დღეს, საპენსიო სააგენტომ, საინვესტიციო პოლიტიკის დოკუმენტის პრეზენტაცია გამართა. ინფორმაციას სააგენტო ავრცელებს.

საპენსიო სააგენტოს დირექტორის მოვალეობის შემსრულებელმა გიორგი ჭიჭინაძემ სააგენტოში არსებული სტატისტიკა მოწვეულ სტუმრებს გააცნო. საპენსიო სააგენტოს საინვესტიციო საბჭოს მთავარმა საინვესტიციო ოფიცერმა, გოგა მელიქიძემ ვრცლად ისაუბრა საინვესტიციო პროცესებზე, ხოლო საინვესტიციო საბჭოს თავმჯდომარე ოლივიერ რუსსო ონლაინ ჩაერთო.

ასევე, დოკუმენტი შეაფასა ეროვნული ბანკის კაპიტალის ბაზრის დეპარტამენტის უფროსმა სალომე სხირტლაძემ. მოგეხსენებათ, რომ საინვესტიციო პოლიტიკა უმნიშვნელოვანესი დოკუმენტია და განსაზღვრავს საპენსიო აქტივების განთავსების გრძელვადიან სტრატეგიას. ეს პოლიტიკა, კანონთან და რეგულაციებთან ერთად, წარმოადგენს საინვესტიციო საქმიანობის მთავარ საინვესტიციო დოკუმენტს და განსაზღვრავს ისეთ საკითხებს, როგორიცაა საინვესტიციო მიზნები, რისკების მართვა და საინვესტიციო პროცესები. საინვესტიციო პოლიტიკის დოკუმენტი საშუალებას გვაძლევს, რომ საინვესტიციო პორტფელი გახდეს გაცილებით დივერსიფიცირებული და მიმართული გრძელვადიან რეალურ ამონაგებზე. საპენსიო სააგენტოს მიზანია, შეინარჩუნოს დაბალრისკიანი პორტფელი და ამავდროულად მიიღოს რაც შეიძლება მაღალი რეალური ამონაგები. არსებული საინვესტიციო პორტფელი საკმაოდ მიმზიდველია, რამეთუ, მას უკვე დაერიცხა 100 მილიონ ლარამდე სარგებელი. საინვესტიციო პორტფელის წლიური ეფექტური მომგებიანობა 11.1%-ს შეადგენს, რაც მიმდინარე ინფლაციას 2.3-ჯერ აღემატება.

„საქართველოს ეროვნული ბანკი არის საპენსიო სააგენტოს საინვესტიციო სამსახურის ზედამხედველი, რაც შეეხება თავად საინვესტიციო დოკუმენტს, ეს არის ძალიან მნიშვნელოვანი დოკუმენტი, ის განსაზღვრავს საპენსიო სააგენტოს საქმიანობის სტრატეგიას და აწესებს შეზღუდვებს თუ ლიმიტებს, რომელიც უკავშირდება საინვესტიციო საქმიანობას. ჩვენ დეტალურად შევაფასეთ ეს დოკუმენტი და აქტიურად ვიყავით ჩართული მისი შემუშავების პროცესში, ჩვენი შეფასება არის დადებითი, ვფიქრობთ, რომ დოკუმენტი სრულიად შეესაბამება საქართველოს კანონმდებლობით დადგენილ მოთხოვნებს და ასევე ითვალისწინებს კარგ საერთაშორისო პრაქტიკასაც. ეროვნული ბანკის როლი არის საინვესტიციო საქმიანობის ზედამხედველობა, რაც გულისხმობს, იმას, რომ ეროვნული ბანკი გაუწევს მონიტორინგს/ზედამხედველობას საპენსიო საინვესტიციო საქმიანობას, იმას თუ რამდენად შეესაბამება ეს საქმიანობა საინვესტიციო პოლიტიკით განსაზღვრულ მითითებებს, რამდენად აკმაყოფილებს ეს საქმიანობა დადგენილ რისკების ლიმიტებს, ეს იქნება ძირითადად ჩვენი შეფასების მთავარი ამოცანა. თუ როგორ იქნება თანხა დაცული და რა იქნება პორტფელის მომგებიანობა, ეს დიდწილად დამოკიდებულია თვითონ დოკუმენტის საინვესტიციო სტრატეგიაზე, თუ როგორ მოხდება ამ თანხების ინვესტირება პორტფელების მიხედვით. საინვესტიციო სამსახურის მთავარი მიზანია 95% ალბათობით უზრუნველყონ დადებითი ამონაგები ამ პორტფელიდან“ - აცხადებს სალომე სხირტლაძე.