიდევ 20 რეანომობილის შესყიდვა მაინც (25+20=45 მუნიციპალიტეტს), რაც ბიუჯეტს უკანასკნელი შესყიდვის მიხედვით დაახლოებით 3,534,000 ლარი დაუჯდებოდა.

 ჯანდაცვის სფეროში არსებულ პრობლემებზე „კომერსანტი“ აქტიურად წერდა. სექტორი დღემდე დგას ისეთი გამოწვევბის წინაშე როგორიცაა კატასტროფის რეანომობილების ტექნიკური და პედიატრიული ბრიგადის გაუმართაობა, პრობლემად რჩება ექიმების კვალიფიკაცია, თუმცა აღსანიშნავია მათი შრომითი უფლებებიც, ხშირად ერთი და იგივე ბრიგადა კვირის განმავლობაში იმაზე მეტი დროით მორიგეობს, ვიდრე ამას კანონი ითვალისწინებს. გამოოწვევად რჩება გეოგრაფიული დაფარვის ზონის გაუთვლელობა, ქვეყანაში სამედიცინო დაწესებულებები არათანაბარზომიერადაა გადანაწილებული.  აღნიშნულ საკითხზე „კომერსანტთან“ ჯანდაცვის ექსპერტი ვატო სურგულაძე საუბრობს. იგი აცხადებს, რომ სახელმწიფო საკუთარი მოქალაქეების სიცოცხლეზე არ ზრუნავს, სწორედ ამიტომ მისი თქმით, აღნიშნულ პრობლემებზე სრული პასუხისმგებლობა ჯანდაცვის სამინისტროს ეკისრება.

 „რეანომობილი არის კატასტროფის შემდეგ ძირითადი დახმარების საშუალება.   უბედური შემთხვევის  შემდეგ, თუ სპეციალურად აღჭურვილი რეანომობილით 1 საათში  მოხერხდა საავადმყოფოში პაციენტის გადაყვანა იმ ადამიანის გადარჩენის ალბათობა მაღალია. ამ შემთხვევაში სახელმწიფომ უნდ აიღოს პასუხისმგებლობა თავის თავზე. რეანომობილებით ყველა რეგიონის აღჭურვა ეს მათ პასუხისმგებლობაში უნდა მოექცეს. უნდა ითქვას ისიც, რომ რეანომობილს სპეციალისტიც სჭირდება, რომლის სიმცირეცაა ქვეყანაში, ამიტომ აუცილებელია სახელმწიფომ კადრები გადაამზადოს. თანხები სწორად უნდა გადაანაწილონ,  რასაც ჩვენი მთავრობა არ აკეთებს. საქმე გვაქვს ადამიანების სიცოცხლესთან, ეს კი მათ არ აინტერესებთ,“- ამბობს ვატო სურგულაძე.

 ნათია ლომიძე