სამხრეთ კორეის სასამართლომ კომპანია „სამსუნგის“ ვიცე-პრეზიდენტს, ჯეი ლის ორი წლითა და ექვსი თვით წლით თავისუფლების აღკვეთა მიუსაჯა. ამ ხნის განმავლობაში, ჯეი ლი ვერ შეძლებს მნიშვნელოვანი გადაწყვეტილებების მიღებას „სამსუნგ ელექთრონიქსში“, ასევე ვერ გააკონტროლებს მემკვიდრეობის პროცესს მამისგან, რომელიც გასული წლის ოქტომბერში გარდაიცვალა.
„როიტერი“ წერს, რომ მემკვიდრეობის პროცესს გადამწყვეტი მნიშვნელობა აქვს „სამსუნგზე“ კონტროლის შენარჩუნებაში.
„სამსუნგის“ ვიცე-პრეზიდენტი სამხრეთ კორეის ყოფილი პრეზიდენტის, პაკ კინ ჰეს წარმომადგენლისთვის ქრთამის მიცემის ბრალდებით 2017 წელს გაასამართლეს და ხუთლიანი პატიმრობა მიუსაჯეს. სასამართლომ დაადგინა, რომ ჯეი ლი მთავრობის მოსყიდვას კონგლომერატში ძალაუფლების განსამტკიცებლად ცდილობდა. თავად ჯეი ლი კანონდარღვევას უარყოფდა, რის შემდეგაც სასჯელი შეუმცირდა და შეჩერდა სააპელაციო წესით, ხოლო ერთი წლის შემდეგ გაათავისუფლეს.
ამის შემდეგ ქვეყნის უზენაესმა სასამართლომ საქმე უკან გაგზავნა სეულის უმაღლეს სასამართლოში, რომელმაც გადაწყვეტილება 18 იანვარს გამოაქვეყნა. სეულის უმაღლესმა სასამართლომ ჯეი ლი დამნაშავედ ცნო მოსყიდვაში, გაფლანგვასა და დანაშაულებრივი შემოსავლების დამალვაში, რომლის ღირებულებაც დაახლოებით 7.8 მილიონი დოლარია.
1tv.ge