საქართველოს მეცხრე მოწვევის პარლამენტს უფლებამოსილების ვადა 31 ოქტომბერს ეწურება. ოთხი წლის წინ, 2016 წელს წინასაპარლამენტო არჩევნების დროს, ფრაქციამ „ქართული ოცნება-დემოკრატიული საქართველო“ მოსახლეობას სოციალური კეთილდღეობას და სწრაფ განვითარებას დაპირდა. თუმცა, მმართველობიდან ოთხი წლის შემდეგ მოსახლეობა შიმშილობის ზღვარზეა, ფასების საერთო დონე კი რეკორდულად იზრდება. „კომერსანტი“ დაინტერესდა ამ დროის განმავლობაში რა გააკეთეს მმართველი პარტიის დეპუტატებმა მთავარი დანაპირების - „კეთილდღეობის და სწრაფი განვითარების“ შესასრულებლად, რის გამოც ოთხი წლის წინ ამომრჩევლებს ხმას სთხოვდნენ. როგორ აფასებენ საკუთარ სიტყვას და საქმეს დეპუტატების სავარძლებიდან და რას ეუბნებიან ამომრჩევლებს.
„კომერსანტი“ აგრძელებს სტატიების ციკლს, სახელწოდებით — რა წვლილი შეიტანა ქართველი ხალხის კეთილდღეობასა და სწრაფ განვითარებაში თითოეულმა დეპუტატმა ამ ოთხი წლის განმავლობაში. ამჯერად „კომერსანტი“ „ქართული ოცნების“ მოქმედ დეპუტატს ალექსანდრე ქანთარიას დაუკავშირდა.
კითხვაზე, თუ რამდენად მოუტანა „ქართულმა ოცნებამ“ ხალხს ბოლო ოთხი წლის მანძილზე კეთილდღეობა და სწრაფი განვითარება - ალექსანდრე ქანთარია გვპასუხობს, რომ მთავარია ქვეყანაში შენარჩუნდა მშვიდობა და სტაბილურობა.
„რა თქმა უნდა, გარკვეულწილად სტაბილურობა და მშვიდობა შენარჩუნდა. თქვენც ხედავთ , გარშემო რეგიონი რა ცეცხლის ალშია, ჩვენ შევინარჩუნეთ ეს სტაბილურობა და მშვიდობა და ეს არის მმართველი გუნდის ყყველაზე დიდი დამსახურება.
ის, რომ პარლამენტმა მიიღო კონსტიტუცია და გადავიდა საპარლამენტო წყობაზე, ძალიან მნიშვნელოვანი კანონები იქნა მიღებული შრომის კოდექსში, უზენაესი სასამართლოს წევრების არჩევის აბსოლუტურად სხვა სისტემა შეიქმნა, გამჭვირვალედ - მეც ყველა ამ პროცესის ერთ-ერთი თანამონაწილე ვარ,“- აღნიშნავს ალექსანდრე ქანთარია.
რა საპარლამენტო ინიციატივით მიიღო მონაწილეობა ამ პროცესებში დეპუტატმა, თავად ნუკრი ქანთარია არ ასახელებს, თუმცა აღიარებს, რომ განსაკუთრებული არაფერი გაუკეთებია.
„კონკრეტულად ინიციტივა, რომელმაც გადატრიალება გამოიწვია ამ მოწვევის პარლამენტში მე არ მქონია, ან თუ მქონდა ვერ გავიდა,“- ამბობს დეპუტატი.
ეკონომიკის განვითარება დეპუტატის თქმით, ზრდას არ წყვეტდა, თუმცა პანდემია ქვეყნის „სწრაფი განვითარების პროცესისთვის“ ავბედითი განსაცდელი აღმოჩნდა.
„ასევე მოიმატა ეკონომიკამ, რომელიც უმთავრესია და ფაქტობრივად იცით, რომ ზრდაში და განვითარებაში მიდიოდა. მერე შევეჯახეთ COVID -19-ს, რომელმაც კედელთან მიგვაყენა და ახლა მიმდინარეობს, აქედან თავის დახსნის პროცესი. გაცილებით მეტი საშუალებები და მეტი პოტენციალი იყო და ძალიან თამამად შეიძლებოდა ამ თემებზე საუბარი, რომ არა თებერვალში კოვიდის ავბედითი განსაცდელი.
პირდაპირი უცხოური ინვესტიციების შემცირება, ვალუტის მკვეთრი გაუფასურება, საგარეო ვალის ზრდა, პროდუქტებზე ფასების ზრდა - ეს ყველაფერიც ალექსანდრე ქანთარიას თქმით, თებერვალში დაწყებულ პანდემიას უკავშირდება.
„ეს ყველაფერი ძირითადად გარემოებების ბრალია, შექმნილი მდგომარეობის ბრალია რეგიონში და მთლიანად მსოფლიოში. თუ თვალს ადევნებთ ბაიდენისა და ტრამპის დებატებს, ადვილად შეამჩნევდით, რა მდგომარეობაა ასეთ სახელმწიფოებშიც კი, ამ თვალსაზრისით.
ხარვეზები, ფაქტობრივად ყველგან გამოიკვეთა. თქვენ იცით, რომ სკოლაში ბავშვების ნაწილი მიდის, ნაწილი ვერ მიდის. ყველგან რაღაც გაიბზარა, ისე ყველაფერი მიდიოდა ნორმალურად ნელი ნაბიჯებით, მაგრამ წინ. გუნდმა მაქსიმალური გუნდურობა გამოამჟღავნა კრიზისულ მომენტში. ახლა პირველ რიგში მშვიდობა, სტაბილურობა და ეკონომიკური განვითარება გვჭირდება,“ - განმარტავს ალექსანდრე ქანთარია.