დეკემბრიდან მოქმედი ემბარგოს მიუხედავად, ევროპული ტანკერები აგრძელებენ რუსული ნავთობის ევროპაში გადატანას. ამის შესახებ გამოცემა Investigate Europe -ზე დაყრდნობით უკრაინული მედია წერს.

როგორც გამოცემა აღნიშნავს, ევროკავშირისთვის რუსული ნავთობის მიწოდების აკრძალვა ძალაში 5 დეკემბერს შევიდა, თუმცა მას შემდეგ ევროპულმა ტანკერებმა რუსული ნავთობით ასობით რეისი განახორციელეს, მათგან მინიმუმ ასი ევროპულ პორტებში.

მიუხედავად იმისა, რომ ამ ტანკერების უმეტესობა ბერძნულ გადამზიდავებს ეკუთვნის, სანქციების დარღვევაში შემჩნეულები არიან ასევე გემები გერმანიიდან, მონაკოდან, კვიპროსიდან, დანიიდან, ნორვეგიიდან და დიდი ბრიტანეთიდან.  ამ საზღვაო რეისების უმეტესობა დაზღვეული იყო ევროპულივე სადაზღვევო კომპანიების მიერ.

ამავდროულად, რუსული ჰოლდინგი „სოვკომფლოტი“, რომელიც ევროპული სანქციების ქვეშ იმყოფება, ევროპასთან საზღვაო ვაჭრობის კონტროლს აგრძელებს არაბთა გაერთიანებულ საამიროებში რეგისტრირებული ორგანიზაციის მეშვეობით.

როგორც ჟურნალისტებმა გაარკვიეს, რუსული ნავთობი ევროპაში სანქციებში არსებული მცირე  „ხვრელის“ წყალობით ხვდება. ფორმალურად, აკრძალვა არ ვრცელდება ნავთობზე, რომელიც იწარმოება რუსეთის ფარგლებს გარეთ და გადის რუსეთში ტრანზიტით. მაგალითად, ასე ახორციელებს ყაზახეთი ნავთობის ექსპორტს.

ევროკომისიამ, რომელმაც უკრაინაში აგრესიის გამო რუსეთის ფედერაციას ნავთობის სანქციები დაუწესა, აცხადებს, რომ ამ შეზღუდვების დაცვა ევროკავშირის წევრი ქვეყნების მთავრობებმა უნდა აკონტროლონ.

„სანქციების გამოყენების ცალკეული შემთხვევების შეფასება ევროკომისიის კომპეტენციაში არ შედის“, - განაცხადა ამ სტრუქტურის წარმომადგენელმა.

ნავთობის სანქციები რუსეთის წინააღმდეგ - რა ხდება ახალი

ცოტა ხნის წინ პაკისტანმა განაცხადა, რომ აპირებს იყიდოს იაფი რუსული ნავთობი. ამ ეტაპზე გარიგების კომერციული პირობები საბოლოო შეთანხმება მიმდინარეობს

ევროკავშირი რუსეთის წინააღმდეგ ახალი შემზღუდველი ღონისძიების - - ნავთობპროდუქტების ფასის ზღვრის შემოღებისთვის  ემზადება. მაზუთზე მაქსიმალური ფასი 45 დოლარი იქნება, დიზელზე - 100 დოლარი.

რუსული ნავთობის ექსპორტი მცირდება. გაყიდვების მოცულობის შემცირებამ რუსეთის ნავთობის შემოსავლები ომამდელი პერიოდის შემდეგ დაბალ დონემდე შეამცირა.