ავტომობილების რეექსპორტში ტენდენცია იცვლება და მოთხოვნა ძირითადად მეზობელ რეგიონებში, განსაკუთრებით, აზერბაიჯანში მატულობს. ცვლილება მეორადი ავტომობილების ხარჯზეა, განსაკუთრებით მაღალი მოთხოვნით კი ოპელი სარგებლობს. საავტომობილო ბაზრის ახალი ტენდენციის შესახებ ,,კომერსანტთან“ კომპანია ,,რობანი მოტორსის“ დამფუძნებელი ელგუჯა ჯამაგიძე საუბრობს.
„ბაზარზე დიდი ცვლილებები არ არის, თუმცა, ზოგადად, პანდემიასთან მიმართებაში, ბაზარმა რაღაცნაირად ადაპტაცია განიცადა და მცირედით გაუმჯობესდა ვითარება. ეს არ ნიშნავს იმას, რომ გაყიდვები საგრძნობლად გაიზარდა, თუმცა რიგი მიმართულებით პოზიტიური ძვრებია. მაგალითად, აზერბაიჯანიდან გაიზარდა მოთხოვნა. ეს ეხება ოპელის მარკის 2006-2010 წლებში გამოშვებულ ავტომობილებს, რომელთა ფასი 2,800-3500 დოლარის ფარგლებში მერყეობს. ეს მანქანები ევრო4-ის სტანდარტს მეტნაკლებად აკმაყოფილებენ. საქართველოდან აზერბაიჯანის მიმართულებით უფრო ასეთი ავტომობილები გადის, ახალი - ნაკლებად. აზერბაიჯანელ ავტოიმპორტიორებს უკვე პირდაპირი კავშირი აქვთ ევროპასთან და თუ რამე სჭირდებათ, გარკვეულწილად, თვითონ აგვარებენ. საქართველოს ბაზარი სჭირდებათ მაშინ, როცა ბაზარზე სწრაფი მოთხოვნის დაკმაყოფილება უწევთ, ძირითადად, მათი უმეტესობა მცირე და საშუალო დონის ავტოდილერები არიან“, - განმარტავს ელგუჯა ჯამაგიძე.
შეგახსენებთ, რომ წლების წინ საქართველოსთვის აზერბაიჯანი ერთ-ერთი წამყვანი ქვეყანა იყო რეექსპორტის მიმართულებით, მაგრამ მოგვიანებით, 2014 წელს აზერბაიჯანი „ევრო-4“-ის სტანდარტზე გადავიდა და ქვეყანაში 2005 წლამდე გამოშვებული ავტომანქანების შეყვანა აიკრძალა. ამან ქართველი ავტოდილერები მნიშვნელოვნად დააზარალა.
ამ ეტაპზე, როგორც ავტოდილერი ,,კომერსანტთან“ ამბობს, საქართველოში ავტომობილები ძირითადად იაპონიიდან და ამერიკიდან შემოდის, რომლებიც შეკეთების შემდეგ ადგილობრივ და რეგიონის ბაზრებზე იყიდება.
შედეგად, ავტომობილები საქართველოს საგარეო ვაჭრობის ერთ-ერთი წამყვანი საქონელია. 2017-2020 წლებში ქვეყანამ რეექსპორტიდან საშუალოდ $1,5 მლრდ ლარის შემოსავალი მიიღო, 2019 წელს კი მანქანების რეექსპორტიდან მიღებული შემოსავალი $834 მლნ იყო, ხოლო 2020 წელს - $437 მლნ.
რაც შეეხება კონკრეტულად აზერბაიჯანის ბაზარს, საქართველოს სტატისტიკის ეროვნული სამსახურის მონაცემებით, მიმდინარე წლის იანვარ-აგვისტოში საქართველოდან ამ მიმართულებით $163,2 მლნ–ის ღირებულების სამგზავრო ავტომობილის რეექსპორტი განხორციელდა. რაოდენობრივად ეს არის 24 508 ერთეული ავტომობილი.
აზერბაიჯანში ექსპორტზე გატანილი მანქანების რაოდენობა წლიურად 9 519 ერთეულით, 63,5%-ით არის გაზრდილი.
მარი ჩიტაია