საქართველოში ბუნებრივი გაზის მოხმარების საპროგნოზო მაჩვენებელი 2021 წელს 6.1%-ით 2.730 მლრდ კუბურ მეტრამდე იზრდება. ბრძანება #1-1/573-ს ხელს ეკონომიკის მინისტრი ნათია თურნავა აწერს.
პირველად მისი 15 წლიანი არსებობის მანძილზე საქართველო შაჰ-დენიზის გაზსადენიდან 1 მლრდ კუბურ მეტრზე მეტ ბუნებრივ გაზს მიიღებს. უფრო ზუსტად 16.1%-ით ანუ 141 მლნ კუბური მეტრით 1.015 მლრდ კუბურ მეტრამდე.
გაზსადენი ექსპლუატაციაში 2006 წელს შევიდა. მისი საერთო სიგრძე 970 კილომეტრია და საქართველოზე 280 კმ გადის. შაჰ-დენიზი 2-ის დასრულების შემდეგ ტრანზიტული გაზის მოცულობა 9-დან 16 მლრდ კუბურ მეტრამდე გაიზარდა. მესამე ფაზის დასრულების შემდეგ, რაც 2030 წლისთვისაა ნავარაუდევი, საქართველოზე 28 მლრდ კუბური მეტრი გაზი გაივლის, საიდანაც ქვეყანაში 1.4 მლრდ კუბური მეტრი დარჩება.
2020 წლის ბოლოდან შაჰ-დენიზის გაზით ევროკავშირის მომარაგებაც დაიწყო. სულ დაგეგმილია გაზის 7 ქვეყნისთვის მიწოდება. უმსხვილესი შემსყიდველები საბერძნეთი და ალბანეთი არიან.
მიუხედავად იმისა რომ ზუსტი ფასი გასაიდუმლოებულია, ცნობილია ის, რომ შაჰ-დენიზიდან მიღებული გაზი ყველაზე იაფია და 1000 კუბურ მეტრზე დაახლოებით $60-ის ფარგლებში მერყეობს, რაც ჯამური მოხმარების გასაშუალებულ ფასთან შედარებით 2-ჯერ ნაკლებია.
აზერბაიჯანული სახელმწიფო კომპანია სოკარის წილი უმნიშვნელოდ 7 მლნ კუბური მეტრით 1.504 მლრდ კუბურ მეტრამდეა შემცირებული. 18%-ით 170 მლნ-დან 200 მლნ კუბურ მეტრამდე გაზრიდილი რუსეთიდან მისაღები გაზის სავარაუდო მოცულობაც. ადგილობრივი მოპოვების ისედაც უმნიშვნელო წილი კიდევ უფრო მეტად 18 მლნ-დან 11 მლნ კუბურ მეტრამდეა შემცირებული.
რაც შეეხება მოხმარებას, გაზრდილია მხოლოდ სოციალური გაზის წილი. კერძოდ თბოსადგურებზე 600 მლნ-დან 665 მლნ კუბურ მეტრამდე და მოსახლეობისთვის 1.026 მლრდ-დან 1.130 მლრდ კუბურ მეტრამდე. კომერციული მოხმარების წილი პირიქით 912 მლნ-დან 900 მლნ კუბურ მეტრამდეა შემცირებული.
უცვლელია დანაკარგების მოცულობა და ის 35 მლნ კუბური მეტრით განისაზღვრა.
გიორგი ელიზბარაშვილი
გაზი
