ე.წ. სამხრეთ ოსეთის ოპერატიული შტაბის გადაწყვეტილებით, რუსეთთან საზღვარზე შეზღუდვები 1 სექტემბრამდე შენარჩუნდება.
ამავე დროს გათვალისწინებულია შეღავათები იმათთვის, ვინც გაივლის ტესტირებას კორონავირუსზე - ისინი რესპუბლიკაში 2-კვირიანი კარანტინის გარეშე შესვლას შეძლებენ.
ეს რთული გადაწყვეტილებაა იმის გათვალისწინებით, რომ „სამხრეთ ოსეთში“ საზღვრების დახურვის, იზოლაციის, და მისი შედეგების გამო საზოგადოებრივი უკმაყოფილება ყოველდღიურად იზრდება.
შექმნილ სიტუაციაში ხელისუფება ამ ორ საფრთხეს - ეკონომიკურ ვარდნას და ეპიდემიის შესაძლო მეორე ტალღას - შორის კომპრომისის მოძიებას ცდილობს.
იზოლაციის რეჟიმს წესით ეკონომიკისთვის არანაირი ზიანი არ უნდა მიეყენებინა, რადგანაც ეკონომიკა, როგორც ასეთი, ცხინვალის რეგიონში თითქმის არ არსებობს. ბიუჯეტი რუსეთიდან ივსება, გარდა ამისა, მთელი საქონელი - კვების პროდუქტებით დაწყებული სამშენებლო მასალებით დამთავრებული - რუსეთიდან შემოდის.
თუმცა იზოლაციამ რიგითი მოქალაქეები ბიზნესზე მეტად დააზარალა, განსაკუთრებით ეს პენსიონერებს ეხება, რომელიც კუთვნილ პენსიას ჩრდილოეთ ოსეთში იღებენ.
„ისინი აპრილიდან ვერ გადადიან ვლადიკავკაზში და პენსიებს ვერ იღებენ. ამიტომაც მათი უმრავლესობა შემოსავლის წყაროს გარეშე დარჩა. მათ მეზობლები, მეგობრები, და ნათესავები ეხმარებიან, ისინი პროდუქტებს ნისიად ყიდულობენ. მთავრობა მათთვის დახმარების გაწევას ცდილობს, თუმცა, სხვადასხვა სქემებმა ვერ იმუშავა. მოხუცებს ერთად-ერთი იმედი აქვთ, რომ გზა მალე გაიხსნება. მზგავსი პრობლემა იმათაც აქვთ, ვინც ბავშვებისთვის შემწეობას იღებენ» - განაცხადა ე.წ. სამხრეთ ოსეთის პარლამენტის დეპუტატმა დავით სანაკოევმა.
რესპუბლიკაში ასევე კვების პროდუქტები და პირველადი აუცილებლობის საქონელი მკვეთრად გაძვირდა. საზოგადოებრივი აზრი მთავრობას წაყრუებაში, ან კიდევ უარესი, შექმნილი სიტუაციის პირადი გამდიდრებისთვის გამოყენებაში ადანაშაულებს.
ფასების ზრდას სანაკოევი შემდეგი მიზეზებით ხსნის - პირველ რიგში ფასების ზრდა პანდემიამდე დაიწყო, და ეს ცხინვალს და მოსკოვს შორის ახალმა საბაჟო შეთანხმებამ გამოიწვია.
ამ შეთანხმების პირობებით, სამხრეთ ოსეთის და რუსეთის საზღვარზე ადრინდელთან შედარებით გაცილებით უფრო მკაცრი საბაჟო წესები ამოქმედდა.
საბაჟო პატარ-პატარა დარღვევებზე თვალს არ ხუჭავს და მთელი საქონლის ბოლომდე, ყველა წესების დაცვით განბაჟებას ითხოვს. ამან პროდუქციაზე ფასები მკვეთრად გაზარდა.
პანდემიამდე ოსი მოვაჭრეები ამ სიტუაციაში საკანონმდებლო ხვრელს იყენებდნენ, რომელიც 100 დოლარამდე ღირებულების ტვირთის განბაჟების გარეშე შემოტანა შეეძლოთ.
მარგამ პანდემიის დაწყების შემდეგ საზღვართან ერთად ეს ხვრელიც დაიხურა - საზღვრის გადაკვეთის უფლება მხოლოდ სამხრეთ ოსეთის ეკონომიკის სამინისტროს ნებართვის საფუძველზეა შესაძლებელი. ის კი მხოლოდ მთავრობასთან შეკრულ მსხვილ იმპორტიორებისთვისაა ხელმისაწვდომი..
იზოლაცია დამღლელია, ადამიანები ნერვიულობენ. ერთის მხრივ, ყველას ესმის რომ მოდუნება ნაადრევია - რუსეთში შეზღუდვები იმიტომ მოიხსნა, რომ მოსახლეობა იძულებულია იმუშაოს და თავი ირჩინოს. რუსეთის მიერ მთლიანად უზრუნველყოფილი სამხრეთ ოსეთისთვის ეს პრობლემა არ დგას - კარანტინის დროს ისევე, როგორც კარანტინამდე მოსახლეობის 99% რუსეთის ფინანსური დახმარების წყალობით არსებობს.
ოსებისთვის სწორედ საზღვრებია მთავარი პრობლემა. თუმცა, ჩრდილოეთ კავკასიაში ექიმები ამბობენ, რომ ჯერ არაფერი დასრულებულა - მათი აზრით ეპიდემიოლოგიური სიტუაციის მცირე გაუმჯობესება არის მეორე ტალღის წინ პატარა ტაიმ-აუტი.
ეს დიდი საფრთხეს ცხინვალისთვისაც წარმოადგენს, რომელიც მჭიდროდაა დაკავშირებული მეზობელ ავტონომიურ რესპუბლიკებთან, განსაკუთრებით კი ჩრდილოეთ ოსეთთან.
დეპუტატის როლადნ ქელეხსაევის თქმით, მთავრობამ რა გადაწყვეტილებაც არ უნდა მიიღოს, ხალხი მაინც უკმაყოფილო იქნება.
„საზღვარზე შეზღუდვების გამო ყველაფერი გაძვირდა, ცხოვრების დონე დაეცა. ყველა წუწუნებს, რომ მაღალჩინოსნები კარანტინზე ხელს ითბობენ. თუმცა, ხვალ საზღვარი რომ გაიხსნა, და ზეგ კორონავირუსმა იფეთქოს - დამნაშავე აქაც მაინც ხელისუფლება იქნება“ - განაცხადა მან.
საბოლოოდ, სამხრეთ ოსეთის პრეზიდენტმა ანატოლი ბიბილოვმა გადაწყვეტილება იზოლაციის სასარგებლოდ მიიღო.
„სიტუაცია ჩრდილოეთ კავკასიაში კერძოდ, კი მოძმე ჩრდილოეთ ოსეთში, ჩვენ მოდუნების უფლებას არ გვაძლევს. ჩვენ არ გვაქს უფლება ჩავაგდოთ ჩვენი მოქალაქეების სიცოცხლეები საფრთხეში მანამ, სანამ არ ვიქნებით დარწმუნებულები იმაში, რომ კორონავირუსის რისკმა ჩაიარა. სავარაუდოდ, საზღვარი აგვისტოშიც დახურული იქნება“ - განაცხადა მან.
მოამზადა თენგიზ აბლოთიამ
ekhokavkaza
ცხინვალი
