უკრაინა საქართველოსთან ავიამიმოსვლას 1-ლი ივლისიდან განაახლებს, - ამის შესახებ უკრაინის ინფარასტრუქტურისა და ტრანსპორტის მინისტრმა ვლადისლავ კრიკლიმ საქართველოს ეკონომიკისა და მდგრადი განვითარების მინისტრთან, ნათია თურნავასთან გამართული ონლაინ შეხვედრის შემდეგ „ფეისბუქის საკუთარ გვერდზე დაწერა.
უკრაინის ინფრასტრუქტურისა და ტრანსპორტის მინისტრის განცხადებით, უკრაინამ სხვადასხვა ქვეყნის მთავრობებთან საერთაშორისო ფრენების აღდგენის შესახებ მოლაპრაკებები დაიწყო.
„უკვე 1 ივლისიდან ვგეგმავთ პირველი რეგულარული რეისის განხორციელებას საქართველოში. ჩვენ ასევე ვაგრძელებთ რეგიონული აეროპორტების განვითარებას, რადგან ვხვდებით, რომ ყველა საზღვარი ერთ დღეში ვერ გაიხსნება და მსოფლიო აღარ იქნება ისეთი, როგორიც კარანტინამდე იყო. დიახ, ივნისში ჩვენ ვგეგმავთ, ოდესაში აეროპორტის რეკონსტრუქციას, დნეპრის აეროპორტის მოდერნიზებას და სხვა, - წერს ვლადისლავ კრიკლი.
ეკონომიკისა და მდგრადი განვითარების მინისტრმა ნათია თურნავამ უკრაინის ინფრასტრუქტურისა და ტრანსპორტის მინისტრთან ონლაინ შეხვედრა ორი დღის წინ გამართა. შეხვედრაზე პირდაპირი ავიამიმოსვლის აღდგენის გარდა, ეკონომიკის სხვა სფეროებში ორ ქვეყანას შორის ორმხივი თანამშრომლობის საკითხებიც განიხილეს.
„პირდაპირი საჰაერო მიმოსვლა საქართველოსა და უკრაინას შორის პანდემიამდე ძალიან აქტიური იყო. სამი უკრაინული ავიაკომპანია ასრულებდა რეგულარულ რეისებს ორი ქვეყნის ქალაქებში. გამოითქვა მზადყოფნა, ყველა ეპიდემიოლოგიური ნორმისა და პროტოკოლის დაცვით, რაც შეიძლება სწრაფად შევძლოთ უსაფრთხო, „მწვანე კორიდორის” შექმნა ჩვენს ქვეყნებს შორის. ამას ისიც უწყობს ხელს, რომ ავიაკომპანიებიც გამოთქვამენ მზადყოფნას, რომ ფრენები აღადგინონ,” – განაცხადა ნათია თურნავამ.
აღსანიშნავია, რომ COVID-19-ის ეპიდემიამდე საქართველო-უკრაინას შორის რეგულარულ ფრენებზე 4 ავიაკომპანია ოპერირებდა: ერთი ქართული (Georgian Airways) და 3 უკრაინული (SkyUp Airlines, FlyUIA, YanAir Airlines).
ამ დროისათვის კი უკრანა-საქართველოს შორის ფრენების განახლებაზე ოფიციალური განაცხადი გაკეთებული აქვს SkyUp Airlines-სა და YanAir Airlines-ს