2015 წლის შემდეგ პირველად, ღვინის ექსპორტი 8%-ით 10 თვეში $163 მლნ-მდე შემცირდა. კლება აღინიშნება ისეთ დიდ ბაზრებზე როგორებიცაა რუსეთი და ჩინეთი.
2001-2019 წლებში ღვინის ექსპორტის ჯამურმა მოცულობამ $1.646 მლრდ შეადგინა. ექსპორტიდს 67% - $1.1 მლრდ-ზე მეტი 2013-2019 წლებში რუსეთის ბაზრის ხელახალი გახნსის შემდეგ განხორციელდა.
2001-2005 წლებში ღვინის ექსპორტი 152%-ით $32 მლნ-დან $81 მლნ-მდე გაიზარდა. 2006 წელს გამოცხადებული რუსული ემბარგოს შემდეგ ის მკვეთრად $29 მლნ-მდე შემცირდა. მართალია 2008 წლიდან ისევ ზრდა დაიწყო, მაგრამ 2012 წელს ნიშნული ჯერ კიდევ $65-მლნ-ზე იყო გაჩერებული. 2013 წელს ღვინის ექსპორტი გაორმაგდა. 2014 წელს $180 მლნ-მდე გაიზრდა. 2015 წელს კი ისევ მკვეთრად $96 მლნ-მდე შემცირდა. იმ წელს ყირიმის ანექსიის გამო დაწესებული სანქციების შედეგად რუსეთის ეკონომიკა 2%-ით შემცირდა, ასევე გაუფასურდა რუბლი. მთავარ საექსპორტო პარტნიორში ეკონომიკურმა პრობლემებმა ღვინის ექსპორტის თითქმის გაანახევრა, და 2018 წლამდე ძველ მაჩვენებელს ვეღარ მიაღწია. რეკორდული რაოდენობის - $223 მლნ-ს ექსპორტი კი 2019 წელს განხორციელდა.
საუკუნის დასაწყისში, 2001 წელს ღვინის წილი მთელს ექსპორტში 10%-ს აჭარბებდა, 2007 წელს 2.4%-მდე შემცირდა, 2019 წელს 5.9%-მდე გაიზარდა.
2020 წლამდე ღვინის ექსპორტის 65%-ზე, რაოდენობრივად კი 55%-ზე მეტი რუსეთზე მოდიოდა. საექსპორტო თანხასა და ბოთლების რაოდენობას შორის სხვაობას საექსპორტო ღირებულება განაპირობებს. რუსეთში ქართული ღვინო უფრო იაფია, ვიდრე ევროპაში.
მიმდინარე წლის 9 თვეში რუსეთში ღვინის ექსპორტი $12 მლნ-ით $95 მლნ-მდე შემცირდა, აბსოლუტურ მაჩვენებელთან ერთად 2%-ით 58%-მდე შემცირდა რუსეთის წილი ღვინის ექსპორტში. $15 მლნ-დან $11 მლნ-მდეა შემცირებული ექსპორტი ჩინეთშიც.
8%-იანი კლების ტემპის შენარჩუნების შემთხვევაში, ღვინის ექსპორტი 2020 წელს $205 მლნ-მდე შეცმცირდება, რაც მცირედით აღემატება 2018 წლის მაჩვენებელს.
ღვინისგან განსხვავებით, ჯამური ექსპორტი 10 თვეში უფრო მეტად - 11.1%-ით $2.715 მლრდ-მდე შემცირდა, რაც 2018 წლის დონესაც ჩამორჩება.
გიორგი ელიზბარაშვილი