სამხრეთ კორეაში ერთ დღეში კორონავირუსით ინფიცირების 813 ახალი შემთხვევა დაფიქსირდა. ამის შესახებ Business Insider-ი ქვეყნის ჯანდაცვის მინისტრის მოადგილეზე დაყრდნობით წერს.
გამოცემის ინფორმაციით, ამგვარად სამხრეთ კორეაში ინფიცირებულთა რაოდენობა 3 150-მდე გაიზარდა, რაც ყველაზე მაღალი მაჩვენებელია მსოფლიოში ჩინეთის შემდეგ. გარდაცვლილია 17 ადამიანი.
ახალი შემთხვევების უმეტესი ნაწილი (657) ქალაქ დეგუში დაფიქსირდა, სადაც „სინჩხონჯის იესოს ეკლესია“ მდებარეობს. სწორედ ამ სექტის წარმომადგენელი ითვლება ქვეყანაში ვირუსის მთავარ გამავრცელებლად. 61 წლის კაცი, რომელმაც ჩინეთში იმოგზაურა და კორონავირუსის სიმპტომები აღენიშნებოდა საავადმყოფოში ტესტირებაზე უარი განაცხადა და რამდენიმე წირვას დაესწრო, სადაც 1000-ზე მეტ ადამიანთან ახლო კონტაქტი დაამყარა.
ხელისუფლება მოსახლოებას საჯარო ღონისძიებებში მონაწილეობის მიღებისგან თავის შეკავებისკენ მოუწოდებთ. მათი თქმით, ახლა ინფექციასთან ბრძოლის კრიტიკული მომენტია.
26 თებერვალს ჯანმომ განაცხადა, რომ კორონავირუსის პანდემიად გამოცხადების საფუძველი ჯერ არ არსებობს.
30 იანვარს ჯანდაცვის მსოფლიო ორგანიზაციამ კორონავირუსი გლობალურ საფრთხედ გამოაცხადა. ჩინეთში პნევმონიის აფეთქება 2019 წლის დეკემბერში დაიწყო. ის გამოწვეულია კორონავირუსის აქამდე უცნობი შტამით.
21 იანვარს ჩინეთმა დაადასტურა, რომ კორონავირუსი გადამდებია. მომხდარის გამო ქვეყნის ორ ქალაქში კარანტინი გამოცხადდა. ჩინეთში საქართველოს საელჩოში კი ცხელი ხაზი მოქმედებს.
imedinews