მომავალი წლის პირველ იანვრიდან „ლიბერთი ბანკში“ საპენსიო სესხების ზედა ზღვარი 26% იქნება, - ამის შესახებ საპარლამენტო უმრავლესობის წევრმა ირაკლი ზარქუამ და საპარლამენტო პოლიტიკური ჯგუფის „მოქალაქეების“ თავმჯდომარემ, ალეკო ელისაშვილმა ბრიფინგზე განაცხადეს. ინფორმაციას პარლამენტის პრესსამსახური ავრცელებს.
„გაუმჯობესებული პირობები შეეხება, მათ შორის, თანხის უფასო შეტანა/გამოტანას, კომუნალურების გადახდას და რაც მთავარია, საპენსიო სესხების ზედა პროცენტი 26% იქნება. ეს არის ჩვენი მთავარი შედეგი, რისთვისაც დავიწყეთ ამ ინიციატივაზე მუშაობა. მოგეხსენებათ, მანამდე საპენსიო სესხის გაცემა 35- 36% პროცენტებში ხდებოდა“, - აღნიშნა ირაკლი ზარქუამ. მისი თქმით, აღნიშნული შედეგი აჩვენებს როგორ შეიძლება ოპოზიციამ, რომელიც აქცენტირებულია მოსახლეობის ინტერესებზე და მათ საჭიროებებზე, მმართველ პარტიასთან ერთად კარგი შედეგი დადოს, როცა ამის სურვილი ორივე მხრიდან არსებობს.
„ბოლო პერიოდში აქტუალური იყო პენსიონერებისთვის მოქნილი პირობების შეთავაზება. ამასთან დაკავშირებით, პირველი დღიდან, რაც პარლამენტში შემოვედი, სწორედ, „ქართული ოცნებიდან“ ვიყავი ამ თემის ინიციატორი. შემდეგ, როცა ბატონები - ელისაშვილი და იოსელიანი შემოვიდნენ პარლამენტში, მათ ასევე გამოთქვეს სურვილი და დაინტერესდნენ ამ თემით. ამიტომ, ჩვენ ერთობლივად შეუდექით ამ კომისიის შექმნის იდეის განხორციელებას, შემდეგ კი, შემოგვიერთდა ოპოზიციის გარკვეული ნაწილი. ჩვენ, ამ პერიოდის განმავლობაში შევძელით ის, რომ მთავრობიდან, ირაკლი ღარიბაშვილის ინიციატივით, შეიქმნა დიდი ერთობლივი კომისია, რომელშიც შედიოდნენ ცალკეული მინისტრები, ცალკეული დეპუტატები, მათ შორის, ეროვნული ბანკის წარმომადგენლები. შედეგი მივიღეთ ის, რომ მოქნილი პირობები შედეგად, ტენდერი დაიწყო11 მაისს, ხოლო 16 მაისს უკვე გამოვლინდა პრეტენდენტი, ვინც განაცხადი შემოიტანა“, - განაცხადა საპარლამენტო უმრავლესობის წევრმა.
ირაკლი ზარქუამ აღნიშნა, რომ „ლიბერთი ბანკთან“ ხელშეკრულება ითვალისწინებს შვიდწლიან პერიოდს და ამ დროის განმავლობაში მოქნილი პირობები შენარჩუნებული იქნება.
ალეკო ელისაშვილის განცხადებით, საარჩევნო რეფორმის შემდეგ, ეს იყო მეორე შემთხვევა, როცა, ერთად, საერთო ძალისხმევით, მმართველ პარტიამ და ოპოზიციამ შედეგს მიაღწია. „საერთო ძალისხმევით შევძელით ის, რომ ბანკი აღარ გაძარცვას პენსიონერებს. არაადამიანურ პროცენტში არათუ აღარ მისცემს, ვეღარ მისცემ სესხს და მაქსიმალური იქნება 26%. ეს თავიდანვე სატენდერო პირობებში ჩადებული ზღვარი იყო.
„ლიბერთი ბანკი“ ვეღარ მისცემს ჩვენს ასაკოვან, პატივსაცემ ადამიანებს, პენსიონერებს მაღალ პროცენტში სესხს. ეს, რა თქმა უნდ, არ გაამდიდრებს ჩვენ პენსიონერებს, მაგრამ ეს არის ერთი ნაბიჯი წინ და ეს იქნება ერთი ნაბიჯი იმისთვის, რომ პენსიონერებს შეუმსუბუქდეთ ყოფა და არ მოხდეს ის, რაც ხდებოდა“, - აღნიშნა პოლიტიკური ჯგუფის „მოქალაქეების“ თავმჯდომარემ.