საპატიო კონსულის თანამდებობა არ უნდა იყოს უპირობო ჯილდო. ჩვენი სურვილი არის რომ ბევრმა ნიჭიერმა ადამიანმა მოიყაროს თავი და სიმართლეს რომ გავუსწოროთ თვალი, ნიჭიერი და უნარიანი ადამიანების მოზიდვა ისე რომ მათ შესატყვისი პირობები არ შევთავაზოთ, არ გამოვა. საპატიო კონსულების შემთხვევაში საკომპენსაციო ანაზღაურების თემაზე ვიფიქრებდი ანუ არის ძალოისხმევა, არის შედეგი, შესაბამისად იქნება უკუგება, — აღნიშნა „ჯეოქეისის“ თავმჯდომარე ვიქტორ ყიფიანმა, გადაცემაში „ბიზნეს ინსაიდერი” გიორგი აბაშიშვილთან ერთად.

ვიქტორ ყიფიანი განმარტავს, რომ ეკონომიკური დიპლომატიის კუთხით მოქნილი წესები უფრო მისაღებია.

„ეკონომიკური დიპლომატიის კუთხით მე მაინც უფრო მოქნილ წესებს ვინატრებდი, რომ კავშირების უწყვეტობა, როდესაც გარკვეული ბიზნეს ურთიერთობებს აგებ და ამას სჭირდება გარკვეული მოთმინება, დრო და ვადა, კონკრეტულ ადამიანთან არის პერსონიფიცირებული და შემდეგ მისი ამოგლეჯა სურათიდან და სხვა სახით ჩანაცვლება როცა გარეთ მოღვაწე პიროვნებაზე, ეკონომიკურ დიპლომატზე ვსაუბრობთ, ეს ალბათ შეცდომა იქნება. 

საპატიო კონსული იქნება თუ დიასპორის წარმომადგენელი, კონკრეტული სახელდებას ალბათ უფრო მეორადი მნიშვნელობა აქვს. ერთი პერიოდი ეს ინსტიტუტი დაქვეითდა და ახლა მისი ზედაპირზე წამოწევა, როდესაც ჩვენი დიპლომატია იმდენად მდიდარი არ არის რომ მთელ სამყაროს მოედოს, რა თქმა უნდა საპატიო კონსულების ინსტიტუტი ერთგვარი განშტოება არის და ამით ჩვენ ნაკლები დანახარჯით და ნაკლები რესურსით, შეიძლება იგივე შედეგი მივიღოთ რაც იმ შემთხვევაში, ყველა ქვეყანაში რომ გვყავდეს წარმომადგენელი და ეკონომიკური ატაშეები. ეს არის სწორედ ის ურთიერთშევსება, მითუმეტეს მცირე სახელმწიფოს პირობებში, რომელსაც მწირი რესურსები აქვს, სხვადასხვა ინსტრუმენტები როგორ უნდა დაუკავშირო ერთმანეთს, ფორმალური დიპლომატები, დიასპორის წარმომადგენელი,  საპატიო კონსული, რომლებიც ერთი შედეგისკენ იქნებიან მიმართული“, — აღნიშნა ვიქტორ ყიფიანმა.