ზამთრის მოახლოებასთან და ტემპერატურის ცვლილებასთან ერთად საქართველომ ელექტროენერგიის იმპორტი დაიწყო, ხოლო ექსპორტი მინიმუმამდე დაიყვანა.
როგორც „კომერსანტს“ ენერგეტიკისა და წყალმომარაგების მარეგულირებელი ეროვნული კომისიის თავმჯდომარემ დავით ნარმანიამ განუცხადა, საქართველომ სექტემბრიდან ელექტროენერგიის იმპორტი დაიწყო. ნარმანიას თქმით, საქართველოს ელექტროენერგია აზერბაიჯანიდან შემოაქვს, ხოლო გასულ თვეში ექსპორტს, ისიც მცირე რაოდენობით სომხეთში ახორციელებდა.
„საქართველოს სახელმწიფო ელექტროსისტემის მონაცემებზე დაყრდნობით გეტყვით, რომ ელექტროენერგიის ექსპორტი სექტემბერში მცირე მოცულობით, მხოლოდ სომხეთში განხორციელდა. სხვა ქვეყნებში სექტემბერში ექსპორტი არ ყოფილა, რადგანაც სექტემბერი ჩვენს ენერგოსისტემაში მოხმარება იზრდება და გენერაცია მცირდება, გამომდინარე ჰიდროელექტრო სადგურების გამომუშავების შემცირებიდან. ამიტომაც საექსპორტო ელექტროენერგია ამ პერიოდიდან აღარ არის“, - განაცხადა ნარმანიამ.
სემეკ-ის თავმჯდომარის თქმით, სექტემბერში გენერაციამ 191,340 კვტ/სთ შეადგინა. მათ შორის მცირე ჰესების გამომუშავება 52,670 კვტ/სთ იყო. რაც შეეხება სომხეთში ექსპორტს სექტემბერში 3 113 კვტ/სთ შეადგინა.