1 მარტიდან ამოქმედებული ახალი კანონი ბიზნესისთვის, თანამშრომლების სამუშაო საათების აღრიცხვის აუცილებლობის შესახებ, ქართულ მაღაზიათა გაერთიანების აზრით, ნაჩქარევი გადაწყვეტილებაა და მხოლოდ დამსაქმებლისთვის სამუშაო პროცესის გართულებას ემსახურება. ბიზნესს მიაჩნია, რომ საერთო სურათს დასაქმების სფეროში ეს კანონი ვერ შეცვლის. "კომერსანტთან" საუბრისას, მაღაზიები აღნიშნავენ, რომ თანამშრომლების სამუშაო საათების აღრიცხვას არ ეწინააღმდეგებიან, მაგრამ წინასწარ გაუფრთხილებლობის გამო, სფერო ფაქტობრივად მოუმზადებელია და მათი უმეტესობა დაჯარიმების საფრთხის პირისპირ აგრძელებს მუშაობას.
„ამ რეგულაციით პრობლემა ყველა კომპანიას ექმნება, მაგრამ მაღაზიების მთავარი დაბრკოლება არის ის , რომ მათთვის თავიდანვე არ იყო ცნობილი, თუ რა უნდა მომხდარიყო, რა ევალებოდათ. მაღაზიების ნაწილი მოუმზადებელია, არ აქვთ არანაირი მზაობა იმისა, რომ აწარმოონ აღრიცხვის ჟურნალები. ერთი თვით ადრე მაინც რომ სცოდნოდა ბიზნესს ამ დეტალების შესახებ, ალბათ უკეთესად მოემზადებოდნენ . კანონს ბუნებრივია ვერ შევეწინააღმდეგებით, მაგრამ ყველა რეგულაცია უნდა იყოს ჯანსაღი და ქმედითი. ეს კანონი ცალსახად მხოლოდ ფორმალობაა, ვერავინ გამოთვლის როდის მივა თანამშრომელი, რომელ საათზე მოაწერა მან ხელი. შესაბამისად , ეს ყველაფერი მხოლოდ დამსაქმებლისთვის საქმის გართულებაა და არაფერი შეიცვლება. ვისაც უნდა ელექტრონულად გააკეთებს ამ აღრიცხვას ვისაც უნდა, ხელს მოაწერს ქაღალდზე. ელექტრონული აღრიცხვა, რომ სავალდებულო გახადონ, ეს ცალკე ხარჯებია და იმედია ამის აუცილებლობა არ დადგება. პრობლემა ის კი არაა მაღაზიებს საათების აღრიცხვა რომ უწევთ, პრობლემა ისაა, რომ წინასწარ არაფერი იცოდნენ და მოუმზადებლები არიან. არავის უნახავს მინისტრის არც ბრძანება და არც დანართები. დღეს რომ შევიდეს ინსპექცია ბუნებრივია ამ მაღაზიებს დააჯარიმებენ იმიტომ, რომ მზად არაფერი აქვთ“ — განმარტავს ქართულ მაღაზიათა ასოციაციის თავმჯდომარე სანდრო სუბელიანი კომერსანტთან.
შეგახსენებთ, კომპანიებს დასაქმებულთა სამუშაო საათების აღრიცხვა მოუწევთ. გასულ წელს მიღებული საკანონმდებლო ცვლილების მიხედვით ვალდებულება დამსაქმებლებისთვის 1 მარტიდან ამოქმედდა. საკანონმდებლო მაცნეზე გამოქვეყნებული დოკუმენტის მიხედვით წარმოებული ანგარიში დამსაქმებლებმა 1 წლით უნდა დაარქივონ.