საქართველო 2023 წელს, მსოფლიოში ყველაზე დიდი ტურისტული გამოფენა-ბაზრობის ITB Berlin-ის მასპინძელი ქვეყანა იქნება. ამის შესახებ ეკონომიკის მინისტრის მოადგილემ მარიამ ქვრივიშვილმა პარლამენტში საკომიტეტო მოსმენაზე განაცხადა.
მისივე თქმით, 2023 წელს საქართველო მსოფლიო ყურადღების ეპიცენტრში იქნება ეს გამარჯვება 20-მდე ქვეყნის კონკურენციის პირობებში მოიპოვა.
“ეს არის ყველაზე მნიშვნელოვანი მოვლენა, როდესაც ვსაუბრობთ ქვეყნის ცნობადობის გაზრდაზე. ITB Berlin არის პირველი ტურისტული გამოფენა, სადაც მსოფლიოდან ფაქტობრივად ყველა ტურისტული კომპანია, ავიაკომპანია, ყველა ბლოგერი, ჟურნალისტი - ანუ ყველა იქნება იმ ადგილას, ვინც გვინდა, რომ საქართველოს ცნობადობის გაზრდაში თავისი წვლილი შეიტანოს.
ჩვენ ამ გამარჯვებით ვიღებთ დაახლოებით 1 მილიარდიან აუდიტორიაზე წვდომას, 37–მილიონიანი ევროს ღირებულების მედია დაფარვას, რა თქმა უნდა მსოფლიოში წამყვან მედია პლატფორმებზე საქართველოს რეკლამირებას, ჩვენთან ერთად იქნება კერძო სექტორი“, - აღნიშნა მარიამ ქვრივიშვილმა.
გარდა ამისა, 2023 წელს საქართველო, კონკრეტულად ბაკურიანი, თხილამურსა და სნოუბორდში თავისუფალი სტილით სრიალში ჩემპიონატის მასპინძელი იქნება.
“ეს არის ძალიან დიდი მნიშვნელობის მატარებელი, ყველა იმ ქვეყნისთვის, რომელსაც აქვს სამთო-სათხილამურო კურორტები და რა თქმა უნდა ცდილობს, რომ ამ მხრივ გაიძლიეროს პოზიციონირება.
საქართველოში ჩამოვა არა მხოლოდ უამრავი ვიზიტორი, სპორტსმენი და მსოფლიო დონის ჩემპიონი, არამედ ამავე დროს ჩვენ გვექნება მილიონობით ევროს მსოფლიო დონის გაშუქება“, - განაცხადა მარიამ ქვრივიშვილმა.
business-partner.ge