პანდემიის მძიმე შედეგებმა კიდევ ერთხელ დაადასტურა, რომ მცირე და საშუალო ბიზნესი, რომელსაც დღეს ეკონომიკის ხერხემალს უწოდებენ მეტ განვითარებას, დაკვირვებასა და კვლევას საჭიროებს. საქართველოსთვის მცირე და საშუალო ბიზნესების მომგებიანობა დასაქმების პრობლემასთან აშკარა ბმაში რომ არის, ამის შესახებ „კომერსანტთან“ ევროპულმა ბიზნეს ასოციაციამაც ისაუბრა. ასოციაციის პრეზიდენტს ჯონ ბრაეკეველდტს, ბელგიის მაგალითი მოჰყავს, რომელიც მცირე და საშუალო ბიზნესის ქვეყანაა და ამჟამად უმუშევრობის პრობლემა არ დგას ამ სფეროს განვითარების მაღალი მაჩვენებლის გამო.
„აშკარაა, რომ სახელმწიფოს მხრიდან მცირე და საშუალო ბიზნესებზე უფრო მეტი აქცენტი უნდა გაკეთდეს. მცირე და საშუალო ბიზნესი ბევრად მომგებიანია ისეთი ქვეყნისთვის, როგორიც საქართველოა. რაც უფრო მეტი ასეთი ბიზნესი იარსებებს, მეტი გადასახადის გადახდა ხდება და მეტი შემოსავალი მოდის ბიუჯეტში. პრობლემა არის ის, რომ საქართველოში ბევრი დიდი კომპანიაა. ევროპის ბიზნეს ასოციაციის წევრების უმეტესობა მცირე და საშუალო ბიზნესის წარმომადგენელია. ისინი ეძებენ ექსპორტის ან იმპორტის შესაძლებლობებს საქართველოსთან, მაგრამ მათ შანსი არ აქვთ რომ საკუთარი თავი და საქმიანობა განავითარონ. პირველი რაც უნდა გაკეთდეს არის ის, რომ მთავრობამ მეტი ყურადღება მიაქციოს კანონმდებლობას და დაიცვას მეტი მცირე და საშუალო ბიზნეს კომპანია," — ამბობს ევროპული ბიზნეს ასოციაციის პრეზიდენტი.
რა ხარვეზები აქვს დღეს არსებულ სახელმწიფო პროგრამებს და რა როლი შეუძლია ითამაშოს მცირე და საშუალო ბიზნესს უმუშევრობის პრობლემის მოგვარებაში, ბრაეკეველდტის განმარტებით ქვეყანაში არ ხდება ჩაშვებული სახელმწიფო პროგრამების მონიტრინგი, დაკვირვება. არ ხდება დაინტერესება იმით, თუ რა პროგრამამ რა როლი ითამაშა დარგის წინსვლაში, რათა შემდგომ მისი გაუმჯობესება მოხდეს.
"ვიცით, რომ ბევრი სახელმწიფო პროგრამა არსებობს მცირე და საშუალო ბიზნესებისთვის მაგრამ პრობლემა ისაა, რომ ამ პროგრამებს მუდმივი მონიტორინგი სჭირდება. რა არის მათი შედეგი, მათი გავლენა. რატომ არ შეგვიძლია მეტი ასეთი კომპანიის დახმარება?- ამას კვლევა სჭირდება. შეიძლება ეს პროგრამები კარგიც კია, მაგრამ გაუმჯობესება სჭირდება და რაც არის, საკმარისი არაა.
რაც მეტი მცირე და საშუალო ბიზნესი იქნება ქვეყანაში, მეტი დასაქმებულიც გვეყოლება. როცა დიდი კომპანია გაქვს ის უფრო მეტად ახდენს საქმიანობის ავტომატიზებას. დიდი დამსაქმებლები საქართველოსთვის კარგია, მხოლოდ ხანმოკლე ვადით. მცირე და საშუალო ბიზნესი კი თვითომ განვითარებას ნიშნავს, რაც მომავალში მეტი გასაქანის საშუალებას იძლევა. უმუშევრობის პრობლემასთან დაკავშირებით ბელგიის მაგალითი შემიძლია მოვიყვანო. ბელგია მცირე და საშუალო ბიზნესის ქვეყანაა, ჩვენ უმუშევრობა არ გვაწუხებს იმიტომ, რომ ეს სექტორი განვითარებულია. ქვეყანაში ბევრი შესაძლებლობაა დასაქმებისთვის. საქართველოსთვის ბევრი სექტორი შეიძლება გახდეს მოწინავე, როგორიცაა ტრანსპორტის სექტორი და ტურიზმი რომელიც ახლა პრიორიტეტია,“ - განმარტავს ჯონ ბრაეკეველდტი.