რადიო „კომერსანტის“ გადაცემაში „კომერსანტის დილა“ ISET-ის მაკროეკონომიკური პოლიტიკის კვლევითი ცენტრის ხელმძღვანელის მოადგილემ დავით კეშელავამ განაცხადა, რომ ეროვნული ბანკის მიერ რეფინანსირების განაკვეთის უცვლელად დატოვება მოსალოდნელი იყო, რადგან ინფლაცია ქვეყანაში მაღალ დონეზე ნარჩუნდება და სანამ არ დაიწყება ინფლაციის მაჩვენებლის შემცირება, მონეტარული პოლიტიკა გამკაცრებული დარჩება.
„მიუხედავად იმისა, რომ მიწოდების ფაქტორები, რომელიც ინფლაციას იწვევდა, მილევისკენ მიდის, მსოფლიოში საკვების და საწვავის ფასები წლიურ ჭრილში მცირდება. ჩვენთან მოთხოვნის ფაქტორები ჯერ კიდევ მაღალია. ეს დიდწილად მიგრაციის ნაკადებსაც უკავშირდება. არსებული მდგომარეობიდან გამომდინარე, მაღალი ინფლაცია შენარჩუნდება. სანამ არ დაიწყება ინფლაციის მაჩვენებლის შემცირება, მონეტარული პოლიტიკის გამკაცრება გაგრძელდება“, - განაცხადა დავით კეშელავამ.
მან ისიც თქვა, რომ გარემო ფაქტორებიდან გამომდინარე, ინფლაციამ ქვეყანაში შემცირება უნდა დაიწყოს და ეს ხელ-ფეხს გაუხსნის ეროვნულ ბანკს, რომ მონეტარული პოლიტიკის შერბილებაზე იფიქროს.
„საგარეო მიწოდების ფაქტორები ამოწურვისკენ მიდის, ლარიც სიმყარეს ინარჩუნებს, თუ მიგრაციის დიდი ნაკადების შემოდინება არ იქნება, ინფლაციამ შემცირება უნდა დაიწყოს. თუ ეს პროგნოზები ახდება, ინფლაცია შემცირებას დაიწყებს და ეს ხელ-ფეხს გაუხსნის ეროვნულ ბანკს, რომ მონეტარული პოლიტიკის შერბილება დაიწყოს“ - თქვა დავით კეშელავამ.
მონეტარული პოლიტიკა
