სან-ფრანცისკოს სამეთვალყურეო საბჭომ ნება დართო სან-ფრანცისკოს პოლიციის დეპარტამენტს, რომ „მკვლელი რობოტები“ ეჭვმიტანილების წინააღმდეგ გამოიყენოს, რაც მეცნიერულ-ფანტასტიკურ დისტოპიას რეალობად აქცევს. როგორც AP NEWS-ი წერს, თუ გარშემომყოფთა სიცოცხლეს საფრთხე დაემუქრება, რობოტები ეჭვმიტანილების ლიკვიდაციისთვის ცეცხლსასროლ იარაღს გამოიყენებენ.
ამ მხრივ „პანდორას ყუთი“ დალასის პოლიციის დეპარტამენტმა (DPD) გახსნა, როცა 2016 წელს, შეიარაღებულ თავდამსხმელთან წარუმატებელი მოლაპარაკების შემდეგ, შეიარაღებული თავდამსხმელის ლიკვიდაციისთვის რობოტი გამოიყენა.
AP News-ი წერს, რომ სან-ფრანცისკოს პოლიციის განყოფილებას შეიარაღებული რობოტები ჯერ არ ჰყავს, მათ იარაღით შეიარაღებას არ გეგმავს, მაგრამ რობოტი ასაფეთქებელი ნივთიერებით იქნება აღჭურვილი.
გამოცემა წერს, რომ ასეთ რობოტებს მხოლოდ ექსტრემალურ შემთხვევებში გამოიყენებენ, რათა უდანაშაულო ადამიანები სიკვდილისგან დაიცვან.
სან-ფრანცისკოს სახალხო დამცველის ოფისმა სან-ფრანცისკოს სამეთვალყურეო საბჭოს წერილი გაუგზავნა, სადაც ნათქვამია, რომ საზოგადოების წევრების დისტანციურად მოკვლა არაჰუმანური და მილიტარისტული ნაბიჯია, რომ სან-ფრანცისკოს ქუჩები არც ბრძოლის ველია და არც ომის ზონა. წერილში ასევე აღნიშნულია, რომ რამდენიმე შტატმა - ვირჯინიამ, მეინმა და ჩრდილოეთ დაკოტამ შეიარაღებული რობოტების გამოყენება აკრძალა, ნიუ-იორკში კი მხოლოდ სათვალთვალო რობოტების დაშვებაზე შეთანხმდნენ.
სან-ფრანცისკოს სამეთვალყურეო საბჭომ ახალი „მკვლელი რობოტები“ 8 ხმით 3-ის წინააღმდეგ დაამტკიცა.
მოამზადა მაკა ბიბილაშვილმა