საპატნიორო ფონდის შვილობილი კომპანია ფონდში მიმდინარე ოპტიმიზაციის პროცესის ფარგლებში დაიხურა.საქართველოს დარგობრივი და რეგიონული განვითარების კომპანია (GIRDC) საპარტნიორო ფონდის შვილობილი კომპანიაა, რომელიც 2017 წელს შეიქმნა. მისი ფუნქცია ქვეყნის დაჩქარებული განვითარების დარგობრივი პრიორიტეტების და მათი რეგიონული (სივრცითი) განზომილების კვლევა, შესაბამისი ბიზნესპროექტების ინიცირება და დამუშავება, შემდგომში კი შერჩეული პროექტების საპარტნიორო ფონდისთვის წარდგენა ან პოტენციური ინვესტორებისთვის შეთავაზება იყო.
სავალუტო ფონდის მიერ შემუშავებული რეკომენდაციის თანახმად, ამ ეტაპზე საპარტნიორო ფონდის რეფორმირების პროცესის გამო პროექტების დაფინანსება არ ხორციელდება, ფონდს შეჩერებული აქვს ყოველგვარი ეკონომიკური საქმიანობა. შესაბამისად, როგორც ფონდის საზოგადოებასთან ურთიერთობის სამსახურის ხელმძღვანელი ნინო ქვარიანი „კომერსანტთან“ განმარტავს ოპტიმიზაციის მიზნით საპარტნიორო ფონდის შვილობილი კომპანიის GIRDC-ის დახურვა გადაწყდა. მანვე აღნიშნა, რომ მენეჯმენტში მომუშავე კადრები მათი მაღალი კვალიფიკაციის გათვალისწინებით, შესაძლოა მათ სხვა კომპანიებში გადანაწილდნენ.
„GIRDC -ს ფუნქცია და მიზანი ინვესტორებისთვის მზა პროექტების შეთავაზება იყო, ეს ძალიან დიდი ფუფუნებაა მათთვის, ვისაც რესურსი აქვს და ეძებს სფეროს რაშიც შეიძლება ის გამოიყენოს. საპარტნორო ფონდი რამდენიმე მიმართულებით მუშაობს - ან მოდის ინვესტორი გარკვეული ინიციატივით და ვიწყებთ შესწავლას, ან მთავრობის დავალებით ვამზადებთ პროექტებს, ან მოდიან ინვესტორები, გვეუბნებიან, რომ აქვთ თანხა და აინტერესებთ რაში შეუძლიათ მისი დაბანდება და რას ვურჩევდით ჩვენ. ამიტომ, საპარტნიორო ფონდმა საჭიროდ მიიჩნია შეექმნა ასეთი კომპანია, რომელიც მაღალკვალიფიციური თანამშრომლებით დაკომპლექტდა და აქტიურად მუშაობდნენ საინტერესო პროექტებზე. მათ განახორციელეს რამდენიმე მნიშვნელოვანი პროექტი აჭარაში. თუმცა, არსებული სიტუაციიდან გამომდინარე, რადგანაც საპარტნიორო ფონდს ეკონომიკური საქმიანობა შეჩერებული აქვს, მოხდა გარკვეული ტიპის ოპტიმიზაცია. მენეჯმენტის წევრები საკმაოდ მაღალი კვალიფიკაციის კადრები არიან და შეიძლება მომავალში მათი გადანაწილება მოხდეს,“ - აცხადებენ საპარტნიორო ფონდში.
საქართველოს დარგობრივი და რეგიონული განვითარების კომპანიამ (GIRDC) დაარსებიდან რამდენიმე ანალიტიკური შესწავლა მოახდინა ისეთი სფეროების, როგორებიცაა საკვებისა და სასმელების ინდუსტრია, ხილისა და ბოსტნეულის დამამუშავებელი ინდუსტრია, ხორცისა და რძის დამამუშავებელი ინდუსტრია. დაფინანსებისა და ინვესტორებისთვის შეთავაზების ეტაპზეა ისეთი პროექტები როგორებიცაა თიხის დამუშავება, თევზეულის წარმოება, ციტრუსისა და ხილის გადამუშავება, შაქრისა და ბიოდიზელის უნარჩენო წარმოება და ა.შ.
მარიამ მორგოშია